ڕوانگەو سووری پەی مافەکا مرۆڤی (سۆهر) ئامارەو ٢٤ سەعاتا ۋېیەردەو تاوانەکا کوشتەیش جە سووریانە وەڵا کەرڎۆ و ئاشکراش کەرد لاوکەمیۆ ١٤ کەسۍ بە ڕووەدایۍ جۆر بەجۆری کوشیێنۍ.

جە ئامارەکێنە ئاماژە پانەی کریان جە دەگاو ئەبوو دەفنەو ئیدلیبی پیێوە بەمەڵامەتو ئەوەمەڼنەو جەنگیوە گیانش جە دەسدان، هەرپاسە جە پانیشتوو سوەیداینە تەرمو کەسێوە بە کوشیای ئېزیانۆ.

کۆمکووژییەکۍ چەکڎارا حکومەتو دیمەشقی

جە ئامارەکەنە سەرنج وزیان سەرو کۆمکووژی و تاوانەکا چەکڎارا سەر بە حکومەتو دیمەشقی و دەسنیشان کریان جە ناوچەکا لازقییەینە چوار کەسۍ جە لایەنو ئا چەکڎاراوە کوشیێنۍ، کە زاوڵێچشا ئینۍ چنە.

هەرپاسە جە هۊرکوای سەرو دەگایەکا ۋەرنیشتوو حومسینە، جوانێوە بە گولۍ ڕاسەوخۆو ئا چەکڎاراوە کوشیان.

جە بەردەوامینە ئامان: "جە قەرداحەنە تەرمو جوانێوە بە کوشیایی ئێزیاوە، کە چن ڕوۍ چێوەڵی جە لایەنو گرووپێوە چەکڎارییوە بڕفانیا بۍ کە جلۍ ئاسایشو دیمەشقیشا وەرەنە بێنۍ. هامکات زاوڵێوە جە شارو ئەل سەنەمینینە جە ئاکامو جەنگو بەینو گرووپە چەکڎارییەکانە گولـلێوەش ۋەرگنۆ و عەمرەو خوڎای مکەرۆ."

ئاماژە پانەیچ کریان جە جەنگو بەینو دووۍ بنەیانانە جە دەگاەو ئەل دووری ۋەرنیشتوو سوەیداینە دووۍ جوانۍ دروزی کوشیێنۍ. هەرپاسە یەرۍ برۍ عەلەوی جە دەگاو حەمەینە جە لایەنو کەسانی نەشناسیایۆ کوشیێنۍ.