تەڤگەری ئازادی رایگەیاند، دەیانەوێت لەڕێی توندتركردنی گۆشەگیریی لە ئیمڕاڵی و شكاندنی ئیرادەی گەل لە باکور و هەروەها لەرێگەی داگیركردنی باشوور و رۆژئاوای كوردستان و سەرکوتی سەرھەڵدانی رۆژھەڵات و گەلانی ئێران بەردەوامیی بە پیلانگێڕیی بدەن.
تەڤگەری ئازادی کۆمەڵگەی کوردستان بەبۆنەی ساڵیادی پیلانگێڕی نێودەوڵەتی لەدژی عەبدوڵلا ئۆجالان ڕێبەری گەلی کورددا، راگەیەنراوێکی بڵاوکردەوە و رایگەیاند، لە ٢٤ ساڵی رابردوودا رێبەر ئاپۆ لە زیندانی ئیمڕاڵیدا و لەناو بێ مافی و گۆشەگیریدا مەزنترین و مێژووییترین بەرخۆدانی بەڕێوەبردووە و بزووتنەوەی ئازادیخوازیی و گەلە وڵاتپارێزەكەشمان، بەپێشەنگایەتی ژنان و گەنجان، لەدەوری ئەو رێبەرایەتیە کۆبوونەوە ، بەدرووشمی "كەس ناتوانێت رۆژمان تاریك بكات" بوونە پەرژینێكی ئاگرین و خاوەندارێتیان لە رێبەرایەتی و ھزر و فەلسەفەكەی کرد و برەویان بە تێكۆشانی ئازادیی دا و بەرخۆدانیان گەیاندە بەرزترین ئاست.
تەڤگەری ئازادی ئاماژەی بەوەکرد، دەبێت پیلانگێران و دوژمنانی ئازادی بزانن كە تا رێبەر ئاپۆ ئازاد نەبێت، نە پرسی كورد چارەسەر دەبێت و نە خۆرهەڵاتی ناوینیش سەقامگیر دەبێت. چونكە لەبنچینەدا دۆزی بەڕێز ئۆجەلان و دۆزی گەلی كورد و كوردستانە و بەیەكەوە چارەسەر دەبن.
لەكۆتاییدا تەڤگەری ئازادی وتی، " بانگەوازیی لە تەواوی گەلەكەمان بە گشتی و باشووری كوردستان بە تایبەتی دەكەین وەرن با ھەموان پێکەوە بەرۆحی یەكێتی نەتەوەیی دیموکراتییەوە، تێکۆشان گەشتر و فراوانتر بکەین لەدژی پیلانگێڕیی، داگیركاریی، فاشیزم و گۆشەگیری."
دەقی راگەیەنراوەکەی تەڤگەری ئازادی بەم شێوەیەیە:
"٢٤ ساڵ لەمەوبەر بە بەشداری دەزگا ھەواڵگریەکان و دەیان دەوڵەتی زلھێزی جیھانی و ھەرێمی گەلەکۆمەیەکی ھەمەلایەن دژ بە رێبەری تێكۆشانی ئازادی بەڕێز عەبدوڵڵا ئۆجالان و بزووتنەوەی ئازادیخوازیی گەلی كوردستان و گەلانی ناوچەكە بەڕێوەچوو. ئەو پیلانگێڕییە نەگریسە کە لە ٩ی تشرینی یەکەمی ١٩٩٨ دەستی پێکرد، ئامانج لێی لەناوبردنی بزووتنەوەی ئازادیخوازی گەلی کورد بوو لەکەسایەتی رێبەرە ئیلھام بەخش و ئافرێنەری کەسایەتی نوێی کوردی ئازاد.
