١٧ەمین فستیڤاڵو ژەنا زیلانۍ جە شارو گیلسەنگیشنی ئەڵمانیای ساز کریۊ.

فستیڤاڵەکە جە لایەن و یۊبیەی ژەنا کورڎی جە ئەڵمانیا (یەژەکە-ئە) ساز کریۊ، پۍ یاڎکەرڎەیۊ ئەڤین گۊیی (ئەمینە کارا)یۍ ملۊڕاۋە کە جە ٢٣ۍ کانونی یوۋەمەنە جە پاریس و پایتەخت و فەرەنسای جە کۊکوشیېوەنە گەشمەرڎۍ بیە. جە فستیڤاڵەکەنە ژیای و کۊشیای ئەڤین گۆیۍ بە ۋیدیۊ نیشانە مڎریۊ.

حەرپاسە سەرو فەلسەفەو ''ژەنی، ژیای، ئازاڎیی'' پانێلېوە ساز کریۊ. وەرهەم و هەرمانە دەسیەکۍ ژەنایچ سەرو مېزەکاوە نمایش کریا. ژەنە ۋێنەکێشەکێچ وەرهەمەکېشا جەبارەو کۊشیای ئازاڎیی ژەناۋە جە نمایشگېوەنە نمایش کەرا.

جە فستیڤاڵەکەنە یاگۍ کېڵۍ پۍ زارۊڵا ئاماڎە کریان

چنی گروپەکا هورپڕای هونەرمەنڎۍ و گروپەکۍ موزیک ژەنۍ، مزگین تاهیر، کەڤانا زێڕین، ئەیلەم ئاکتاش، بەسەر شاهین و فرمێسکۍ-چ ملانە سەرو تەختەو شانۊی.

ژیندا دەنیزە و ئایتەن کاپڵانە ئەنڎامۍ کۊمیتەی ئاماڎەکارو فستیڤاڵی کە هاموەخت ئەنڎامۍ جمیەرو ژەنا کورڎی ئەوروپا (تەژەکە-ئە)ینۍ جەبارەو ئاماڎەکارییەکاوە زانیاریشا ئەرەیاۋنا و بانگەوازشا پۍ بەشڎاری کەرڎەی کەرڎ.

"ژیندا دەنیز"ە: دژبە ئەرەگیری و پیا سالاری ژمارەما فرە کەرمۍ

"ژیندا دەنیز"ە سەرنجش وست سەرو لایەنی میان نەتەوەیی فستیڤاڵو ژەنا زیلانۍ و داواش جە ژەنا نەتەوەکا تەری کەرڎ بەشڎاری فستیڤاڵەکەنە کەرا. ۋاتیچش، ئازاڎیی ژەنۍ و ئاخېزو ژەنۍ بە سەرمەشقی ''ژەنی، ژیای، ئازاڎیی'' پېکمۍ. حەر پۊکەی فستیڤاڵەکە هەم بۊ بە  پەیامێوە و هەمیچ بۊ بە بانگەوازۍ. پەیامێوەیچ مڎۊ بە جەهان و پیا سالاری. ژەنی چنڎە دەورو یۊترینیرە کۊباوە، چنڎە ۋېشا رێکوزا و چنڎە زیاڎۍ با ئانڎە بەقوەتۍ با، ئەرەگیریچ لاواز بۊ. حەر پۊکەی مشۊ گرڎ بەشڎارۍ با، پۍ ئانەی ژمارەما فرە بۊ و وەران ۋەر بە ئەرەگیری و پیا سالاری مرڎمېوە".

"ئایتەن کاپڵان"ە: سەرو "ژەنی، ژیای، ئازاڎیی" گفتوگۊ کەرمۍ

"ئایتەن کاپڵان"ەیچ ۋاتش، "مەرحەلېوە دژوارما ۋیەرنا. بە تایبەتیچ مەرحەلېوە پەڕ جە تنوتیژی و کۊکوشی دژوو ژەنا بۍ. جە وەرکەوت کوشتەو ژینا ئەمینی-ۍ، کۊکوشی دووەمو پاریسی، بومەلەرزەیچ کاریگەری خراپش کەرڎ سەرو ژەنا. سەرەڕاو ئینیشا گرڎ برەوما بە کۊشیای ژەنا دا. بە تایبەتی بە مدرامانو ژەنا جە وەرکەوتوو کورڎسانی فەلسەفەو ژیای 'ژەنی، ژیای، ئازاڎیی' بە جەهانی بی. مدرامانو کۆبانۍ ژەنەو کورڎیش بە دنیۍ شناسا، بە مدرامانو ژەنا وەرکەوتی مدرامانەکەما بە جەهانی بی. جە ڕاو فستیڤاڵو ئېساڵو زیلانېوە ئێمە رێکوستەی ۋیما، کۊشیای ۋېما، حەرپاسە چنی گرڎو جمیەرەکا ژەنا هێزی یۊگېرتەو ۋېما و ئامانجەکاما بە جەهانی مشناسمۍ. چی فستیڤاڵەنە ئێمە چنی گروپ و لایەنە جیاجیاکا ژەنا کۊبیمېوە و باس جە کۊشیای هامبەشو ۋېما و فەلسەفەو 'ژەنی، ژیای، ئازاڎیی' مکەرمۍ.

هـ . ش