فازڵ شەنیاشار، کە ١٤/٦/ ٢٠١٨ جە ناوچەو پیرسوسو ڕحای پاسەوان و قەومو کەس و پەرلەمانتاری وەڵینو ئاکەپەی ئیبراهیم خەلیل یەڵدزیۆ تاتە و برێوەشا کوشت و برێوەتەرشا بێسەروشۆن کەرڎ و ۋێچش زامڎار کریا، دماو ٣ ڕوا ڕەوانەو زینانی کریا.

شەنیاشار بەمەڵامەتوو بەڵگەی غەڵەتیوە دێر ئازاڎکریا. ئیدارەو زینانی بە بەهانۍ ئانەیۆ کە شەنیاشار بەمەڵامەتوو دۆزێوە تەریۆ گیریان، پەیش مەتڵەب نەبۍ پرۆسەو ئازاڎکەردەیش دەس پنە بکەرۆ. جە ئاکامو کۆشش و پارێزنەراوە ئیسپات کریا کە شەنیاشار بەمەڵامەتوو دۆزێوە تەریۆ نەگیریان و پینەیچ پرۆسەو ئازادکەردەیش دەسش پنە کەرد.

"ئەنجامو ئەرەکۊشایما بەدەسئارڎ"

شەنیاشار جە زینانو جۆرو T ی ژمارە ٢ ۍ ئامەدینە ئازاڎکریا، جە لایەنو ئەمینە شەنیاشارۍ ئەڎێش و براکەیش پەرلەمانتارو دەم پارتی فەرید شەنیاشاری و چڼین کەساوە پێشوازیش ۋنە کریا. جە کاتو پێشوازیکەردەکەینە، ئەمینە شەنیاشارە پەی ماوێوە فرەی باوشیش کەردە کوڕەکەیشەرە و گرەوا.

پەرلەمانتارو دەم پارتی فەرید شەنیاشار ئاماژەش پانەی کەرد ئینە ٦ ساڵۍ و ٤ مانگێن براکەش بە ناهەق ئینا زینانەنە، واتش: "ئەڎام ٦ ساڵۍ و ٤ مانێنە ئەرەکۆشۆ. جە سەیەو ئەرەکۆشای ئەڎێمەنە براکەم ئازاڎکریا. ئەڎام یانەنە مەنۆوە، بەڵام ئەرەکۆشایش بەردەوام بۆنە. هەزاران کەسۍ پېسە براکەو من بە ناهەق ئینۍ زیڼانەنە. زیڼانە سیاسییەکۍ بە ناهەق گیریێنۍ. ئەرەکۊشایما پەی ئاڎیشایچ بەردەوام بۆنە".

فازڵ شەنیاشار واتش: "چا کەسا وەشۍ نمەبیمۍ کە بیۍ بە مەڵامەتوو گرەوای ئەڎێم. ئەرەکۆشایما بەردەوام بۆنە، سوپاسو گرڎو ئا کەسا مکەرمۍ تا ئیساتۍ چنیما بێنۍ".

دماتەر بنەیانەکە بەرەو پیرسوس کۆتۍ ڕا.