وریشە مورادییە زینانیەی سیاسیەو کوردی کە سزاو جە قەنارەدایش سەرەرە سەپیان جە نامێوەنە پەی ساڵیاڎو جە قەنارەدای مامۆسا فەرزاد کەمانگەری، پېسە هېماو مڎرامانی و حەقیقەتی بەنامۍ کەرڎ و جەختش سەرو درێژەپنەدای ڕێبازەکەیش کەردەنۆ.
وریشە مورادییە زینانیەی سیاسیەو کوردی کە سزاو جە قەنارەدایش سەرەرە سەپیان، جە زینانو ئەوینیۋە بۊنەو ١٥ـەهەمین ساڵیاڎو جە قەنارەدای فەرزاد کەمانگەری، شیرین عەلەمهولیۍ، عەلی حەیدەریانی، فەرهاد وەکیلی و مەهدی ئیسلامیانی کە جە ٩و ئایارو ٢٠١٠ ینە جە لایەنو دۊڵەتو ئێرانیوە جە قەنارە دریۍ، نامێوەش پەی مامۆسای ئازادیوازی فەرزاد کەمانگەری وەڵا کەرڎۆ. ئی نامە کە پەڕا جە هەست، ئێش و هیوایا، یاڎەوەری مڎرامانی و کۆڵنەڎای چالاکا سیاسی و مەدەنییا جە ۋەرا ۋەرو ستەم و سەرکوتکارییەکا دەسەڵاتینە. وریشە مورادییە چی نامەنە، فەرزاد کەمانگەری نەک هەر پېسە مامۆسێوە بەڵکم بە ڕێباز و دەنگێوە ناڕازی جە تاریخەنە وەسفش مکەرۆ و ۋێش بە درێژە پنەدەرو هەمان ڕێبازو مامۆسا فەرزادی و گەشمەرڎا تەرو ڕاو ئازادی مزانۆ.
وریشە مورادییە چی نامەنە ئاماژە بە ئاژەی قورسو زینانی و هەڕەشۍ جە قەنارەدای مکەرۆ و جەخت چانەی مکەرۊوە کە بە بێ حیچ تەرسێوە، ئاماڎێنە بۊنەو حەقیقەتی و ڕاسیۆ باجەکەش چێش بۆ بڎۆش. هامکات وریشە داوا جە گلېرگەی مکەرۆ درێژە بە ڕێبازو گەشمەرڎا بڎا و پەی دادپەروەری و ئازادی ئەوەکۊشایشا بەرز بکەراوە.
دەقو نامەکەو وریشە مورادیۍ پەی مامۆسای ئازادیوازی گەشمەرڎە فەرزاد کەمانگەری:
"سڵام فەرزاد...
تۆ ئیتر تەنیا نامێوە نیەنی، تۆ ڕێوە و ڕۊشنایێوەنی ۋەرا ۋەر بە تاریکی تۆ هاوارێوەنە جە دژو بێدەنگی تاریخی.
من تۆم بە چەمۍ نەدیەنی، بەڵکم بە ڕۆحم وینانیم؛
من تۆم جە پەڕەو دەسنوویسەکانە جە دەگانە وینان،
جە هەڵسەو چەما ئا زاوڵانە کە تاتەشا جە کەشەکانە نەگێڵێوە...
من تۆم جە هاوارو بێدەنگی ئەڎێوەنە کە زوانەکەش چنە قەڎەغە کریابۍ، ئشناسانۆ.
من وەڵتەر قەد تۆم نە دیەبۍ، بەڵام پېسەنە سەڎان ساڵۍ چنیم بی، پېسە ڕاسی، پېسە ئێشی، مشناسوت.
ئانۍ دارو قەنارەیشا پەی نیایرە... نەزانێنۍ کە دار و قەنارە نمەتاوۆ دەنگ و قامەتو کەسێوە بماڕۊ کە رووەش جە ئاسۆینە.
ئەرجیێشا دلېتەنە بەرا
بەڵام چانەی بێ هەڎەرۍ بێنۍ کە تۆ جە هەمان سەرسەعبەنە جە ئەڎۍ بیەی؛
جە ئەوجەو بێدەنگینە بیەی بە هاوار و جە ۋەرا ۋەرو مەرگینە جارێوەتەر جە ئەڎۍ بییەیۆ.
فەرزاد، تۆ تەنیا مامۆسێوە نەبێنی، تۆ سەردەمو مەردەکانە فەلسەفەو ژیۋاینی.
تۆ جووەو ڕووبارێوە سەمەد بێهرەنگینی؛ جە خاکی تەژنەو زاوڵاوە کۊتەنی ڕا.
تۆ جە سەردەمو ناڕەوایەتینە جە وڵاتێنە کە قسەکەردەی قەڎەغە بۍ، هېماو ڕاستواچی و هەیکەلو هیوای بێنی.
