پەروین بوڵدانە ئاماژەش پانەی کەرد کە چنی ئەرەیاۋناکەو پەکەکەی، شایەتحاڵۍ ڕوێوە تاریخینۍ و واتش: "پەنەوازا گرڎ ڕووە بکەرم ئاشتی، بەبێ گۊشدای پانەی کێ چێشش کەرڎەن و کێ چێشش بەخشان، مشۊم گرڎ کەسۍ جە دڵو ۋېشەنە هەست بە ئاشتی بکەرۊ".
دماو بانگەوازە تاریخیەکەو ڕابەر ئاپۆی جە ٢٧ و شوباتینە، پەکەکە ئەرەیاۋناش کە جە مابەینو ٥-٧ و ئایارینە دوانزەهەمین کۆنگرەو ۋێش بینان، جە ڕوانی ئایندەنە، وردەکارییەکۍ کۆنگرەکەی و "قەرارە تاریخیەکا" پەی ڕای گرڎینی ئاشکرا مکەرۆ.
ئەندامەو شاندو ئیمراڵیی پەروین بوڵدانە چی بارۆ قسێش پەی ئاژانسوو هەواڵوو فوراتی (ANF)ی کەرڎۍ، سوپاسو کۊشش و ڕەنجو گرڎ لێوەش کەرد، بەتایبەت کۊششەکۍ سری سورەیا ئۆندەری، واتش: "وەشڵەی ئاڎیچ شایەتحاڵو ئی کاتا بیۍ. بەڵام داخەم نمەشۆ سری سورەیا ئۆندەر جە دمادماینو ڕێکێنە کۆچی دماینش کەرد. عال مزانو کە ئاڎیچ ئیساتۍ هەست پی چێوا مکەرۆ".
"خودو ئەرەیاۋناکەی تاریخیا و سەرکۊتەیێن"
پەروین بوڵدانە ئاماژەش پانەیە کەرد کە چنی ئەرەیاۋناکەو پەکەکەی، شایەتحاڵۍ ڕوێوە تاریخینۍ، واتش: "چونکی جە جوگرافیێوەنە کە عەیامېوەن ئێش چەشۆ، قوربانی دریان و ئەڎایا هەڵسیشا متێنۍ، ئیساتۍ پرۆسێوە ئاشتی و ئارامی دەس پنە مکەرۆ. خودو ئەرەیاۋناکەو پەکەکەی گرنگ و تاریخیا. هامکات ۋێش جە ۋێشەنە سەرکۊتەیێن. چونکەی جە گرڎو دیدارەکا ئیمراڵینە، ئېژا ئۆجالان هەمیشە جەختش کەردەنۆ کە مشۊم ئیتر ئی سەردەمە فاڕیۆ پەی سەردەمێوە تەری، سەردەمو دیموکراتیکبیەی دەس پنە بکەرۆ، جەنگ دمایش بۍ. ئیساتۍ ئەنجامو ئینەیما بەدەسئارڎ. بەدیئاوردەی ئاشتی و دیموکراتیکبیەی پەی گرڎیما گرنگا. پۊکەی پەنەوازا گرڎ ڕووە بکەرم ئاشتی، بەبێ گۊشدای پانەی کێ چێشش کەرڎەن و کێ چێشش بەخشان، مشۊم گرڎ کەسۍ جە دڵو ۋېشەنە هەست بە ئاشتی بکەرۊ. باوەڕیمان پی سەردەم و پرۆسەیە هەن. مزانمۍ و باوەڕیما چامنەن، ئی سەردەمە ئاشتیێوە گۊرەش پەی تورکیای ئارڎەن و بەردەوامیچ بۆ. پۊکەی ئی سەردەمەیە پېسە سەردەمێوە تاریخی پێناسە مکەرو".
"پەنەوازا گرڎ کەسۍ هەرمانە بکەرۊ پەی بەکۆمەڵایەتیکەردەیۆ ئی پرۆسەیە"
پەروین بوڵدانە جەختش کەرڎۆ، مشۊم گرڎ کەسۍ هەنگامە پەی ئاشتی و دیموکراتیکبیەی بنیۆ و کێشەو نەبیەی متمانەی دمایش بۍ، واتش: "پەنەوازا گرڎ کەسۍ دەورو ئاشتیرە کوۍ باوە و هەرمانە پەی بەکۆمەڵایەتیکەردەیۆ پرۆسەکەی بکەرا. چیولای گرڎ هەنگامېوە پەی دیموکراتیکبیەی، ۋێش جە ۋێشەنە سەرکۊتەیێن. پەیلوایم چامنەن، ئا ئەڎۍ کە ڕۆڵەکێشا جە دەسدێنۍ و ٤٠ ساڵېن ئینۍ دلۍ ئێش و ڕێشینە، جە گرڎ لێوە زیاتەر پی سەرکۊتەیە دڵوەشۍ با. پەی گرڎیما بۆ بە مایۍ خێر و وەشی. هیواڎارەنا و پەیلوایم چامنەن، ئی جوگرافیا کە ۋنی فرێش چنە مجیێنە و ئێشی فرەش چنە وینیان، وەهار و ڕوانێوە وەش بە وێشۆ موینۆ".
