محەممەد شیرین گوندوز، هامسەرۆکو ڕێکوستەی شارو ئامەدی جە پارتو هەرێمە دیموکراتیکەکا (دەبەپە)ی ئەرەیاۋناش، داواکاریی ئازاڎی و ئەرەنیشتەیما جە شارو ئامادیوە بە گرڎو جەهانی ئەرەیاۋنمۍ."
محەممەد شیرین گوندوز، هامسەرۆکو پارێزگاو ئامەدی ئەرەیاۋناش، دۆڵەتو تورکی بە سەپنای سیاسەتو گۆشەگیری تاوانە ئەنجام مڎۆ، بە ۋەروچەما گێرتەی ئاژەو گۆشەگیری، کە هیچ بنەمێوە مرۆیی و یاساییش نیی و جە هیچ کۆو دنیێنە کارێ پا جۆرە نەکریان. ئاماژەش پانەیچ دا کە ئا قەیرانۍ کە بەشێوێوە جددیی کاریگەرییشا سەرو گلېرگەی وەش کەرڎەن، پېسە قەیرانو ئابووری، تاڵانکاری ژیۋگەیی و سیاسەتو جەنگی، گرڎ دەرەنجامو گۆشەگیرییا و جەختش چانەی کەرڎۆ کە چارەسەری بە هۆرگێرتەی گۆشەگیری مکریۆ.
ماوەو ٤٢ مانگان هیچ زانیاریێوە سەرو ئاژەو ڕابەر عەبدوڵا ئۆجالانی ۋەردەس نییا، کە زیاتەر جە ٢٥ ساڵان جە زیڼانو ئەمنی باڵاو ئیمرالینە بە بارمتە گیریان. هەرپاسە هەڵمەتەو "ئازاڎیی پەی عەبدوڵا ئۆجالانی، چارەسەری دیموکراتیکی پەی پەرسو کوردی" کە جە ١٠و تشرینو یووەمو ٢٠٢٣ دەسشپنەکەرڎ، یاوان بە قۆناغۍ تازە، چنی ئانەیچ پلاتفۆرمو دامودەزگا دیموکراتیکەکا ڕۆو ١٢و ئەیلولی جە ئەستەنبوڵ و ئامەدەنە بەیاننامێوەش وەڵا کەرڎۆ و ئەرەیاۋناش، جە ١٣و تشرینو یووەمی گلېرۆبیەیۍ گۆرە بە دروشمەو "ڕووبەڕوو پیلانگێڵنی بیمێوە و ئامەدەنە پەی ئازادی کوۍ بیمێوە" ڕێکوزا. هەرپاسە ئاماڎەکارییەکۍ پەی گلێرۆبیەکەی جە شارەکا تورکیای و کورڎەسانینە درێژەشا هەن. محەمەد شیرین گوندوز، سەرو وردەکاری چالاکییەکا پەی ئاژانسوو هەواڵوو فوراتی قسێش کەرڎۍ.
گۆشەگیری سەپیا سەرو گرڎو بوارەکا ژیۋایرە سەپیان
گوندوز بە ئاماژەدای پانەی کە کاریگەرییەکۍ گۆشەگیری سەرو بەشەکا تەری وەش بیەن، واتش: "ئارۆ گۆشەگیری نەک تەنیا جە ئیمراڵی، بەڵکم جە گرڎ بوارەکا ژیۋاینە سەرو کورڎەسانی و کوردی چڕتەر بیەنۆ. جەکەسایەتی بەڕێز ئۆجالانینە گەلێوە گۆشەگیر مکریۆ. سیاسەتو ١٠٠ ساڵەو دلێنەبەردەی و تاونایۆیش عەقڵییەتو دۆڵەتی پېسە سیاسەتو جەنگی تایبەتی جە دژو کوردی بەردەوامیش هەن. هەر پۊکەی ئێمە ئی گۆشە گیرییە تەنیا پێوەس بە کەسێوە یان زیندانێوەش نمەزانمۍ، بەڵکم پەرسو گلێرگێوە و گەلێوەن. جیا چانەیچ هیچ بنەمایۍ یاساییش نییا. ئینەیچ دەرەنجامو ڕوانگێوە تەمام سیاسی و دوژمن کارانەن. بەردەوامی ئی گۆشەگیرییە ئارۆنە جە سەرانسەرو جوگرافیاو ئێمە و گرڎو ۋەرکۆتوو مېیامینینە کاریگەری نەرێنیش چەنە گنۆوە. ئا گۆشەگیرییەی سەرو بەڕێز ئۆجالانیرە سەپیۆنە جە هیچ کۆو جەهانینە نموونێوە پا جۆرە بیەیش نەبیەن.