تۆ گەرەکت بۍ خەیاڵەکا جە تەختەسیاوو سەرو دیوارو ۋەننگەیۆ، سەرو دیوارو حەقێقەتیۆ هۊرواسی؛
ئا وەرم و خەیاڵۍ جە هەژارییوە سەرشا هۊردابۍ،
بەڵام شکۆشا جە گرڎو کۆشکەکانە زیاتەر بۍ.
ئا کەسەی ۋنەپەرسایش جە تۆ کەردەبۍ پەی لاو منشا کیاستەبۍ
واتش ئاڎیچ: (فەرزاد) هەر چێنە نیشتەبێرە. نەتاواش بەردەوام بۆ و...
منیچ واتم: ئاڎ تاواش جە مەردەی نەمری وەش بکەرۆ.
جە ئەوجەو بێدەنگیوە هاوارێوە بکەرۆ.
جە پۆلەکاوە ئەرەپڕایۍ خوڵقنۆ.
من ئینانا بەردەوامی ڕاو تۊنە فەرزاد. درێژەپنەدەرەو شیرینەو عەلەمهولی، ژەنێوە کە عاشقەو ژیۋای، زۋانو ئەڎۍ و ئازادی تاوانەکا ئاڎۍ بۍ؛ جە قەنارە دریا. بەڵام نامۍ ۋێش پەی هەمیشەی سەرو کەشی و وای و وشەکانە بە زیڼەیی ئاستۆ.
بەردەوامی ڕاو فەرهادێوەنا کە جە مەردەی نەتەرسا چونکی حەقیقەتش جە باوشی گێرتەبۍ.
بەردەوامی دەرەو ڕێبازو عەلی حەیدەریانینا کە دڵش چنی کەشەکا زاگرۆسی ژیۋۍ.
هەرپاسە مەهدی ئیسلامیان،
کە قەد بێدەنگیش هۊرنەچنی و تا دما ساتەکا ژیۋایش سەرو حەقێقەتی و راسی بەردەوام بی.
بەردەوامی ڕێبازو گرڎو ئانیشانا کە باوشیشا پەی مەردەی کەردۆ هەتا ئێمە بتاومۍ مڎرامان بکەرمۍ.
ئێمەیچ هەرپاسە مردێنمۍ و مڎرامان مکەرمۍ.
حەرچنە دەسەکێما بینیێنۍ، بەڵام دەنگما جە گرڎ کاتێ بەرزتەرا.
گرڎ ڕوۍ، بە دایوەنەی نکۆڵی جە حەقێقەتی مکەرا؛ گرڎ سەعبۍ قسەکاما جە دادگاو نادادپەروەرینە ڕووبەڕوو سزۍ مکەراوە،
بەڵام ئێمە چنی هەر زامێوە مەعنێوە تازە خوڵقنمۍ...
چنی هەر بێ ڕێزی کەردەیێنە، دیسان هۊرمێزمێوە و چنی هەر خنیکیایۍ و بێدەنگ کەردەیێنە هەناسێوە تازەو ئازادی هۊرلوشمۍ.
فەرزاد،
تۆ ئیتر تەنیا نامێوە نیەنی. تۆ دارێوەنی کە هەر لقێت، مامۆسێوە، هۊنیەر یان شۆڕشگێڕێوەن.
منیچ ئارۆ جە هەمان یاگەنە مردانا کە تۆ چنەش مردابێنی.
ئاڎۍ پەی منیچ دارو قەنارەیشا هۊرواستەن. بەڵام حیچ تەرسێوەم نییەنە.
چونکی ئانەی هۊرگیرو حەقێقەتی بۆ، جە مېڎانو جەنگینە، تەنیا مڎرامان مزانۆ،
ئەر مەردەی سزاو هۊرگېرتەی حەقێقەتی بۆ، منیچ ئاماڎێنا باجەکەش حەرچی بۆ بڎەوش.
ئێمە پەی مڎرامانی جە ئەڎۍ بیێنمۍ نەک بڕەمای. ئی ڕێچە ڕاو لوای و دلېنە شیەی نییا...
بەڵكم ڕاو هۊرئێستەیۆن.
تا دما وشە، تا دما ڕۆڵە، تا دما کەش پېسە چنی زاگرۆس بەرز وبەهێز مردان...
ڕاکێت بەردەوامیش بۆ، مامۆساکەم، جە دەنگو ئێمەنە، جە هەنگامە بەهێزەکامانە کە سەرو زەمینیرە منیەیمێشارە، چا دڵانە کە هەڵای پەی ئازادی مڎاوەنە، ڕاکێت بەردەوامەنە مامۆساکەم حەتا سەرکۊتەی.
"جە قەنارەدای نمەتاوۆ بماڕۊما؛ بەڵکم ڕێخەکاما ئاڼنەیتەر جە قووڵایی زەمینیرە چەقنۆ."
وریشە مورادییە _ زینانیەی سیاسیە چېرو سزاو جە قەنارەداینە جە زینانو ژەنا زینانو ئەوینینە.
