ناوەندی چاپەمەنی یەکینەکانی پاراستنی رۆژهەڵاتی کوردستان (یەرەکە) ناسنامەی دوو گەریلای ئاشکرا کرد کە لە ئەنجامی هێرشەکانی دەوڵەتی تورکی داگیرکەر بۆ سەر هەرێمی پێنجوێن شەهیدبوون.

راگەیەندراوەکە بەم جۆرەیە:

"لە ٣ی کانونی یەکەم/دیسەمبری ٢٠٢٣ لە ئەنجامی هێرشێکی دەوڵەتی تورکی داگیرکەر بۆ سەر هەرێمی پێنجوێن دوو هاوڕێمان بە ناوەکانی ئاریەن ئارێ یەک لە فەرماندەکانی هەپەژە و هاوڕێ هێرش بەرخودان لە کاتێکدا لە سەر ئەرکی شۆڕشگێڕی خۆیان بوون، شەهید بوون.

زانیاری لە سەر ناسنامەی هاوڕێیانی شەهیدمان بەم جۆرەیە:

ناو و پاشناو: زەینەب ئەیڤەری

ناسناو: ئاریەن ئارێ

کات و شوێنی بەشداربوون: ٢٠٠٦- سەڵماس

کات و شوێنی شەهیدبوون: ٣ی کانونی یەکەم/ دیسەمبری ٢٠٢٣- پێنجوێن

 

ناو و پاشناو: سدیق شێخ ئەحمەد

ناسناو: هێرش بەرخودان

کات و شوێنی بەشداربوون: ٢٠١٦- کۆبانێ

کات و شوێنی شەهیدبوون: ٣ی کانونی یەکەم/دیسەمبری ٢٠٢٣- پێنجوێن

لە درێژەی راگەیەندراوەکەدا هاتووە، کە ئاریەن ئارێ ساڵی ٢٠٠٦ لە سەڵماسەوە بەشداری لە ریزەکانی گەریلا کردووە و خۆی پەروەردەکردووە و خۆی پێگەیاندووە و لە زۆر گۆڕەپانی رۆژهەڵاتی کوردستان لە شاهۆوە تا ورمێ فەرماندەیی هەپەژەی کردووە و وەک ئەندامی فەرماندەیی هەپەژە لەم قۆناغەدا پێشەنگایەتی بۆ شۆڕشی ژن، ژیان، ئازادی کردووە. لە پەروەردەکردن و رێکخستنی هێزەکاندا بێ دوودڵی بەشداربووە، بووەتە هێما هاوڕێیەتی و هەوڵدان و جێگەی خۆی لە ناو دڵی هاوڕێیانیدا کردبووەوە. بووە سەرچاوەی هێز بۆ شۆڕشی ژن، ژیان، ئازادی. بە پەیوەستبوونی بە هاوڕێیەتی هەڤاڵ ئاریەن ئێمە سەرلەنوێ چاوخشاندنەوە بە خۆمان و ئەرک و بەرپرسیارێتیماندا دەکەینەوە. ئێمە خاوەنداری لە خەون و ئاوات و ئامانجەکانی دەکەین و بەڵێنی گوڕدان بە تێکۆشان دووبارە دەکەینەوە.

سەبارەت شەهید هێرش بەرخودانیش هاتووە، کە "ساڵی ٢٠١٦ لە شاری بەرخودانەوە، لە شاری کۆبانێوە بەشداری ریزەکانی تێکۆشان بووە و دوای ماوەیەک رووی کردووەتە گۆڕەپانەکانی تێکۆشان لە رۆژهەڵاتی کوردستان و بێ وچان تێکۆشاوە. هاوڕێ هێرش دەیزانی بۆچی دەژی و لەپێناو چیدا شەڕ دەکات هەربۆیە دەیزانی چۆن بە جوانی و ناوازەیی بژی. بەهۆی تایبەتمەندییەکانی کەسایەتیەوە بەردەوام جێگەی رێز و خۆشەویستی هاوڕێکانی بوو. بەهەموو هەبوونی خۆیەوە ئامێزی بۆ فکر و فەلسەفەی رێبەر ئاپۆ کردبووەوە. بە رۆحی گەنجانەی خۆیەوە ئێمەی فێری جوانی و چۆنێتی تێکۆشان کرد. ئێمە وەک هاوڕێیانی قەرزارباری ئەو رۆحە گەنجانەی ئەوین و بەڵێن دەدەین لە پێناو هێنانەدی ئاواتەکانیدا درێژە بە تێکۆشان بدەین".

لە کۆتایی راگەیەندراوەکەی یەرەکەدا هاتووە: " وەک یەکینەکانی رۆژهەڵاتی کوردستان سەرەخۆشی لە گەلی وڵاتپارێزی کوردستان، بەتایبەتی بنەماڵەی هەردوو شەهیدەکەمان دەکەین و جارێکی دیکە رایدەگەینین کە تا کۆتایی خاوەنداری لە میراتی ئەو هاوڕێیانە دەکەین و بەڵێن دەدەین بۆ ئەوەی خەون و ئاواتی ئەو شەهیدانە بگەیەنینە سەرکەوتن بەردەوام رێگەی شەهیدان بگرینەبەر و زیاتر پەرە بە تێکۆشان بدەن".

هـ . ب