هەڤرین خەلەفە ئەرەمەرزنەرەو پارتوو پاشەڕۆو سوریای جە ١٢/١٠/ ٢٠١٩ینە چا کاتەنە کە دۆڵەتوو تورکی هرووژمە ئەرەگیریەکێش پەی سەرو سەریکانی و گرێ سپی دەسپنە کەردێبێنۍ، جە لایەنو چەتەکا ئەحرار شەرقییەی سەر بە دۆڵەتو تورکیوە باڵبەسە مکریۆ و دماو ئەشکەنجەو عەزیەتکەردێوە فرەی گەشمەرڎۍ مکریۆ. چا بارۆ سەمیرە عەزیزە جە ٦ەمین ساڵوەگەڕو هەڤرینۍ هامکارۍ و هەمڕێشەنە باسش جە کار و خەباتو هەمڕێکێش کەرد.

'ژەنێوە سەرمەشقە و کاریگەرە'

جە سەرەتاو قسەکاشەنە سەمیرە عەزیزە باسش جە سەرەتاو ئاشنابیەیش بە گەشمەرڎە هەڤرین خەلەفۍ کەرڎ و واتش: "جە ساڵەو ٢٠١١یۆ یۆترینما ئشناسا. دماو ئانەی جە ساڵەو ٢٠١٥ینە هەڤرینە جە دەسەو وزەینە بەشدارە مەبۆ، منیچ چا کاتەنە جە شاندو پەروەردەینە بێنا، پۊکەی فرەو کاتی پێوەرە کوۍ بێنمێوە، بەڕاسی گرڎ کاتێ سەرمەشقە و پسپۆرەبۍ جە هەرمانەکاشەنە و کاریگەری وەشکەرۍ. جە دماو ساڵەو ٢٠١٤یۆ چنی ئەرەمەرزناو ڕاوەبەری دیموکراتیکی خۆسەری هەرێمو جزیرەی، چڼین ئەرک و ۋەرپرسیاریێش گێرتۍ ئەستۆ. جە ٢٧/٣/ ٢٠١٨ینە بە ئەرەمەرزناو پارتو پاشەڕۆو سوریای جە ڕەقەنە بییە سەرمەشقەو دما ڕۆی و چنین پێکئامۍ جیاوازێش دلۍ پارتەکەیشەنە کوۍ کەردێوە. پېسە سکرتێرەی گرڎیی بیە بە دەنگو دادی و یەکسانی."

'جە کاروباری دیپلۆماسینە چنە ئامۍ بۍ'

جە بەردەوامینە سەمیرە عەزیزە سەرنجش وست سەرو چنەئامایی گەشمەرڎە هەڤرینۍ جە کاروبارو دیپلۆماسینە و پی جۆرە باسش کەردە: "بەڕاسی جە مژارو ڕاوەبەردەی کاروبارەکانە ژەنێوە پسپۆرە و سەرمەشقە بۍ. کەسایەتیێوە دیپلۆماسیش بۍ. پارتو دماڕۆو سوریای بە کۆششو ئاڎێوە ئەرەمەرزیا. نزیکەو ساڵ و نیمێوە سکرتێرەو گرڎی پارتەکەی بۍ.

جە دژو تاریکیەکا داعشی هەرمانۍ فرێش کەردۍ و بییە مەڵامەتەو ئانەی چڼین ژەنی بەشدارۍ خەباتو سیاسی با. هەرپۊکەی دۆڵەتو تورکی جە سەرەتاو ئەرەگیریەکا سەرێکانی و گرێسپینە جە ساڵەو ٢٠١٩ ینە جە ڕاو چەتەکاشۆ سەرو ڕاو M4 باڵبەسەش کەردە و دماو ئەشکەنجێوە فرەی گەشمەرڎێش کەردە.

دماو گەشمەرڎە کەردەیش جە چڼین یاگۍ ئۆروپاینە نامێش بەرز ڕاگیریا و پېسە ژەنە کۆششکارێوە فیمینیستیۍ یاڎش کریاوە."

'گەلاش جە ئەرەکۊشای هامبەشەنە چنی یۆی کوۍ کەردێوە'

جە دمادمایی قسەکاشەنە سەمیرە عەزیزە باسش جە خەباتی دیپلۆماسیانە و بە بنەما هۆرگێرتەی دیالۆگی جە کارەکاو گەشمەرڎە هەڤرینێنە کەرڎ و پی جۆرە دمایش بە قسەکاش ئارڎ: "هەڤرینە کارەکێش تەنیا جە گفتوگۆکەردەی چنی کوردا سنوردارۍ نەبێنۍ، هامکات هەمیشە پەی ئاشتی و پێوەرە بیەی چنی خێڵە عەرەبییەکا جە گفتووگۆنە بۍ، وە هەمیشە چنی جوانا و ژەنا بۍ. پۊکەی جە ئیساتێنە چنین جوانۍ و ژەنۍ سەرو ڕاو هەڤرینێوە بە ڕێکوستەی گەلا سوریای ئینۍ ئەرەکۊشایۍ هامبەشەنە."