ئا گرژییەی کە ٢٢ۍ نیسانی جە بەینو پاکستان و هیندستانینە دەسش پنە کەرد، جە ٦ و ئایاریوە بە هرووژمەکا هەردووەلای بەردەواما. پاکستان ئەرەیاۋناش جە سەعاتەکا سەرسەعبو ئارۊینە هیندستان یەرۍ هرووژمۍ مووشەکیێش کەردێنۍ و ئی هرووژمۍ پەی سەرو بنکە سەروازییەکا پوچۍ کریێنێوە. پاکستان ئەرەیاۋناش پېسە جوابێوە پەی ئی هرووژما، هرووژمش کەرڎەن سەرو ٤ فڕگەخانا هیندستانی.

"ژمارێوە فڕۆکۍ بێ‌فڕۆکەوانۍ وزیێنێرە واری"

سوپاو هیندستانی ئەرەیاۋناش هرووژمو فڕۆکە بێ‌فڕۆکەوانەکا پاکستانی گرژییەکێشا زیاتەر کەردێنۍ. وەزارەتو وەرگیریی هیندستانی هېزی ئەرەیاۋناش کە پاکستان بە فڕۆکەی بێ‌فڕۆکەوانی تورکی هرووژمش کەردەن. جە ئەرەیاۋناکەو ئارۊیشەنە تەئکیدش کەردەنۆ کە ژمارێوە فڕۆکۍ بێ‌فڕۆکەوانۍ وزیێنێرە واری.

لوجنەو چەکی ئەتۆمی گلېربۆو

ۋەروئانەی هەردووە وڵاتەکە هێزۍ ئەتۆمیینۍ، نیگەرانییەکۍ زیاتەرۍ بیێنۍ. ئاماژەو جەنگی ئەتۆمیی‌ جە لاو پاکستانیوە بەرکۊت. وەزیرو وەرگیری پاکستانی ئەرەیاۋناش کە لوجنەو باڵاو بەکارئاوردەی چەکی ئەتۆمی (دەسەڵاتو فەرماندەیی نیشتیمانی) گلېربۆوە. جە ئەرەیاۋناکەو سوپێنە ئامان کە ئارۊ گلېرۊبیەکەی سەرو داواو سەرۆکوەزیرانو پاکستانی شەهباز شەریفی ئەنجام مڎریۆ.