دارێن میلار سەرۆکو پارتو پارێزگاو پەرلەمانو وێڵزی کە پێسەو پارتو سەرەکی ئۆپۆزسیۆنی هەژمار کریۆنە ئەرەیاوناش کە پەشتگیری جە 'بانگەوازو ئاشتی و گلێرگەو دیموکراتیک'و ڕابەر ئاپۆی مکەرمێ کە جە ٢٧و شوباتیمە ئەرەیاویا.
میلار ئەرەیاوناش کە مۆدێلێوە هامشێوەو ڕێککەوتەو جومعێوە پیرۆز (پرۆسەو ئاشتی چنی سوپاو کۆمارو ئێرلەندای) کە بەینو بەریتانیای و ئێرلەندای ئیمزا کریێنە، تاوۆنە بۆنە مۆدێل و ڕێنمایی پەی پرسو کوردی و تورکیای.
دارێن میلار، بە ئاماژەدای پانەی کە کوردەسان جە بڕێ ڕوانگێ جوگرافی و کلتوورییۆ، هامشێوەو وێڵزین، واتش: "گوڵە نێرگز کە یاگێوە گرنگەش هەنە جە کوردەسانەنە، گوڵیپو نەتەوەیی وێڵزین. هیوادارەنا جە ئایندەنە تاومێنە جە کوردەسانێوە ئازاددەنە چنی یۆتری گلێرێ بیمێوە".
'ئێمە هەنگامەی ئاشتی عەبدوڵا ئۆجالانی بە شێوێوە ئەرێنی هورسەنگنمێنە'
میلار بە ئاماژەدای بە گرنگی بانگەوازەکەو ڕابەر ئاپۆی پەی "ئاشتی و گلێرگەی دیموکراتیک" ی واتش: "پا جۆرەی کە پەکەکە جەلایەنو فرە جە وڵاتاوە پێسەو 'رێکوزیێوە تیرۆریستی' ئشناسیان، ئینەیچ پاسە مکەرۆ بە شێوێ فەرمی قسێ چنی
لایەنەکا ئاستەم بۆنە. بەڵام هەنگامەکێ ئۆجالانی ئا هێزەش هەن کە ڕا پەی ئاشتی بکەرۆوە. ئاشتی، چبەرو ئەوەکۆشای چەکداری، تاوۆنە بۆنە بژاردێوە مانادار هەم پەی کوردی و هەم پەی تورکیای. ئێمە پەشتگیری چئ بانگەوازەیە مکەرمێنە."
'مۆدێلو سوپاو کۆماری ئێرلەندای تاوۆنە بۆنە مۆدێلێوە پەی چارەسەری'
میلار ڕێککەوتەو جومعەی موبارەکیش یاڏوستیمێ کە بە ینو بەریتانیای و ئێرلەندای ئیمزا کریان و ئەرەیاوناش: "ئا ڕێککەوتەی کە جە ئەنجامو پرۆسەو ئاشتینە چنی شین فین و سوپای کۆماریوازو ئێرلەندای ئیمزا کریا، پەی چارەسەرکەردەو کێشە و بەینو لایەنە جیاوازەکا فرە کاریگەر بێ."
میلار جە دماین و قسەکاشەنە ئاماژەش پانەیەدا کە مۆدێلێوە هامشێوە جە وەرکەوتوو دلێڕاسەینە بەتایبەتی جە جەنگو تورکیای و کوردینە تاوۆنە نوێنەرایەتی "چارەسەریی ئەرێنی" بکەرۆ و واتش: "بە پەی لوا و من چەمکو دۆڵەت نەتەوەی چنی واقیعو فرە ئایینی و فرە نەتەوەیی وەرکەوتوو دلێڕاسەی مەگونجیۆنە. سیستەمە فرەلایەنەکێ کە مافو گەلاو کەمینەکا وەرچەم گێرانە تاوانە ئاشتی و چارەسەری هەمیشەیی بنیات بنیا."
