تا مێ هرووژمەکێ ئەمریکای پەی سەرو یەمەنی وەر بڵاوتەرێ بانە. شەوەو یەکشەممەی فڕۆکە جەنگییەکێ ئەمریکای چن یاگێ شارو سەنعای پایتەختیشا بۆمبواران کەرد.

بە پاو ئەرەیاوناو حوسیەکا جە ئەنجامو ئا هرووژمانە ١٢ کەسێ کوشیێنێ و ٣٠ کەسێ تەریچ زامڏارێ بیێنی.

حوسییەکێ ئەرەیاونانشا کە جە هرووژمەکەنە بازاڕێوە کۆڵانەو فەروەی جە ناوچەو شعوبەی کریان ئامانج. ئی ناوچە وەڵتەرێ جەلایەنو هێزەکا ئەمریکایۆ کریان ئامانج.

هەرپاسە ئەرەیاونانش کە جە هرووژمەکەو شەوەو یەکشەممەینە ناوچەکێ سەرۆککۆماریی کریێنێ ئامانج. ئی هرووژمە دماو هرووژمەکا حەفتەی ویەردە و ئەمریکای پەی سەرو بەندەرو نەوتەو ڕاس عیسای یەمەنی ڕووەشدێنە کە با مەڵامەتە لانیکەم ٧٤ کەسێ کوشیێنێ و ١٧١کەسێ تەرێچ زامڏارێ بیێنێ.