سەرلەبەیانی ئەمڕۆ سوپای عێراق هەوڵیدا کە لە شوێنە ستراتیژییەکان سەربازەکانی جێگیر بکات و دەستی بە هەڵکەندنی خەندەق کرد. بەوهۆیەوە خەڵکی کەمپی پەنابەرانی شەهید رۆستەم جودی بەرەوڕوویان خرۆشان و رایانگرتن.

دانیشتوانی خۆڕاگری مەخمور کەلەبەردەم سوپای عێراق خێمەیان هەڵداوە قسەیان بۆ ئاژانسی هەواڵی فورات (ANF) کرد.

ئەحمەد هیلالی: بانگەواز درا کە سوپای عێراق دەستی بە هەڵکەندی خەندەق کردووە. خەڵکی لەخۆبوردوو و خۆڕاگری مەخمور هەندێکیان لەلای کانی ئاوی سیسۆ و هەندێکیش لە لایەکی دیکەوە چوون. لەنێوان ئێمە و ئەواندا گرژی روویدا. تائاستێک پاشەکشێمان پێکردن. خێمەمان هەڵدا. تا کۆتایی بەو هەوڵانە نەهێندرێت، شوێنی خۆمان چۆڵ ناکەین، دەچینە سەریان و بەرەنگاریان دەبینەوە. ئەگەر قەبوڵمان بکردایە، لە باکوور ئەوەمان قەبوڵ دەکرد. ئێمە ناچینە ژێرباری ئەوەوە، لەگەڵ گەلەکەمان خۆڕاگری دەکەین. تاپاشەکشێ نەکەن چالاکی ئێمە بەردەوام دەبێت.

فەرحان ددێری: ماوەی شەش رۆژە خۆڕاگری دەکەین. پێنج رۆژی رابردوو هەندێک کۆبوونەوە ئەنجامدران، بەڵێنیان دا، بەڵام ئەمڕۆ کاتژمێر نزیکەی ٠٥:٠٠ جارێکیتر دەستیان بە هەوڵەکانیان کردەوە. بە هێزێکی زۆرەوە ویستیان ئابڵوقەی کەمپەکە بدەن و چواردەوری بگرن. دەیانەوێت بە تەواوەتی کامپەکە بخەنە ژێر کۆنتڕۆڵی خۆیانەوە. بە بەرخودانی گەورە و ئیرادەی گەل ئەوە تێکدەشکێندرێت. بانگەواز ئاراستەی تەواوی جیهان دەکەین، هەموان هەڵسنە سەرپێ. دەیانەوێت بەش بەش بێنە پێشەوە و ئەو پلانە جێبەجێ بکەن کە دایانناوە. خێمەمان هەڵداوە، بە ئیرادەی خۆمان خۆڕاگری دەکەین. بڕوامان بە گەلەکەمان هەیە. ئێمە تێکیان دەشکێنین. ئەوان ناتوانن ئیرادەمان بشکێنن".

هـ . ب