گوندوز جە درێژەو قسەکاشەنە جەختش چانەی کەرڎۆ کە ئا قەیرانۍ کە کاریگەریێوە فرەشا سەرو گلێرگەی نیانەرە، پېسە قەیرانو ئابووری، تاڵانکاری ژیۋگەیی و سیاسەتی جەنگەرانە، گرڎ دەرەنجامو سەپنای گۆشەگیرییا: "گلێرگە ئیساتۍ ئینا ئاژەو بێ هیوایینە". چارەسەرو گرڎو ئی قەیرانا ئینا مۆچیاریەکاو بەڕێز ئۆجالانینە کە پێشکەش بە ڕاو گرڎیش کەرڎەن. گۆشەگیری و بڕیەیرە پەیوەندییەکا ڕا جە چارەسەری کێشەکا مگێرۆ. حکومەت بە بڕەمایش جە چارەسەری کێشەکانە وڵاتی بەرەو کاولکاری بەرۆ. ئێمە بەردەوامۍ بیمۍ جە بەرزکەردەیۆ داواکارییەکاما و گرڎو ئا مافا کە پاشێلۍ مکریا تا دۆڵەتو ئاکەپەی جە سیاسەتو سەپناو گۆشەگیری پەشیمان مەبۆوە و پرۆسەو گفتوگۆی چنی بەرێز ئۆجالانی دەسپنە بکەرۆوە و تا مسۆگەر کەردەی ئازادی جەسەیی بەرێز ئۆجالانی ئێمە بەردەوامۍ بیمۍ جە کار و چالاکییەکاما."
داواکارییەکاما جە شارو ئامەدیوە پەی جەهانی ئەرەیاۋنمۍ
گوندوز جە دمادمایی قسەکاشەنە داواو بەشداربیەیش جە تەمامو گەلی کەرد پەی گلێرۆ بیەکەو ١٣و تشرینوو یووەمی و واتش: "ئێمە جە ۋەرا ۋەرو گۆشەگیری ڕەهاینە داواو ئازادی و جە دژوو گۆشەگیری داواو گفتۆگۆی و چارەسەری مکەرمۍ. سەڎان زیڼانیۍ نەوەشۍ جە زیڼانەکانە هەنۍ و مافشا پاشێل مکریۆ. زیڼانی هەن سەرەڕاو تەمامبیەو سزاکێش ئازاڎ نمەکریۆ. بە ۋەروچەما گێرتەی ئاژەو زیڼانی گەرەکمانە بەرەو ئازادی ڕووەو گرڎو زیڼانیا نەوەشیرە بکەرمێوە. هەرپاسە داواو دەمودەس هۊرگێرتەی گۆشەگیریی سەپیای سەرو بەڕێز عەبدوڵا ئۆجالانیرە مکەرمۍ کە جە لایەنو گەلوو کوردیوە ئیڎانە کریان. هامکات گرڎو گەلەکەیما خوڵقە مکەرمۍ کە بەشداری جە گلێرۆبیەکەو ١٣و تشرینی یووەمینە بکەرا و پێوەرە ئی داواکاریا بەرز بکەرمێوە. پەنەوازا گرڎوو گەلەکەیما داواو ئازاڎیی و ئەرەنیشتەی بکەرۆ و دەسو ئاشتی درێژ بکەراوە. ئێمە داواکاری گەلوو کوردی جە ئامەدۆ بە گرڎو جەهانی ئەرەیاۋنمۍ."
