گەریلاو هەپەگەی حاتەم ئۆزدەمیر کە جە ساڵەو ٢٠١٩ینە جە مەنتیقەو ماکۆی جە ۋەرکەوتوو کوردسانینە گیریابۍ و سزاو جە قەنارەدایش سەرەرە سەپیابۍ، دژوو قەرارەکەی جە دیوانوو باڵاینە تانەش جە قەرارەکەی دا.
گەریلاو هەپەگەی حاتەم ئۆزدەمیر ٢ۍ تەمووزوو ٢٠١٩ ی جە مەنتیقەو ماکۊی سەر بە پاڕێزگاو ورمۍ جە ۋەرکەوتوو کوردسانی جە کەمینېوەنە گیریا.
دادگاو ئێرانی بە تۆمەتەو "یاخیبیەی چەکڎاری جە دژوو دەوڵەتی" سزاو جە قەنارەدایش سەروو حاتەم ئۆزدەمیریرە سەپنا. سزاو جە قەنارەدای ئۆزدەمیری جە حەفتەکا ۋییەردەینە جە تەرەفوو دادگاو باڵاو ئێرانیوە پەسەنڎ کریا.
تاتەو ئۆزدەمیری، عەبدولرەحمان ئۆزدەمیر کە جە ئاگری مژیۋۆ ئاردشۆ وە یاڎ کە جە ٣٠ی ئایارینە جە زیڼانەنە کوڕەکەش دییەنش. ئۆزدەمیر باسش چانەی کەرد کە ئاژەو تەندروسی کوڕەکەیش خاسا و چنی هامڕاکاش ئینا هۆڵېوەنە.
قەرارېوە هەڕەمەکیا
ئۆزدەمیر ئەرەیاۋناش، کە جە ڕاو پارێزنەراوە جە دژوو سزاو جە قەنارەدای کە پەی کوڕەکەیش بڕیانۆ تانەشا جە لاو دیوانوو باڵایۆ تۆمار کەردەن و واتش، " ۋەروو ئانەی کوڕەکەم کوردا ئا قەرارشە سەرەرە سەپیان و قەرارېوە هەڕەمەکیا. ئانەی قبوڵ مەکەرمۍ. سەرەڕاو ئانەی جە سەدەو ٢١ینە مژیۋمۍ هەڵای ئینسانەکۍ جە قەنارەی مڎریا. جیهان وەرا ۋەر بە جابەجێکەردەی سزاو جە قەنارەدای جە ئێرانەنە بێدەنگا. ئانەیچ مایۍ قبوڵ کەردەی نییا. جە دژوو سەپنای سزۍ سەروو کوڕەکەیمەرە سەروو ئاستوو جەهانینە خاوەنداریۍ پێویس مەوینوو".
