پاڕێزنەرە پاولا مارتین پۆنزە ناڕەزاییش ۋەران ۋەر بە گۆشەگیرکەرڎەی ڕابەروو گەلوو کورڎی عەبدوڵا ئۆجالانی نیشانەدا و ئەرەیاۋناش، کە گۆشەگیرییەکە سزادای گەلوو کوردین.

پاولا مارتین پۆنزە سەبارەڎ بە مژارەکەی قسېش پۍ ئاژانسوو هەواڵی فوراتی کەرڎۍ و واتش، "گۆشەگیری شکڵ و شېۋۍ ستەمکارانەن کە حکومەت پۍ سزادای و ئېشپنەیاونای زینڎانیېوە بەکارش مارۊ. گۆشەگیری ئەشکەنجەن".

پاڕێزنەرە پاولا مارتین پۆنزە ۋیرش ئارڎۊ کە ڕابەروو گەلوو کورڎی عەبدوڵا ئۆجالان ٢٤ ساڵی ویەرڎە دلۍ گۆشەگیرینە بیەن و واتش، " ئا ئاژەی ئیناش چنە، بە شێۋېوە ڕۊشن و وەرچەم حۊلېوەن پۍ دلېنەبەرڎەی مافە سەرەتایی و مافەکا مرۆڤی. بەڕێز ئۆجالان جە ١٥و شوبات و ١٩٩٩ی بەدماوە جە زینڎانوو ئیمراڵینە ئینا ژوورێوە تاکەکەسینە. جە ساڵەو ٢٠١٤یۊ تەنیا ٥ جارۍ ڕا دریان کە خانەواڎەکەش بۋینۊش. دمایین جار جە ئاداروو ٢٠٢٠ ی رووبەڕوو براکەش دیەن. جە ٢٥و ئادارو ٢٠٢١ ینە ڕا دریابۍ کە بە تەلەفون قسۍ کەرۊ، چا وەختۊ دەرفەت نەڎریان پەیوەندیش پۊوە کریۊ. تەنیا ئەگەر ئینسان تەماشەو ئینیشا کەرۊ مۋینۊ کە مافە سەرەتاییەکۍ عەبدوڵا ئۆجالانی پاشێلکریېنۍ. سەرەڕاو ئانەیچ مشۊم ئینسان کاریگەری ستەمکارانە، دژوو مرۆڤایەتی و سوکایەتیپنەکەرڎەکاش ئی مامەڵەیە ۋەران ۋەر بە عەبدوڵا ئۆجالانی جە یاڎ نەکەرا.

واتیچش: مەبۊ جە ۋیر کریۊ، کە حەر حۊڵېوە پۍ سووکایەتیکەرڎەی بە زینڎانیېوە، هاموەختا چنی سزادای خانەواڎە و لایەنگراش. پېسە جە نموونەو عەبدوڵا ئۆجالانیچەنە ۋینیۊ، سزادای گەلوو کوردین.

پاڕێزنەرە پاولا مارتین پۆنزە واتیچش: جە ١٢ ساڵی یۋەمەنە مافوو دیڎاروو پارێزنەرا چنی عەبدوڵا ئۆجالانی جە حەفتېوەنە تەنیا سەعاتۍ بیەن، بەڵام ئا مافیچە بە بەردەوامی ڕاگیریش ۋنەکریان و واتش: "ئەگەر مافوو دیڎاری شمە چنی تیمە یاساییەکەیتا ڕاگیریش ۋنەکریۊ، شمە مەتاودۍ بەشێۋەوە داڎپەروەرانە وەرگیری جە ۋېتا کەرڎۍ. بەڵام جە بەینوو ساڵان و ٢٠١١ پۍ ٢٠١٩ی تەنیا ٥ جارۍ دیڎارش چنی پارێزنەرا ئەنجامدان و جە ساڵەو ٢٠١٩یچۊ حیچ دیڎارێوە چنی پارێزنەراش ئەنجام نەڎریان، داواکارییېوە فرە بە مەبەسوو دیڎاری یان ڕەڎکریېنێوە یان بۍ جواب مەنېنۍ، ئینەیچ پا مانېنە کە نەتەنیا مافوو وەرگریکەرڎەی یاسایی پاشێل کریۊ، جە ھەمان وەختەنە ڕا مەڎریۊ جەبارەو ئاژەو بەڕێز عەبدوڵا ئۆجالانی و کەسا تەروو دلۍ زینڎانەکەیۊ زانیاری هۊرگیریۊ، پېسە مافێوە مرۆڤی مشۊم قبوڵ کریۊ، وەختۍ کەسێوە ئینا زینڎانەنە، بتاوۊ پارێزنەرێوەش بۊ، بتاوۊ بە ئاسانی دەسش بە پارێزنەر و بەڵگەنامەکا پەیوەس بە دۆسیەکەی بیاوۊ، بتاوۊ گفتوکۆ و نیشتەیرەی چنی ئیدارە و کاربەدەسا زینڎانی کەرۊ، مافوو سەردایۍ بەردەوامی و رێکوپێکیش بۊ. ئانەیچ پۍ ۋەرگری و داڎگاییکەرڎەیۍ داڎپەروەرانەی پەنەوازا".