کۆمیتەی پەیوەندییەکانی کەجەکە رایگەیاند، کە دەوڵەتی تورک پلانێکی نوێی داگیرکەری بەدەستەوەیە و پەدەکەش هەوڵ دەدات دەوڵەتی عێراق پەلکێشی هاوکاری لەگەڵ دەوڵەتی تورک بکات. کەجەکە لە دژی ئەو بانگەوازێکی ئاراستەی هێزەکانی باشوور و دەسەڵاتدارانی عێراق کرد.
لە راگەیەندراوێکدا کۆمیتەی پەیوەندییەکانی کەجەکە ئاماژەی بەوەکردووە کە لە دوایین هێرشی داگیرکەری دەوڵەتی تورکدا لە گوندی کافیا دوو هاووڵاتی مەدەنی شەهیدبوون، وێڕای شەرمەزارکردنی ئەو کۆمەڵکوژیە سەرەخۆشی لە بنەماڵەی ئەو دوو شەهیدە کردووە و جەختی کردووەتەوە " ئەم هێرشە دڕندانەیەی دەوڵەتی داگیرکاری تورکیا سەلمێنەری ئەو راستییەیە کە تورکیا دژی هەموو کوردێکە و رژاندنی خوێنی کورد و کاولکردنی نیشتمانی کورد بۆ خۆی بە کارێکی رەوا دەزانێت".
کەجەکە ئەوەی بەبیرهێناوەتەوە کە بەهۆی هێرشەکانی دەوڵەتی تورکی داگیرکەرەوە سەدان گوند چۆڵ کراون و ژمارەیەکی زۆر لە هاووڵاتیانی مەدەنی بەهۆی بۆردومانەکانەوە شەهید و برینداربوون و بە سەدان گەریلاش بە هۆی بەکارهێنانی چەکی کیمیاییەوە و شەهیدبوون و لەو رووەوە رایگەیاندووە: "ئەمە شاڵاوێکی نوێ کیمیاباران و ئەنفالە کە لە سەر دەستی دەوڵەتی داگیرکەری تورکیا ئەنجام دەدرێت و دەسەڵاتی پەدەکەش هاوشێوەی جاش و موستەشارەکانی سەردەمی بەعس هاوبەشی ئەم ئەنفالەیە، چاوساخی بۆ دەکات، تاوانەکانیان پەردەپۆش دەکات و تەنانەت رەوایەتییان پێدەدات. . واتە دەوڵەتی تورک و پەدەکە ئەنفالێکی نوێ بە سەر کوردستاندا دەسەپێنن" ئەوەشیخستووەتەڕوو، "دەسەڵاتدارانی پەدەکە دەیانەوێت دەوڵەتی عێراق پەلکێشی هاوکاریکردنی دەوڵەتی تورک بکەن لەم شاڵاوە نوێیەی ئەنفال و داگیرکارییەدا".
لە کۆتاییدا کەجەکە داوای لە هەموو هێزەکانی باشووری کوردستان و حکومەتی عێراق کردووە، لە دژی ئەم هێرش و کۆمەڵکوژییانەی دەوڵەتی تورک هەڵوێست وەربگرن و بەم جۆرە رێگری لەوە بکەن کە دەوڵەتی تورک زیاتر و زیاتر خوێنی هاوڵاتییانی باشوری کوردستان بڕژێنێت.
دەقی راگەیەندراوەکە:
"بۆ رای گشتی
لە هێرشی فڕۆکە جەنگییەکانی دەوڵەتی داگیرکەری تورکیا بۆ سەر چیای "سیارێ' گۆندی کافیای سەربە شارەدێ دینارتەی هەرێمی بادینان، دوو هاوڵاتی باشوری کوردستان بە ناوەکانی "بەشیر عومەر عەلی" و "عارف تەها" شەهید بوون. شەهید بەشیر و شەهید عارف لە کاتێکدا بوونە ئارمانجی سوپای داگیرکەری تورکیا کە لە نێو باخ و زەوی گوندی خۆیاندا خەریکی کار بوون. لێرەدا وێرای شەرمەزار کردنی ئەم کۆمەڵکوژییە، پرسە و سەرەخۆشی خۆمان ئاراستەی هەموو خەڵکی باشوری کوردستان و بەتایبەت بنەماڵەی شەهیدان "بەشیر عومەر عەلی" و "عارف تەها" دەکەین. ئەم هێرشە دڕندانەیەی دەوڵەتی داگیرکاری تورکیا سەلمێنەری ئەو راستییەیە کە تورکیا دژی هەموو کوردێکە و رژاندنی خوێنی کورد و کاولکردنی نیشتمانی کورد بۆ خۆی بە کارێکی رەوا دەزانێت.
