جە چەمپنەکۊتەیۍ تایبەتەنە چنی دکتۆر مەلا حەسەن گەرمیانی ئەنڎاموو ئەنجومەنوو وەڵین و پارێزگاو سەلاحەدینی و نوێنەروو خورماتوی، حەرپاسە نامبریا پێشمەرگەی قەڎیمی و کەسایەتیېوە دیاروو مەنتیقەو گەرمیانین، سەبارەڎ بە چن پرسێوە پېسە گۆشەگیری سەروو ڕابەروو گەلوو کورڎی ڕابەر ئۆجەلان، گرنگی کۆنفدڕاڵزمی دیموکراتی پۍ گەلا مەنتیقەکەی بەگرڎی و مەنتیقە کوردسانییەکا بەروو هەرێموو کوردسانی بەتایبەتی و هجومە بەردەوامەکا دەوڵەتوو ئەرەگیری تورکی پۍ سەروو گەلوو کوردی و خاک و کوردسانی، نامبریا پۍ ئاژانسوو هەواڵی فورات (ANF)ی دوا.

مشۊم خەبات کەرمۍ پۍ خۊتانکەرڎەی جە بەڕێز ئۆجەلانی

سەبارەڎ بە ڕابەروو گەلوو کوردی ڕابەر ئۆجەلانی و ئا گۆشەگیریەو سەریش، دکتۆر مەلا حەسەن گەرمیانی واتش: "پېسە ئانەی من بزان و بەڕێز ئۆجەلان چا وەختەیۊن کە ئینا زینڎانەنە تائیسە نزیکەو ١٣ هەزار لاپەرېش نۋیستەن، پۊکەی بەڕێز ئۆجەلان دلۍ زینڎانینە بۊ یان جبەروو زینڎانیۊ بۊ واریاتش هەن پۍ نەتەوەکەیش، جە ئیسەنە دەیان بیرمەندۍ جەهانیۍ خۊتانکەرڎەی جە ئۆجەلانی کەرا بەڵام وەشتەرا ئەگەر تەماموو نەتەوەکەیش خۊتانکەرڎەیش ۋنەکەرۊ پۊکەی مشۊم ئێمەیچ ڕووانە بەشێۋېوە سەرەمڕە خەبات کەرمۍ پۍ خۊتانکەرڎەی جە بەڕېز ئۆجەلانی، بەبڕواو من ئەگەر ئۆجەلان کورد نەبیۍ بە زانا و فەیلەسوفێوە گەورەو جەهانی ئشناسیۍ، بەڵام ۋەروو ئانەی کوردا پۊکەی ئینا زیندانەنە".

ئۆجەلان دیدگایۍ عالش هەن پۍ ئاینڎەو گەلاو ۋەرکەوتوو میامینی

حەرپاسە دکتۆر مەلا حەسەن سەرنجش وست سەروو گرنگی کۆنفیدڕالزمی دیموکراتی پۍ چارەسەری قۊرتەکا گەلا ۋەرکەوتوو میامینی بەگرڎی و مەنتیقە کوردسانییەکا بەروو هەرېموو کوردسانی بەتایبەتی و ئەرەیاۋناش: "فکری ئاپۆیی پېسە جە ۋەرنیشتوو کوردسانینە وینمېش گرنگی کۆنفیدڕالزمی دیموکراتی کریان بە سیستەم کە یۊن چا دیدگا و پەی لووایا کە پۍ تەماموو گەلا ۋەرکەوتوو میامینی بە ئیسفاڎەن، پۊکاتی ئا دیدگا پۍ گلېرگەی کوردەواری بەگرڎی و ئا مەنتیقۍ کە تێکەڵاوېنۍ جە ڕوو پێکئاماکاوە کە جە چن مەنتیقېوە ۋەرنیشتوو کوردسانی فرە پێکئامایی هەن فکری ئاپۆیی عالتەرین ڕانە پۍ ڕاوەبەردەی جە ۋەرکەوتوو میامینینە، جە پانیشتوو کوردسانیچ جە شەنگالۊ تا مەندەلی فرە پێکئامان پۊکەی دیدگاو بەڕێز ئۆجەلانی پۍ ئاینڎەو گەلاو ۋەرکەوتوو میامینی عالا".

چونکی کورد خەڵکی ڕەسەن و عەسڵزاڎەو مەنتیقەکەیا، تورک حۊڵ و کۆکوشیش مڎۊ

نامبریا باسش جە بەردەوامی هجوم و حۊلەکا دەوڵەتوو ئەرەگیری تورکی کەرڎ جە ئەسڕیەیۊ و جینۆساید کەرڎەی گەلوو کورڎی و ئاماژەش پانەی کەرڎ: "تورک ماوەو هەزار ساڵان ئامېنۍ ئی مەنتیقە، ۋەروو ئانەی ئا یاگۍ چنەش ئەرەنیشتېنۍ خاک و وڵاتوو ۋېشا نیا، پۊکەی بەردەوام خەڵکی ڕەسەنوو مەنتیقەکەی کۆکوش کەرا پۍ ئانەی کەس وەرهەڵستی نەکەرۊ چونکی ئاڎۍ جە مەنگۆلیاوە ئامېنۍ و خەڵکوو ئی خاک و وڵاتیە نیەنۍ و حیچ حەقېشا سەروو ئی خاکیۊ نیا، وەڵتەریچ جینۆسایدو ئەرمەنەکاشا کەرڎ و چەرکەس و لازەکېچشا کۆکوش کەرڎۍ، چونکی گەلوو کوردی خەڵکی ڕەسەنوو مەنتیقەکەینۍ ئیسە تورک حۊڵ و کۊکوشی کورڎی مڎۊ".

تورک حۊڵ و بنەبڕکەرڎەی کورڎی مڎۊ پۍ ئەرەگیرکەرڎەی خاکەکەیما

حەرپاسە جە درێژەو قسەکاشەنە سەبارەڎ بە هجومەکا دەوڵەتوو ئەرەگیری تورکیای پۍ سەروو خاکوو کوردسانی و ڕووبەڕووبیەیۊ ئەرەگیری، دکتۆر مەلا حەسەن گەرمیانی، واتش: " تاریخ سەلمنانش کە کورد کۆچش نەکەرڎەن پۍ ئی مەنتیقەیە و ئەرەنیشتەی ڕەسەنوو مەنتیقەکەین، پۊکەی تورک دوژمنێوە فرە هارو سەرسەختا گەرەکشا ئێمەی کوردی بنەبڕ کەرۊو پۍ ئانەی خاکەکەیما ئەرەگیرکەرۊ، پەنەوازەن گرڎ تاکێوە کوردی کۊششکاری  چەکڎارێوە بۊ بەچەکی بیروباوەڕی نەتەوەیی و خاک پەروەری و ووڵاتپارێزی".