ترەمپ جە پلاتفۆرو (Truth Social)ینە، نویستش: "پێچەوانەو ئۆبامای کە ساڵۊو ٢٠١٥ ملیاران دۆلارېش پەی ڕێککەوتەی بە نامې JCPOA (پلانەو چالاکیی هامبەشی ۋەرفراوان)یش بەخشا بە ئێرانی، من حیچ چێوې پێشکەش بە ئێرانی نمەکەرو".

جە درێژەنە واتش: "ۋەرو ئانەی من بنکە ئەتۆمییەکې ئاڎیشام بەتەمامی دلېنەبەردې، حەجگیز چنیشا گفتوگۆ نمەکەرو".

ئەمریکا شەوەو ٢١_٢٢ی حوزەیرانی، ٣ بنکې ئەتۆمیې ئێرانیش بۊمبواران کەردې و بەشدار بی جە هرووژمەکا ئیسرائیلی هامپەیمانیش.

دماو ئا بۊمبوارانەی ١٢ ڕوې بەردەوام بی، ئا ئایېربەسەی جە لایەنو ترەمپیوە سەپیابې، جە ٢٤و حوزەیرانی کۊت بوارو جابەجێکەردەیۆ.

ڕۊو جومعەی، ترەمپ هۆشداریش دا، ئەر ئێران یۆرانیۆم بیاونۆ بە ئاستو پەرەپنەدای چەکی ئەتۆمی، ئانە ئەمریکا هرووژمی تازە دەس پنە مکەرۆ.

ئێران: مەشۊم ئەمریکا قەول بڎۆ کە هرووژم نمەکەرۆوە

یاگەگیرو وەزیرو جبەرو ئێرانی، مەجید تەخت‌ رەوانچی بە (بی بی سی)ش ئەرەیاۋنا ئەر ئەمریکا قەول بڎۆ هرووژم نمەکەرۆوە سەرو ئێرانی، ئا وەختە ڕەنگە ئەرەنیشتەی دیپلۆماتیک چنی ئەمریکای دەس پنە بکەرۆوە.

ۋەرپرسەکەو ئێرانی ئەرەیاۋناش گەرەکشانە دڵنیې باوە ئایا جە پرۆسەو گفتوگۊینە هرووژم مکەراوە یان نا، واتش: "هەڵای ئەمریکا هەڵوێسو ۋێش ڕۊشن نەکەردەنۆ".