هاوسەرۆکایەتی دەستەی بەڕێوەبەریی کۆما جڤاکێن کوردتان (کەجەکە) لە پەیامێکدا بۆ کۆچی دوایی فریاد هیرانی، نوسەر، رۆژنامەنووس و ئەندامی کۆنگرەی نەتەوەیی کوردستان (کەنەکە) رایگەیاندووە: " بە داخ  و  پەژارەیەکی  زۆرەوە، هەواڵی  کۆچی  دوایی  کەسایەتی  دیاری  باشوری  کوردستان،   پێشمەرگەی دێرین، رۆژنامەنووس  و  ئەندامی  کۆنگرەی  نەتەوەیی  کوردستان  “فریاد  حەسەن   ئەحمەد” ناسراو بە "فریاد هیرانی"مان  پێگەیشت. بەم  بۆنە  خەمناکەوە  پرسە  و سەرەخۆشی  خۆمان  ئاراستەی  گەلی کوردستان، هاوڕێیان و  هاوسەنگەران و بنەماڵەی هێژای کاک فریاد دەکەین و خۆمان بە هاوبەشی خەم و پەژارەتان دەزانین".

راشیگەیاندووە: " کاک فریاد هیرانی وەکو مرۆڤێکی ئازادیخواز،  تێکۆشەر و نیشتمانپەروەر کە لە تەمەنی گەنجێتیدا بەشداری کۆمەڵەی رەنجدەرانی کوردستان کردووە و پاشان لە حیزبی شیوعی کوردستاندا درێژەی بە خەبات داوە. لە راپەڕینی جەماوەری گەلەکەمان لە باشوری کوردستاندا  بە تایبەت لە ئازادکردنی شاری هەولێر و کەرکووکدا دەورێکی چالاکی هەبووە. کاک فریاد هیرانی وەکو نووسەرێکی بەئەزموون  و قەڵەمێکی بەهێز لە ناساندنی دۆزی رەوای گەلەکەمان و هۆشیار کردنەوەی کۆمەڵانی خەڵکی کوردستاندا دەورێکی گرنگی هەبووە و بە کاری رۆژنامەنووسی درێژەی بە تێکۆشان داوە. وێستگەی کۆتایی تێکۆشانی سیاسی  و کۆمەڵایەتی کاک فریاد هیرانی کۆنگرەی نەتەوەیی کوردستان KNK بوو  کە وەکو کەسایەتییەکی نەتەوەیی و نیشتمانیپەروەرێکی دڵسوز لە پێناو پتەوکردنی یەکێتی نەتەوەیی گەلی کورد خەباتی کردووە. کاک فریاد هیرانی لە هەموو ئەم وێستگانەی ژیانی سیاسی و کۆمەڵایەتیدا بە هەڵوێست و بیروبۆچوونەکانی جێگەی رێز و بڕوا و متمانەی هاوڕێیان و گەلەکەی بووە."

لە کۆتایی پەیامەکەی هاوسەرۆکایەتی دەستەی بەڕێوەبەریی کەجەکەدا هاتووە: " جارێکی دی بە بۆنەی کۆچی دوایی کاک فریاد هیرانییەوە پرسە و سەرخۆشی خۆمان ئاراستەی گەلی کورد، هاوڕێیان و هاوسەنگەران، ئەندامانی کۆنگرەی نەتەوەیی کوردستان و بە تایبەت بنەماڵەی هێژای دەکەین. هیوادارین پەروەرەدگاری مەزن  رۆحی کۆچکردوو بە بەهەشتی بەرین شاد بکات و سەبووری و دڵنەوایی بە بنەماڵە و هاوڕێیانی ببەخشێت".

هـ . ب