لە ئەنجامی هێرشە داگیرکارییەکانی دەوڵەتی تورکیا بۆ سەر باشوری کوردستان تا ئێستا نزیکەی هەزار گوند چووڵ و خاپور کراون، بە سەدان هاوڵاتی شەهید بوون، بە سەدان بریندار بوون و بە دەیان هەزاریش لە سەر زێد و خاکی خۆیان ئاوارە بوون و هەروەها بەسەدان گەریلای ئازادی کوردستانیش لە ئەنجامی بەکار هێنانی چەکی کیمیاییدا شەهید بوون. ئەمە شاڵاوێکی نوێ کیمیاباران و ئەنفالە کە لە سەر دەستی دەوڵەتی داگیرکەری تورکیا ئەنجام دەدرێت و دەسەڵاتی پەدەکەش هاوشێوەی جاش و موستەشارەکانی سەردەمی بەعس هاوبەشی ئەم ئەنفالەیە، چاوساخی بۆ دەکات، تاوانەکانیان پەردەپۆش دەکات و تەنانەت رەوایەتییان پێدەدات. هەروەها رێگری لەوە دەکات کە هەڵوێستی جەماوەری و نیشتمانپەروەری لە دژی ئەم کۆمەڵکوژییانە پێش بکەوێت. واتە تورکیا و پەدەکە ئەنفالێکی نوێ بە سەر کوردستاندا دەسەپێنن. لە کاتێکدا کە خوێنی سووری هاونیشتمانیانی باشور بە دەستی دەوڵەتی فاشیستی تورکیا دەڕژێت و بەم شێوەیە شەهید دەکرێن، دەسەڵاتدارانی پەدەکە لە سەر فەرشی سوور پێشوازی لە دەسەڵاتدارانی تورکیا دەکەن، لە ئامێزیان دەگرن و دەست لە ناو دەست پۆز بۆ کامێراکان دەدەن.
دەوڵەتی فاشیستی تورکیا بە سەرۆکایەتی ئەردۆغان و باخچەلی خەریکی داڕشتنی پلانێکی نوێ و بەرفراوانی داگیرکارییە لە دژی باشوری کوردستان. سەردانی وەزیرە تیرۆریستەکانی تورکیا بو هەولێر و بەغدا ئامادەکارییەکە بۆ ئەم هێرشە. دەسەڵاتدارانی پەدەکە دەیانەوێت دەوڵەتی عێراق پەلکێشی هاوکاریکردنی دەوڵەتی تورکیا بکەن لەم شاڵاوە نوێیەی ئەنفال و داگیرکارییەدا. هەربۆیە بانگەوازیمان هەیە بۆ هەموو هێز و لایەنەکانی باشوری کوردستان و هەروەها دەسەڵاتدارانی دەوڵەتی عێراق کە لە دژی ئەم هێرش و کۆمەڵکوژییانەی دەوڵەتی تورکیا هەڵوێست وەربگرن و بەم جۆرە رێگری لەوە بکەن کە تورکیا زیاتر و زیاتر خوێنی هاوڵاتییانی باشوری کوردستان بڕژێنێت.
لێرەدا جارێکی دی پرسە و سەرەخۆشی خۆمان ئاراستەی گەلی باشوری کوردستان و بەتایبەت بنەماڵەی شەهید عارف و شەهید بەشیر دەکەین و خۆمان بە هاوبەشی ئێش و خەم و پەژارەتان دەزانین. لە پەروەردگاری مەزن داواکارین کە گیانی هەر دوو شەهید بە بەهەشتی بەرین شاد بکات و سەبووری و دڵنەوایی بە بنەماڵەی هێژایان ببەخشێت و هەروەها بەڵێن و پەیمان دەدەین کە لە سەر رێبازی شەهید هەڵمەت دێرەلووک بە گوڕترکردن و برەودانی هەرچی زیاتر بە تێکۆشان لە دژی فاشیزم و داگیرکاری و بەکرێگیراوی تۆڵەی خوێنی شەهیدان بکەینەوە".
هـ . ب