درێژەی ئەو پیلانگێریە لە ١٥ شوباتی ١٩٩٩ دا گەیشت بەلوتکەی درندەیی و بەھاوکاری دەیان دەوڵەت و دەزگای ھەواڵگری ھێزە ھەژمونگەراکان بەرێز عەبدوڵا ئۆجەلانیان لەکینیاوە دەست بەسەرکرد و بەشێوازی مافیایی رادەستی دەوڵەتی فاشستی تورکیایان کردەوە، بەئامانجی لەناوبردنی شۆرشی ژیانەوەی گەلی کورد و بەردەوامیدان بە قەدەری شومی سەدان ساڵەی داسەپاو بەسەر کوردان، خەون خەیاڵی داگیرکەران ئەوەبوو گەلی کورد لەڕێبەرەکەی دابڕان، بەڵام ئیرادە و بەرخۆدانی بێ وێنەی ڕێبەر ئۆجالان خەونی ئەوانی لەگۆڕنا. لە ٢٤ ساڵی رابردوودا رێبەر ئاپۆ لە زیندانی ئیمڕاڵیدا و لەناو بێ مافی و گۆشەگیریدا مەزنترین و مێژووییترین بەرخۆدانی بەڕێوەبردووە و بزووتنەوەی ئازادیخوازیی و گەلە وڵاتپارێزەكەشمان، بەپێشەنگایەتی ژنان و گەنجان، لەدەوری ئەو رێبەرایەتیە کۆبوونەوە ، بەدرووشمی "كەس ناتوانێت رۆژمان تاریك بكات" بوونە پەرژینێكی ئاگرین و خاوەندارێتیان لە رێبەرایەتی و ھزر و فەلسەفەكەی کرد و برەویان بە تێكۆشانی ئازادیی دا و بەرخۆدانیان گەیاندە بەرزترین ئاست. گەریلای ئازادییش لەم ٢٤ساڵەدا ولەهەر چواربەشی کوردستان بوونە پێشەنگی ئەو بەرخۆدانە و گەلێك داستانی ئەفسانەیی و مێژووییان تۆمار کردووە و بەردەوامیشن لە چالاکی و فیداکاریدان، تا ئەمڕۆش لە چیا سەرکەشەکانی کوردستاندا لەنێو بەرخۆدانێكی مەزن دا زەبری كوشندە لە سوپای داگیركەر ئەدەن و هەموو خەون حیساباتی داگیركارییان سەروبن كردووە.
لەکاتێکدا یادی ئەو پیلانگێڕییە شومە دەكەینەوە، دەبینین كە جیھان و ناوچەکە ھەردەچێ زیاتر بەرەو شەر و ناکۆکی و قەیرانی گەورەتر دەچێت و ئۆقرەیی لەھیچ شوێنێک نەماوە لەلایەکیتر بەرەی گەلان و ئازادیخوازان بە پێشەنگایەتی ژنان گەنجان ھێزە دیموکراتەکان ھەردەچێت زیاتر لە دەوری پرۆژەی چارەسەری دیموکراتی و ئاشتی و پێکەوەژیانی گەلان کۆدەبنەوە و دەبێتە کارەکتەری گۆرانکاری و ئەلتەرناتیڤی سیستەمی سەرمایەپەرستی و بەرژەوەند خوازی، بەو پێیەی رێبەر ئۆجەلان و گەلی کورد پشەنگایەتی ئەو تێکۆشانە دەکات لەرۆژھەڵاتی ناوین و کوردستان ، پیلانگێڕان بەردەوامن و دەخوازن گەلی كوردستان و بزووتنەوە ئازادیخوازەكەی پەرتەوازە بکەن و لەناوی ببەن، بۆ ئەوەش پەنایان بۆ درندانەترین شێوازی شەر و تیرۆر و تۆقاندن بردووە ئەمەش لەمیانەی سێكوچكەی"فاشیزم و داگیركاری و گۆشەگیریی" بەڕێوەدەبەن.
