بەمەڵامەتو کەشوهەواو گۆو زەمینیۆ، ۋەرنیشتوو ئۊروپای ئی حەفتە بە پلێوە گەرمی بەرزەرە ۋېیەرد. جە ٨٤ شارې فەڕەنساینە هۆشداریی دریان و جە هەمان کاتەنە ئیسپانیا، پرتوگال و ئیتاڵیانە پلەو گەرمای پیمەرێوە تازەش تۆمارکەردەن.
بەرزبیەیۆ پلەو گەرمی کاریگەریش سەرو چڼین وڵاتا بەحری چەرمەی نیانەرە. پلەو گەرمی جە ئیسپانیا، فەڕەنسا، ئیتاڵیا و پۆرتەکیزەنە ٤٠ پلې سیلیزیش ۋېیەرنان و فەرمانگەکې ژیۋگەیچ ئەرەیاۋناشا کە ئا پلەو گەرمیە جە ڕوو چڕی و پانتایی جوگرافییوە وێنەش نییا و وەڵتەر ڕووەش نەڎان.
فەڕەنسا: هۆشداریی پرتەقاڵیش جە ٨٤ شارانە وەڵاکەردەنۆ، ٢٠٠ ۋەننگې دمانیمەڕۆ وزیێنێرە. سەندیکا و ئەڎا و تاتەو زاوڵا ماچۆ، حکومەت پڕۆسەکەی بەشێوێوە غەڵەت ڕاوەبەر مکەرۆ.
ئیسپانیا: پلەو گەرمی جە شارو گراناداینە یاوان ٤٦ پلې سیلیزی، کە ڕیکۆردێوە تازەش جە وڵاتەکەنە تۆمارکەرد.
پرتوگال: جەمې ناوچې، دلېشانە لیشپۆنەی پایتەختیچ، ئینې چېرو هۆشداریی سوورینە؛ چەمەڕا مکریۆ پلەو گەرمی بیاوۆ ٤٤ پلې سیلیزی.
ئیتالیا: فرەتەرین هۆشداریش جە ٢١ شارانە وەڵا کەردەنۆ. ئامبوڵانس جە شارەکا پېسە ڕۆما، میلانۆ، فلۆرانسای و ڤەنەدیکینۍ ئینۍ ئامادەیینە. تەنیا جە سیچیلیا، ڕۆو شەممەی ١٥ ڕووەدایې ئېرکۊتەیۆ بیێنې.
ئاوەو بەحری چەرمەیچ گەرمە بیێنە
پلەو گەرمی جە دوورگەکا بالێاریکینە ٢٦ پلې سیلیزیشا ۋېیەرنان، شارەزایا هۆشداریی مڎا کە بەرزی پلەکاو گەرمای جە ڕوانی ئایندەیچەنە بەردەوامیشا بۆ.
