دەسەو ڕاوەبەری مېیانو (MYK) پارتو هەرێمە دیموکراتیکەکا (دەبەپە)ی بۊنەو ساڵیاڎو پیلانگێڵنی مېیاننەتەوەیی جە دژو ڕابەر ئاپۆی ئەرەیاۋنێوەش وەڵا کەرڎۆ. جە ئەرەیاۋناکەینە باس چانەی کریان کە ٢٦ ساڵۍ سەرو پیلانگێڵنی مېیاننەتەوەیرە ۋېیەردەنو وچیا: "جە ١٥و شوباتو ١٩٩٩یۆ جە زینانو ئیمراڵی جە کەسایەتی ئێژا ئۆجالانینە بەهاو یاسایی و مافەکا مرۆڤی پاشێلۍ مکریا.  جە سەیەو ئی حەقەتینەینە کاریگەرییەکۍ پیلانگێڵنی ئارۊیچ بە گرڎ شێوێوە بەردەواما".

ئەرەیاۋناکەی پی جۆرە بەردەوامبۍ: "ئا دەرفەتەی کە جەنگ و قەیرانەکا پەی گەلا بە ڕەوا موینا، ٢٦ ساڵۍ چېوەڵتەر جە کەسایەتی ڕابەر ئاپۆینە هەوڵشدا ئەوەکۊشای دیموکراسی، ئازادی و یەکسانی گەلا تاونۆوە. مۆدێرنیتەو سەرمایەداری کە پیلانگێڵنیش وست جابەجێ کەردەیۆ، جە لېوەتەرۆ جەنگی یەرەمی جەهانیش یاونا بە ئاستێوە تازە، جە لېوەتەریچۆ ئەوەگێڵای دیموکراتیکی کە چارەسەری پێشکەش بە ۋەرکۊتوو مېیامینی مکەرۆ، بە ئامانج گێرۆنە، بەڵام هێزە پیلانگێڵنەکۍ جە حیج ساتێوە پڕۆسەکەینە سەرۍ نەکۊتۍ. چونکی ئێژا ئۆجالان پەی ئانەی کێشەو کوردی چارەسەر بکەرۆ  جە ۋەرکۊتوو مېیامینی و ئۊروپانە کۊت گێڵای، چېرو گۆشەگیریی سەختینە کۊششەکێش پەی چارەسەری بەردەوامێنۍ و دوورگەو ئیمراڵیش کەرڎ بە مېڎانوو مڎرامانی. پی جۊرە ئێژا ئۆجالان هەڵوێستێوە تاریخیش ڕاوەبەر کەرڎ. ئی هەڵوێس و ئیرادە تەمامو پیلانگێڵنی مېیاننەتەوەیش هۊرشێونێوە.

ئارۆ جە بنەڕەتو گرڎو قەیرانەکا گلېرگەی، سیاسیەکا جە تورکیا، کوردەسان و ۋەرکۊتوو مېیامینینە پرسو کوردی یاگۍ گێرۆ. جە ۋەرا ۋەرو ئی حەقەتینەینە پېسە جە مۆدێلو ۋەرنیشتینە بەرگنۆ، کە پارادایم و فکرەکۍ ئێژا ئۆجالانی پەی قەیرانەکا مەبۆ بە نەخشەڕاو چارەسەری. پەنەوازا جە یاڎ نەکریۆ کە دەرفەتە سیاسییەکۍ کە نکۆڵی چی حەقەتینیە مکەرا، حەجگیز نمەتاوا جە بیەو ۋێشا بەردەوامۍ با. ئێژا ئۆجالان، بە پارادایمو گلېرگەی دیموکراتیکی، ژیۋای ئیکۆلۆژیکی و ژەنۍ ئازادۍ ڕاو ئەرەمەرزنایش ژیۋایۍ ئازادش نیشانەو گەلا دا. گەلاو ۋەرنیشتی کە گۊشا جە ئێژا ئۆجالانی گێرت، بە مڎرامانی بێهامتا، دەرفەتەکەو ئێژا ئۆجالانیشا وست جابەجێکەردەیۆ و شۆڕشو ژەنا ۋەرنیشتیشا پېسە مۆدێلێوە جە ژیۋای ئازادی گەلانە پێشکەش بە جەهانی کەرد. ژەنی کە جە شۆڕشو ژەنا ۋەرنیشتیوە هێز هۊرگېرا، فەلسەفەو 'ژەنی، ژیۋای، ئازادی' جە ۋەرکۊت تا هیندستان جە تەمامو جەهانینە جابەجی کریا و هێڵۊو ئەوەکۊشای گەردونی بنیاڎ نریا.

ئېژا ئۆجالان پېسە ئیرادەو چارەسەری، هەوڵمڎۆ کێشەو کوردی بە ڕاو دیموکراتیکی چارەسەر بکەرۆ، تورکیای دیموکراتیک بکەرۆ، هەرپاسە هەوڵمڎۆ پەی گەلی، ژەنا، شوناس و باوەڕییەکا ژیۋایۍ یەکسان و ئاشتیی ئەرەمەرزنۆ، هەرپۊکەی دیدارە کۍ ئارۆ چنی ئاڎیی ئەنجام مڎریا، مشۆم ئی پڕۆسە بە هەنگامەی پراکتیکیە وەڵێگنۆ.

مشۊم جە یاڎ نەکریۆ کە ئا چارەسەری و ئاشتییەی ئێژا ئۆجالان هەوڵمڎۆ جابەجێش بکەرۆ، ئەوەکۊشای ئەرەمەرزنای گلېرگە و تورکیایۍ دیموکراتیکیا. پۊکەی پەی ئانەی بناغەو گفتوگۊیۍ دیموکراتیکی بنریۆرە، پەنەوازا دەمودەس ئېژا ئۆجالان کە پەی ڕێککەوتەی ستراتیجی کوردی و تورکیای ڕەنجێوە گۊرە ڕاوەبەر مکەرۆ، ئازاڎ بکریۆ. جارێوەتەر واوەیش مکەرمېوە؛ ئېژا ئۆجالان بە نەخشەڕا و ئیرادەو چارەسەری پەی ئایندێوە ئازادی و دیموکراتیکی دەرفەتێوە تاریخیا. خاوەنداری ئی ئیرادەیە ۋەرپرسیاری و پیمەرێوە تاریخیا".