هەمیشەی ویروو ئانەیم کەردەنەو کە زوانی هەورامی و جوغرافیاو هەورامانی، پەی منێوە کە نویسەروو ئی سەردەمینا، چە ئیمکانات و پتانسیێلێش هەنێ و چێش منیۆرە وەروو دەسوو من تا تاڤوو پێسە بنەمای چەمش بڕوونە و ئارۆ، دەقی مۆدێڕنش پەنە خولقنوو. هەورامان، تارێخێوەش هەن کە هەریاگێ و هەر ساڵوو زەمانێوەش وشکنی و پەیجۆری کەری، کێ بیەیت و شوناسی هەقەتینوو تۆ بەحس کەرۆ. ئارشیوێ جە عالتەرین دەنگەکاو و مووسیقیەکاش هەن. ژیوای تایبەت بە هەورامیەکاو و موحتاج نەبیەیشا. دەگا بە دەگاش کەیلاوا جە ئەدەبیاتی دەمواچی و فۆلکلۆری. ئوستوورەو و ئەفسانێ تایبەت بە وێش هەنێش و دەقی ئایینیو یارسانیما هەن کە شێعرێ هەورامیێنێ. ئاوەخت کە هەورامان شێعرەش بیێنە، فارسەکێ کە ئیسە ئەپاسە وێشا گێرا گەز و نیمێ گڵێمەوە نەبیێنەشا. سروشتێوەش هەن کە زوان، ژیوای، نەریت، ئایین، گۆرانیێ، قسێ وەشێ و نەستەقێ، غەریبی و دووروەڵاتی، شێعرە و ئەدەبیات، تەموورە و سیاوچەمانە و جل و بەرگ و... دماجار باوانشا بۆوە هەر ئا سروشتە و ئا جوغرافیا ڕەسەننە کە ڕەنگ مدۆوە دلێو تەماموو بەشەکاو ژیوای سووژەی هەورامینە. هەورامی دەقی حیماسی، غەنایی و قودسی(دینی) یش هەن بە ئەوپەڕوو تواناو ئا خاڵە پۆزەتیڤاوە کە ڕەخنەگرێ بەحسشا کەرا.

من حەقم نیا سەروو ئانەیوە هەورامی زوانا، زارا، بن زارا، گوویێشا، لەهجەن و وێم مەخجڵنوو پی تاقمە و دەسە بەش کەردەیاوە. ئێننە زانوو پی کۆمەڵە واتا و دەنگاوە کە لەمموو ئەد٘ێمنە ئارد٘ێنێم، کریۆ بنویسی. کریۆ کلاسیکش پەنە بنویسی و ڕچەماڕتەرین شێعرەیچ. کریۆ زەریف تەرین ڕۆمان و کوڵە داستانەکا بنویسی پەنەش. کریۆ دەقی شانۆیی بنویسی سەرش، فیلمش پەنە وەش کەری و تەئاترە. گۆرانیێش پەنە واچی، لایەلایەش پەنە کەری پەی زاوڵەو بێشکێ و دژمانیچش پەنە دەی. هەورامی هامکات دەروێشێوە بەرۆنە عاڵەموو عیرفان و خود٘ا ژناسی و لایێوە تەریچەو ژەن و پیا پێوەرە مارۆ سەما و هورپڕای. وەختەکارێ من بە هەورامی تاڤوو شیوەن کەروو، کەسێوەش خڤنوو پەنە، هەستەکام وزوو جبەر و ڕەنجەکام پەی بەشەرێوە غەیرە هەورامی بەحس کەروو، یانی هەورامی گردوو ئا پتانسیێلاشە هەنێ چەنە کە زوانێوە دنیایی پێسەو ئینگلیسی یا ئاڵمانیچ هەنێش. من پێسەو کەسێوە کە هەورامی منویسوو تاخەیر ئەگەر گردوو دنیایچنە دە نەفەرێ زیننێ با پی زوانی قسێ کەرا، هەر منویسووش پەنە و گردوو هەوڵیم ئانە بیەن جە هەرمانەکامنە دیمێوە تەر جە ئیمکاناتەکاو ئارۆو ئی زوانی وزوو جبەر و نیشانی دەو کە هەرچی تکنیک و شێوە نویستەی ئارۆیانەن، کریۆ دلێ دەقی ئەدەبی هامچەرخی هەورامینە با، بە ئەوپەڕوو ستاتیکا و زەریفیوە.