دەیانەوێت لەڕێی توندتركردنی گۆشەگیریی لە ئیمڕاڵی و شكاندنی ئیرادەی گەل لە باکور و هەروەها لەرێگەی داگیركردنی باشوور و رۆژئاوای كوردستان و سەرکوتی سەرھەڵدانی رۆژھەڵات و گەلانی ئێران بەردەوامیی بە پیلانگێڕیی بدەن. بەڵام ئەمڕۆ بزووتنەوەی ئازادیی و گەلی وڵاتپارێزی كوردستان، بە بەرخۆدانی مێژوویی لەھەموو گۆرەپانەکاندا زەبری كوشندەلە فاشیزم وداگیركاریی داوە، ئەو شۆرش و تێکۆشانە بە دورشم و بەرخۆدانەکەیەوە بووەتە كارەكتەرێكی سەرەكی خۆرهەڵاتی ناوین و جیهان. ئەمڕۆ داگیركاریی و فاشیزم لەلاوازترین دۆخی خۆیدا دەژیت و بەرەو هەڵوەشانەوەی یەكجارەكی دەچێت، ھەرئەوەش دەوڵەتی تورکیا و دەوڵەتە داگیرکەرەکان و ھاوکارەکانی ھارکردووە، بریاری دواشەری خۆیان راگەیاندوە، تیرۆری ئازادیخوازان و وڵاتپارێزان دەکەن. چەکی کیمیایی لەشەردا بەکاردێنن. خەڵکی مەدەنی کۆمەڵکوژ دەکەن. تیرۆری ژنانی ئازادیخواز دەکەن و ژینگە تێکدەدەن، بەردەوامیی بە سیاسەتی گۆشەگیری دەدەب دور لە یاساو رێساکان، ئەوەش دەرئەنجامی شکستەکانیانە لەمەیدانی جەنگ و سیاسەت و بەرێوەبردندا.
ئەمرۆ گەلی کورد بە پێشەنگایەتی ژنان و گەنجان لەھەموو پانتایی کوردستان و ناوچەکە تێدەکۆشێت
یەکێتی نەتەوەیی لەنێو روحی گەلدا گەش بووە. ھێزە وابەستە و خۆفرۆشەکان رەزیل و بێ نرخ بوون. لای کۆمەڵگا و تەلیسمی ترس و تۆقاندنیان چیتر بەشی بەردەوام بوونیان ناکات، بۆیە ئیدی كات كاتی ئازادییە، كاتی ئازادی جەستەیی رێبەر ئاپۆ و ئازادیی گەلان و گەلی كوردستانە. ئیدی كاتی ئەوە هاتووە گەلی كوردیش ھێزی یەکگرتوویی خۆی بەھێزتر بکات و دەستكەوتەكانی خۆی بپارێزێت و ببێتە خاوەن پێگە و قەوارەی خۆی و بە ئازادی خۆی بەرێوەبەرێت و كۆنفیدڕاڵی دیموكراتی لە كوردستان و ناوچەكەدا بونیاد بنێت و بە ئازادی، ئاشتی و ئارامی لەگەڵ گەلانی تر دا بژیت.
دەبێت پیلانگێران و دوژمنانی ئازادی بزانن كە تا رێبەر ئاپۆ ئازاد نەبێت، نە پرسی كورد چارەسەر دەبێت و نە خۆرهەڵاتی ناوینیش سەقامگیر دەبێت. چونكە لەبنچینەدا دۆزی بەڕێز ئۆجەلان و دۆزی گەلی كورد و كوردستانە و بەیەكەوە چارەسەر دەبن.
لەكۆتاییدا لەیادی ئەم رۆژە رەشەدا، بانگەوازیی لە تەواوی گەلەكەمان بە گشتی و باشووری كوردستان بە تایبەتی دەكەین وەرن با ھەموان پێکەوە بەرۆحی یەكێتی نەتەوەیی دیموکراتییەوە، تێکۆشان گەشتر و فراوانتر بکەین لەدژی پیلانگێڕیی، داگیركاریی، فاشیزم و گۆشەگیری.
یەکێتی و پێکەوە بوونمان گرەنتی سەرکەوتنمانە
بەرخۆدان ژیانە
سڵاو لەرێبەرایەتی پێشەنگ و ئازادیخواز
سڵاو لەبەرخۆدێرانی ئەو کاراونە مەزنەی تێکۆشان
سڵاو لە بێژەرانی دورشمی ژن ژیان ئازادی
نەفرەت لە پیلانگێڕانی نێودەوڵەتی ٩ی تشرینی یەکەم"
ف.ق
