ڕێکخراوی CPTـی ئەمریکى لە راپۆرتێکدا بڵاوی کردووتەوە، لە ماوەی ١٠رۆژى رابردوودا سوپاى تورک، لەو رێگا سەربازییانەی کە لە مانگی کانوونی دووەمی ئەمساڵدا دروستی کردوون لە ناو باشووری کوردستان، ٣٠٠ تانک و زرێپۆشی داخڵی گوندەکانی، ئورە، سەرەڕۆ، ئەرادنا، کێستە، چەلکێ و بابیرێ کردوون. جگە لەوەش لەنێوان گوندەکانی بابیرێ و کانی بەلاڤێ سنوورى بادینان خاڵێکی پشکنینی داناوە و رێگا بە تێپەڕبوونى هاووڵاتیان نادات.

 کامەران عوسمان، ئەندامی  تیمی کوردستانی عێراقی رێکخراوی CPTـی ئەمریکى، پلانێکى سوپاى تورکیا بۆ داگیرکاریى زیاترى خاکى باشووری کوردستان ئاشکرا دەکات.

 کامەران عوسمان لە راپۆرتەکەدا ڕایگه‌یاند: "لە سێ رۆژدا نزیکەى هەزار سەربازى تورکیا لەنێوان مۆڵگە سەربازییەکانی لەشاخی باروخ و چیای مەتینا لە پشتی ناحیەی بامەرنێ هاتوچۆ دەکەن و لە ٢٥حوزەیرانەوە خاڵێکی پشکنینیان لەنێوان گوندەکانی بابیرێ و کانی بەلاڤێ جێگیرکردووە، ناسنامەی هاووڵاتیان کۆنترۆڵ دەکەن".

هەروەها لە ڕاپۆرتەکەدا هاتووە، "لە ئێستادا تورکیا دەیەوێت لە ناحیەی شیلادزێوە بۆ قەزای باتیفا هێڵێکی ئەمنی دروست بکات، هێڵەکە بە ناحیەی دێرەلووک و بامەڕنێ و بێگۆڤادا تێپەڕدەبێت، بەمەش هەموو گوند و شارەدێ و زنار و زەوی و دۆڵ و خاک و ئاوی پشتی ئەم هێڵە دەکەوێتە ژێر کۆنتڕۆڵی سوپای تورک ".