شارو کۆڵنو ئەڵمانیای جە کەسایەتی هۆزان مزگین، هۆزان سەفکان، تاتە و تەیاری و ئایسەل دۆغان سیاسەتمەدارێ شۆڕشگێڵی جە مەراسیمێوەنە جەلایەنو تەڤ-چاندی و هونەرو مزگینی بەڕێزدارییۆ یاڏشا کریاوە.
تەڤگەرو چاندی و هونەری ئەوروپای (تەڤ-چاند) و هونەری مزگین، جە شارو کۆڵن و ئەڵمانیاینە جە هۆڵو کولتوربونکەرە، جە کەسایەتی هونەرمەندی و فەرماندەی گەریلا هۆزان مزگین (غوربەت ئایدین) کە جە ١١و ئایارینە جە تەتوانەنە گەشمەرڏە بی، یاڏو هۆزان سەفکان (جەلال ئەرجان)، تاتەو تەیاری (جومعە خەلیل)، ئایسەل دۆغان ئەندامو گرووپو ئاشتی و کادێرا گەشمەرڏە و تەڤگەرو چاندی و هونەر بە ڕێزدارییۆ یاڏشا کریاوە.
جە مەراسیمو یاڏکەردەوەکەینە وێنەو هونەرمەندە گەشمەرڏەکا کە جە مانگەو ئایارینە گەشمەرڏێ بیی نریارە، هەرپاسە دەفتەرێوە یاڏەوەری جە هۆڵەکەنە نریارە هەرکەسێ یاڏەوەرییەکا وێش دلێنە تۆمار کەرێ. نوێنەرو ڕێکوزیا دیموکراتیکە کوردییەکا ئەڵمانیای، هونەرمەندا تەڤگەرو چاندی و هونەرو ئەوروپای و کەسێ فرێ جە کوردا دەوروبەری جە ڕێوڕەسمی یاڏکەردەوەکەینە بەشداریشا کەرد. مەراسیمەکە بە دەقێوە بێدەنگی و واتەیۆ سروودو "ئەی ڕەقیب" ی لوا ڕاوە.
دماتەر هونەرمەند بەرماڵ چەم وتارێوەش پێشکەش کەردە و ئەرەیاوناش: هونەرو هۆزان مزگینی هامکاتەنە ژیوای گەریلایەتی نمونێوەن پەی نەوەکا ئایندەی.
چی مەراسیمەنە فیلمێوە دوکومێنتار سەرو ژیواو هۆزان مزگینی پەخش کریا. دماتەر هونەرمەند گولێ مایەرا هونەرو وێش پێشکەش کەرد. هەرپاسە بە گۆرانیەکا سەرحەد چارنەوای، دەنیز دەمان و گۆرانییەکێ هۆزان سەرحەدی مەراسیمەکەنە بەردەوامێ بێنێ.
بە نامێ تەڤگەرو چاندی و هونەرو ئەوروپایۆ خەمگین بیرهات وتارێوەش پێشکەش کەردە و باسش جە ئەوەکۆشای هونەریەکا هۆزان مزگینی و هۆزان سەفکانی کەرد جە ئەوروپانە.
مەراسیمو یاڏکەردەوەکەی بە گۆرانییەکا خەمگین بیرهاتی و خەلیل خەمگینی و واتەیۆ دروشمو "گەشمەرڏە مەمرۆنە" دمایش ئاما.
