ئێوارەی دوێنێ لە شاری ڕانیەی باشوری کوردستان گردبوونەوەیەک ئەنجامدرا و تیایدا ڕاگەیەندراوێک خوێندرایەوە و تیرۆکردنی سوهەیل خورشید عەزیز ئەندامی ئەنجومەنی گشتیی تەڤگەری ئازادی ناسراو بە مامۆستا شەماڵ، ئیدانە کرا.

لە مەراسیمەکەدا، سەید خالید ئەندامی ئەنجومەنی تەڤگەری ئازادیی وتی: "دەستی فاشیزمی تورک بە هاوکاریی خاینانی ناوخۆ گەیشتە کەسایەتی ئازاد و ڕۆشنبیری مامۆستا شەماڵ".

سەید خالید ڕایگەیاند، بێدەنگی لە دژی خیانەت و تیرۆر لە باشووری کوردستان دەتوانێت ببێتە هۆی ئەوەی دەستی تیرۆر بگاتە دەرگای ماڵی هەموو کەسێکی ئازادیخواز.

داواشی لە هەموو هاوڵاتیان و نووسەران و ڕۆشنبیران و ئازادیخوازان کرد، چیتر بێدەنگ نەبن و هەڵوێستی جدییان هەبێت لە دژی تیرۆرکردنی ئازادیخوازان.

لەکۆتاییشدا سەید خالید داوای لەبەڕێوەبەرایەتی و دەزگا ئەمنییەکانی گەرمیان کرد، کە بەزووترین کات تاوانباران بدۆزنەوە و سزایان  بدەن.

ژ.ت