دماو بانگەوازە تاریخییەکەو ڕابەر ئاپۆی ئەنداما شاندو ئیمراڵی دەم پارتی پەروین بوڵدانە و سری سوورەیا ئوندەر، چنی سەرۆککۆمارو ئاکەپەی ڕەجەب تەیب ئەردۆگان جە کۆشکەو سەرۆککۆماری گلێرۆبییەیشا ئەنجام دا.

پەرلەمانتارو ڕحای دەم پارتی دیلان کونت ئایان، پەی ئاژانسو هەواڵو فوراتی (ANF) قسێش کەردێ و ئی گلێرۆبییەیش پێسەو "هەنگامێوە گرنگێنێ بەڵام دێرا" هورش سەنگنێ. هەرپاسە ئاماژەشا پانەیشکەرد کە گلێرۆبییەو ڕاستەوخۆو سەرۆککۆماری چنی شاندەکەی هەنگامێوە گرنگەنە و ماچۆنە؛ حەرچنە گەشبینییێش وەشکەردەبۆ، بەڵام نیگەرانییەکێ هەڵای بەردەوامێنێ.

دیلان کونت جەختش چانەیە کەردۆ پەی ئانەی پڕۆسەو ئاشتی وەڵێ گنۆنە مشۆم هەلومەرجو ئەوەکۆشای ئازادی پەی ڕابەر ئاپۆی خوڵقیۆنە، زینانیێ نەوەشێ و سیاسیێ ئازادێ کریانە، دمای ئاردەی بە نییارەو قەیومی، جابەجێ کەردەو یاساو دیموکراتیکی و ئازادی و واتش: "ئینە تەنیا ئەرکو سیاسەتمەدارا نییا. مشۆم چەمەڕاو هیچ چێوێ نەبیمێ، وێما ڕێکوزیا بکەرمێ. پەنەوازا گرڏ کەسێ خاوەندارێتی جە پڕۆسەکەی بکەرۆ. مشۆم گرنگی ئی بانگەوازەیە پەی گرڏ کەسێ باس کریۆنە. مشۆم ڕێکوزیابییەی بە بنەما گیریۆنە."

جە دما دما و قسەکاشەنە دیلان کونتە ئاماژەش پانەیشدا پەی ئاشتیێ هەمیشەیی مشۆم گرڏو توێژەکا گلێرگەی بە هەستو وەرپرسیارێتیی تاریخییۆ هەڵوێس هورگێرا.