فیدراسیۊنو سەرانسەری پەنابەرا عێراقی، بە تنی هجوم و گەمارۊو سەرو کامپو مەخمووری شەرمەزار کەرۊ و ئەرەیاۋناش؛ کە پەنابەرەکۍ کریېنۍ بە کارتێوە سیاسی پۍ ڕازیکەرڎەو دڵو حکومەتی فاشیستی تورکی.
فیدراسیۊنو سەرانسەری پەنابەرا عێراقی، جەبارەو گەمارۊداى کامپو مەخمووری جەلایەنو سوپاو عێراقیوە جە ٢٠و ئی مانگېوە یاۋنەریېش ۋەڵاکەرڎۊ و چنەشەنە هجومەکا شەرمەزار کەرۊ.
جە یاۋنەریەکەنە ئامان، ٢٠ و ئایاری هێزێوە گۊرە جە سوپا و پۊلیسو عێراقی هجوم کەرانۍ سەرو کامپو گەشمەرڎە ڕۊسەم جودی – مەخموورنە، بە ئامانجو وەشکەرڎەو بورجی و دیواری و تەلبەن کەرڎەی کامپەکەی، بەڵام بەمەڵامەتو ڕەڎکەرڎەیشۊ جە لایەنو پەنابەرا کامپەکەیوە پۍ ماڕاو گەمارۊکەیشا، ۋېنیشاندای ئەنجام مڎا، جە ئاکامەنە پشېوی جە بەینو ئەرەنیشتا کامپەکەی و سوپا و پۊلیسی عێراقینە وەش بۊنە و ژمارېوە جە پەنابەرا کامپەکەی بەسەختی زامڎارۍ کریا.
فیدراسیۊنو سەرانسەری پەنابەرا عێراقی ئانەیچش وست ڕووە، ئی هەنگامۍ هێزە ئەمنییەکا عێراقی دژ بە خەڵکېوە مڎەنی و پەنابەرۍ، کە جە دەسو زوڵمی و سەرکوتکەرڎەی مافی وحکومەتی فاشیستی تورکیای هورئامېنۍ و ماوەی ٣٠ ساڵان ژیای و گوزەرانێوە کوولە مەرگی چی کامپەنە گوزەرنا، دژ بە گرڎ پیمەرە میان دەوڵەتیەکان جە بارەو مافەکا پەنابەراوە و ڕێزنەگرتەین جە مافو ژیای و پارێزنای جەستەیی ئا ئینسانا جە گرڎ دەسدرېژیېوە.
ئانەیچش باسکەرڎەن، سەرەڕاو ئانەی کە یوۋەمجار نییا پەنابەرۍ ئەرەنیشتۍ ئی کامپەیە وەرەن ڕوو هجومی و پەلامارۍ باوە، جە ماوەکا ۋیەرڎەیچەنە چنڎین جارۍ فڕۊکە جەنگیەکۍ تورکیای بۊمبۋاران و ئی کامپەیشا کەرڎەن و ژیای دەیان ئینساناشا چی کامپەنە وناڵین کەرڎەن، ئینە بېجگە جە هجومو داعشی جە دلېنە پۍ سەرو کەمپەکەی، تەنانەڎ ڕاگیری هێزەکا ئاسایشو حکومەتو هەریمی چانەی کە پەنابەرۍ ئی کامپەیە ئاماو لوای هۊلێری کەرا.
فیدراسیۊنو سەرانسەری پەنابەرا عێراقی ئاماژەش پا پاشێلکاریا کەرڎەن کە سەرو کامپو مەخمووری جابەجۍ کریا ڕۊشنشکەرڎۊ، کە بەشێوە فرەو ژیۋای و ژیای وگوزەرانیشا و پەیاکەرڎەو پێۋیسیەکا ئەرەنیشتا کامپو مەخمووری شارو هۊلێرینە پەیا کەریۊ ،تەئکیدش کەرڎۊ، ئی کرڎەوە نا ئینسانیۍ کە وەران ۋەر پی پەنابەرا کریا وەرو چەماو ڕێکوزیا و نەتەوەیۊگېرتەکاوە پۍ مافەکا پەنابەرا و یۆنامی و چەمڎآرا ناوەنڎە میان دەوڵەتیەکاوە ملۊ ڕاوە، بۍ ئانەی بەکردەوە گولانەتەرین وەرپرسیاریشا جە ۋېشانە نیشانە دابۊ و گېرە بۍ دەنگۍ بیېنۍ و ئیهمال کریان.
درێژەو یاۋنەریەکەو فیدراسیۊنو سەرانسەری پەنابەرا عێراقی-نە ئامان: ئێمە بە تنی سەرکۆنەکەرڎەی گەمارۊدای سەرو کامپو مەخموری بە بەڵگېوە ئاشکراش مزانمۍ، کە پەنابەرەکۍ کریېنۍ بە کارتێوە سیاسی پۍ ڕازیکەرڎەو دڵو حکومەتی فاشیستی تورکی و ئەجێنداکەیش.
هاموەخت داوایچش جە ڕێکوزیاو نەتەوە یۊگېرتەکا پۍ هەرمان و کارو پەنابەرا کەرڎەن، هەڵۋێسی وەرپرسیارانەو ۋېش نیشانە بڎۊ و پارېزناو ئەمنیەت و سڵامەتی ئی پەنابەرا گېرۊنە ئەستۊ و سنورېوە پۍ ئی دەسدرېژیا بنیۊرە، کە کریانە سەرو ژیای و ئەمنیەتو ئی پەنابەرا.
جە دمادماینە فیدراسیۊنو سەرانسەری پەنابەرا عێراقی بانگەواز مکەرۊ جە تەمامو ڕێکوزیا جەماوەری و مەڎەنی و پیشەیی و مرۊڤدۊسەکا و گرڎو ئا لایەنا، کە ۋېشا بە پەشتیوان و مافەکا مرۊڤی و مافەکا پەنابەرا مزانا ناڕەزایی ۋېشا وەران ۋەر پی کرڎەوە نامرۊڤانا حکومەتو عێراقی نیشانە بڎا.
هـ .ش
