بە مەڵامەتو کاریگەریی تۆڕە کۆمەڵایەتییەکا و وەشکەرڎەی چڼین قەیرانا جە لایەنو دەسەڵاتیوە، ڕۆ بە ڕۆ جە پانیشتوو کورڎەسانینە ۋەنایۆ کتێبی بەرەو پاشەکشە ملۆ، بەشێوە جە دەزگا ڕۆشنۋیرییەکایچ زیاتەر گرنگی پا کتێبا مڎا کە هۆرگێڵیێنۍ یاخود کەمتەر کاریگەریشا سەرو هۆوشیارکەردەیۆ گلێرگەی هەن، سەبارەت بە کولتوورو ۋەنایۆی، هەریۆ جە مامۆسایا؛ سامان محەمەد و هەرێم نەسرەدین پەی ئاژانسوو هەواڵوو فوراتی (ANF)ی قسێشا کەرڎۍ.

'گەلوو کورڎی خاوەن تاریخێوە پەڕ مڎرامانا، مشۆم ئاگاڎارۍ تاریخو ۋێما بیمۍ'

هەرێم نەسرەدین باسش چانەیە کەرڎ ۋەنایۆ گرنگ و بە ئەرزشا پەی ئینسانی، پەی ئاشنابیەی بە تاریخ و کەسایەتی ۋێش پەنەوازا ئینسان بوانۆوە، واتش: "ۋەنایۆ ویرو ئینسانی فراوان مکەرۆ، کاریگەری سەرو هزری وەش مکەرۆ پەی ۋێبیەی و ۋۍ ڕەخنەکەردەی پەی وەڵێکۊتەی.

گرڎ گەلێوە خاوەن تاریخێوە تایبەت بە ۋێشا، نمەبۆ جە تاریخی بێخەبەرۍ بیمۍ و پەنەوازا بوانمێشۆ بە تایبە ئێمەی گەلوو کوردی خاوەنو تاریخێوە پەڕ شکۆمەنڎی و سەروەری و ئەرەکۊشاینمۍ، هەرپۊکەی پەنەوازا ئاگاڎارۍ تاریخو گەلەکەو ۋێما بیمۍ."

'پەی چارەسەری گرڎ گرفتێوە پەنەوازما بە ۋەنایۆ هەن'

جە دما دمایی قسەکاشەنە هەرێم نەسرەدین باسو ئانەیچش کەرڎ کە گرنگا جە گرڎو بوارەکانە ئینسان بوانۆوە، خۆنکارا زانشتگەی و پەیمانگاکا مشۆم گرنگی بە ۋەنایۆ بڎا و واتش: "پەی ئانەی گرفتەکۍ ڕۆی و ئا ڕووەدایۍ ڕووانە ڕووە مڎا کاریگەری خراپما سەر جیانازا مشۆم بوانمێوە پەی ئانەی هۊرسەنگنای بکەرمۍ و گرفتەکایچ چارەسەر بکەرمۍ."

'پەی ئانەی ئاگاڎارۍ تاریخی و ئەدەبیاتو ۋێما بیمۍ پەنەوازما بە ۋەنایۆ هەن'

دماتەر سامان محەمەد باسش چانەیە کەرڎ کە پەی ئاگاڎاربیەی جە تاریخو گەلوو کورڎی و گەلا تەری ئانەی پەنەوازمانە کتێبا و ۋەنایۆین پەی هوشیاری و ئاگاڎاربیەی جە ئەدەبیاتو ۋێچما، واتش: "نمەکریۆ گەلێوە ئاگاڎارو تاریخ و ئەدەبیاتو ۋێش نەبۆ.

پەی ئانەی ئاگاڎارو تاریخ و ئەدەبیاتی بیمۍ مشۆم جە ڕاو کتێبیوە پبیاومێش پنە، پەی ئانەی ئاشناو تاریخی و ئەدەبیاتو ۋێما بیمۍ. پۊکەی فرە پەنەوازما بە ۋەنایۆ هەن پەی وەڵێکۊتەی، پۊکەی هیواڎارەنا تاکەکاو گلێرگەی گرنگی بە کتێبی و ۋەنایۆ بڎا."

'نمەکریۆ مامۆسا بی و کتێب نەوانیۆ'

جە دمادمایی قسەکاشەنە سامان محەمەد ئاماژەش پانەیە کەرڎ نمەکریۆ مامۆسا نەوانۆوە، جە کاتێنە مامۆسا ئەرکش فێرکەردەی و پەروەردەکەردەین گەر نەوانۆوە چنی متاوۆ خۊنکارەکاش فێربکەرۆ، واتش: "نمەکریۆ مامۆسا بی و گرنگی بە بوارەکەو ۋێت نەڎەی و سەرش نەوانیۆ، هەر مامۆسێوە جە هەر بوارێنە بۆ پەنەوازش بە ۋەنەیۆ هەن پەی شارەزابیەی جە بوارەکەو ۋێشەنە.

جە ئیساتێنە کە سەردەمو وەڵېکۊتەی و تەکنەلۆجیایا ئاسانکاری فرە کریان پەی مامۆسایا پەی ئانەی زیاتەر ۋێشا وەڵۍ وزا جە بوارو ۋێشانە. هەرپۆکەی ڕەوا نییا مامۆسۍ نە ۋاناوە و گرنگی بە کتێبی نەڎا."