بەپێی سەرچاوەکانی هەواڵی رۆژهەڵاتی کوردستان بەرەبەیانی سێ شەممە ٧ی تشرینی دووەم / نۆڤەمبر هێزەکانی ناسراو بە پاسەوانی سنووری ئێران لە سنووری هەنگەژاڵی بانە تەقەیان لە کۆڵبەران کردووە و لانیکەم ٢٠ کۆڵبەر بە چەکی ساچمەیی بریندار کراون.

تائێستا بە وردی ژمارەی کۆڵبەران و ناسنامەکانیان دیار نییە.

 هاوکات هێزەکانی دەوڵەتی ئێران لە ناوچەی نەوسود لە پارێزگای کرماشان هێرشیان کردووەتە سەر ژمارەیەک کۆڵپەڕ و لە ئەنجامی لێدان و ئەشکەنجەدا دوو کۆڵبەر کە خەڵکی جوانڕۆن، برینداربوون، بەڵام تائێستا ناسنامەیان نەزانراوە.

هەر لە ناوچە سنوورییەکانی ئەو شارە لە ئەنجامی لێدان و ئەشکەنجەدانی لەلایەن هێزەکانی دەوڵەتەوە، کۆڵبەرێکی خەڵکی گوندی تینی سەربە شارۆچکەی باینگانی پاوە، بە ناوی تەیب خوسرەوی بە سەختی برینداربووە و تووشی شکانی پەراسو، سەر، حەوزی ران بووە و بەمەبەستی ئەنجامدانی نەشتەرگەری گواستراوەتە بۆ کرماشان.

بەگوێرەی ئامارەکانی کۆڵبەر نیوز لەماوەی شەش مانگی یەکەمی ساڵی کۆچی (ئادار- ئەیلول) ١٣ کۆڵبەر لە رۆژهەڵاتی کوردستان کوژراون و ٧٢ کۆڵبەریش برینداربوون.

هـ . ب