هامسەرۆکوو ئەنجوومەنوو بنەیانەو گەشمەرداو کانتۆنوو فوراتی محەمەد عەینۆ سەبارەت بە هجوومەکاو دەوڵەتوو تورکی بە چەکی کیمیایی پەی سەروو گەریلای، قسێش پەی ئاژانسوو هەواڵوو فورات (ANF) کەردێ.

محەمەد عەینۆ واتش، کە بە مەرزنایرەی پەکەکەی ئینسانیەت ڕووەش وەنەو ژیواێوی تازەی کەردە، کە ئا ژیوایە ڕەنگینا و گرد کەسێ مگێرۆنە وێش و واتش، "ڕابەر ئاپۆ پەی چارەسەرکەردەی کێشەکاو وەرکەوتوو دلێراسەی بەپێویسش زانا پەکەکەی مەرزنۆرە و سوپێکیچ کە مەرزنارە قسێوەش پەی وێش بە بنەما گێرتە و کە کوردستان کۆلۆنی و داگیریان و مشۆم پەی کوردستانی دماییئاردەی بە ئاڵۆزییەکاو وەرکەوتوو دلێڕاسەی بکۆشیەیمێ. سەروو ئا بنەمێ گەریلاکێما دەسشا بە کۆشیای کەرد و تا ئیساتێچ بەردەواما".

محەمەد عەینۆ تیشکەش وستە سەروو کۆشیای گەلوو کوردی و ئانەش وست ڕووە، کە "گەلوو کوردی بە ئەرەمەرزنای پەکەکەی وێش تازە کەردۆ. دەوڵەتوو تورکییچ واتش، کە ئێمە چیمەنتۆ و کۆنکرێتما کەردەن سەرشا و هیچشا نەمەنەن و کورد نەمەنەن و ئیتر کەس نمەتاوۆ ت بواچۆ پەی دۆزوو گەلوو کوردی من ئەرەپڕوو و باسوو ئازادیی کوردستانیچ مکەروو، بەڵام سەیەو ڕابەر ئاپۆیوە جارێوی تەر ئا کۆنکرێتە ورتەکنیا و پەردەو مەردەی دڕنیا. نامێ گەلوو کوردی سەرتاسەروو جیهانینە دەنگش داوە و واتشا، کە ئێمە هەنمێ و وێشا سەلەمنا. ئێمەی کورد هەنمێ و کوردستانیچ هەن و ئی کێشەو وەرکەوتوو دلێراسەیچە چارەسەر مکریۆنە".

عەینۆ واتش، کە ئادێ ڕاو ئەندێشەی فرەڕەنگ و دۆڵەمەندەکاو ڕابەروو گەلوو کوردی عەبدوڵا ئۆجالانیوە ورێستێنیوە سەروو پایا و پێسە بەردەوام بی : "ئێمە سەیەو ئەندێشەکاو ڕابەر ئاپۆیوە ئازادی و ژیوایما ئشناسا، ئێمە فرەیی و دۆڵەمەندیی پێکئامایەکاما ئشناسێ و ئێمە سەیەشانە یاواێمێ ئی ڕوا. ئانا جارێوی تەر گۆشەگیریێوی دژوار سەروو ڕابەر ئاپۆیوە هەن و گەرەکشانە ڕاو ئا گۆشەگیرییوە گەل و ڕابەر ئاپۆی بڕارە جە یۆی. ئیساتێچ موینمێ، کە ڕوانە کەشە ئازادەکاوە بە چەکی کیمیایی هجوومێ مکەرا. ئامانجشا دلێنەبەردەین و بەپێچەوانەیچوە ئامانجوو ئێمە ئانەنە چەنی گردوو پێکئامایەکا ژیواێوی یەکسان و ئازاد بونیاد بنیەیمێ".

محەمەد عەینۆ وستش ڕووە، کە هجوومەکاو دەوڵەتوو تورکی پەی سەروو خاکوو کوردستانی زیادێ بانێ و ئانەیچش وست ڕووە، " جە کۆنۆ تا ئیساتێ خیانەت مکریۆ. ئارۆیچ ئێمە موینمێ، کە بە دەسوو بنەیانەو بارزانی چەکی قەدەغە مفاڕیۆوە پەی کەشە ئازادەکا. دەوڵەتوو تورکی داگیرکەری بە دەسوو بنەیانەو بارزانی مفاڕیۆوە پەی هەرێمی. ئینە خیانەتێوە تازە نییا. دەوڵەتێ گەرنتیکارێ و میاننەتەوەیێچ چانەیە بێدەنگێنێ، کە یانێ پەی پارێزنای مافەکاو ئینسانی هەرماندارێ کریێنێ. بەڵام بە پێچەوانەوە ئادێ پەی بەرژەوەندیی دەوڵەتا  هەرمانە مکەرا".

محەمەد عەینۆ پێسە دماییش بە قسەکاش ئارد: "گەریلا پەی ئێمە هومێد و ئازادیین. ئێمەیچ سەرەمڕ پا ئامانج و هومێدۆ شۆنەو گەریلاکانماوە مبیمێ. ئێمە تا سەر ئینایمێ پەشتەو هێزەکاماوە و ئێمە ئامانجەکاما مارمێ دی".