چالاکییەکەو ۋەردەمو زینانو باکرکۆی دمایش ئاما
چالاکیی "دەنگت بوزە پاڵو ئازادی" ۋەردەمو زینانو باکرکۆینە دمایش ئاما. هامسەرۆکەو مەتوای_دەری دیلەک سۆنمەزە ئەرەیاۋناش چالاکییەکۍ دژو گۆشەگیری بەردەوامۍ بانە، واتش: "بە مڎرامان سەرۍ گنمۍ".
جەمەو یۆگێرتەی و هامکاری چنی بنەیانەو زینانیا و حکومدریایا مەڕمەڕە (مەتوای_دەر)ی و بنەیانەو زینانیا، جە چوارچێوەو هەڵمەتەو "ئازادی پەی عەبدوڵا ئۆجالانی، چارەسەری سیاسیی پەی پەرسو کوردی" بە داواو "دەنگت بوزە پاڵو ئازادی" ئارۆ پەی دماجاری ۋەردەمو زینانو باکرکۆینە کوۍ بیێوە. لافیتەو پەی ئاشتی کۆمەڵایەتی و ماڕای گۆشەگیری، دەنگت بوزە پاڵو ئازادی" هۆرگیریا و بەشدارا هێڵەکۍ "دەنگت بوزە پاڵو ئازادی"یشا پۆشا. درووشمەکا "با گۆشەگیری هۆربگێرا، ئازادی پەی مرۆڤایەتی" و "ژەنی، ژیۋای، ئازادی" بەرزۍ کریێوە.
"دژو سیاسەتو گۆشەگیری مردمێوە"
هامسەرۆکو مەتوای_دەری سۆنمەز دەمیر ئەرەیاۋناش هەرچن نکۆڵی جە بیەو گۆشەگیری بکەرا، بەڵام گۆشەگیری هەن و کاریگەری سەرو گرڎو گلېرگەی مکەرۆ، واتش: "تا گۆشەگیری جە گرڎو زینانەکانە هۆرمگیریۆ، جە گرڎو مېڎانەکانە ئەرەکۊشمۍ و گۆشەگیری مېیاۋنمۍ بە ڕای گرڎینی".
ئەندامو جەمەو پارێزنەرا پەی ئازادی (ئۆهەدە) هەزال سورمەلی واتش: "جە سەیەو چالاکی ئەڎایامانە ترەکێوە کۆتە دلۍ گۆشەگیری. ئێمەیچ تا بتاومۍ دژو سیاسەتو گۆشەگیری مردمێوە".
سورمەلی داواش جە ڕێکوزیا نەتەوەیی و مېیاننەتەوەییەکا کەرد هەرمانە پەی هۆرگێرتەو گۆشەگیری بکەرا، هۆرگێرتەو گۆشەگیری گرنگا پەی بەدیئامای ئاشتی.
"تا ماڕای گۆشەگیری درێژە بە چالاکییەکا مڎەیمۍ"
ئەندامو ئۆهەدەی عەلی دیلەر ئەرەیاۋناش گۆشەگیری ئیمراڵی جە گرڎو زینانەکانە وەڵابیەنۆ، واتش: "ئێمە قبووڵش نمەکەرمۍ، هەتا ماڕای گۆشەگیری چالاکییەکاما بەردەوام مکەرمۍ".
