بە بۆنەی ٢٥ی تشرینی دووەم رۆژی جیهانی بەرەنگاربوونەوەی توندوتیژی دژی ژنان رێپێوان ئەنجامدرا. لە رێپێوانەکەدا ئەوە راگەیەندرا کە ژنانی پێشەنگ توندوتیژی، دەسەڵاتداری و داگیرکەری تێکدەشکێنن.
لە کانتۆنی فورات بە سەدان کەس بە بۆنەی ٢٥ی تشرینی دووەم رۆژی جیهانی بەرەنگاربوونەوەی توندوتیژی دژی ژنان رێپێوانیان کرد. رێپێوانەکە لە گۆڕەپانی شەهید عەگید دەستیپێکرد و تا گۆڕەپانی ژنی ئازاد بەردەوام بوو.
لە رێپێوانەکەدا بەردەوام دروشمی "ژن، ژیان، ئازادی" دەوترایەوە و پلاکاردێک کە لە سەری نوسرابوو " بەفەلسەفەی ژن ژیان ئازادی خۆت بپارێزە" بەرزکرابووەوە.
لە گۆڕەپانی ژنی ئازاد رێپێوانەکە گۆڕدرا بۆ گردبوونەوە و سەرەتا بە خولەکێک بێدەنگی یادی گیانبەختکردووانی رێگەی ئازادی بەرزڕاگیرا. دواتر ئەندامی کۆردیناسیۆنی کۆنگرەی ستار پەیمان عەلوش قسەی کرد و باسی لەوەکرد کە ئەوان بە "ژن، ژیان، ئازادی" کۆتایی بە داگیرکەری و دەسەڵاتداری دەهێنن.
دواتر لەلایەن ناوەندی کولتوری و هونەری باقی خدۆ شانۆیەک لەبارەی توندوتیژی بەرامبەر ژنان نمایش کرا.
چالاکییەکە بە وتنەوەی دروشمی "ژن، ژیان، ئازادی" کۆتاییهات.
