دماو قسەکا وەزیروو بەروو تورکی، هاکان فیدانی، دەربارەو بەئامانجگېرتەی سەرنیشت و ۋەرکەوتوو سوریای، هجوم پۍ سەروو هەرێمەکا تا مۍ زیاتەر بۊ.

دەوڵەتوو ئەرەگیروو تورکی هجومش کەرڎ سەروو مەرەعنازی و شەرای و هەرێموو بەینوو دەگاو دەر جەمالی و مەنتیقەو شێراوای.

هجوم و سەروو هێزەکا شامی

فڕۆکەی بێ فڕۆکەوان هجومش کەرڎ سەروو وەننگەو دەگاو داد عەبدالی زرگانی. حەرپاسە جە دەگاو ئەلبوبی و ئەل ئەسەدییەی زرگانی هجومش کەرڎ سەروو هێزەکا حکومەتوو شامی، زەرەری مادیش چنەکۊتۊ.

کارەبا بڕیا

فڕۆکە بێ فڕۆکەوانەکۍ وێستگېوە کارەبایشا جە سەرنیشتوو قامیشلۆی بۆردومان کەرڎ. جە ئاکاموو ئا هجومانە، جە فرېوە جە دامودەزگا خزمەتگوزارییەکا و کۊڵانەکا قامیشلۆی و عاموداینە کارەبا بڕیا.

بەپاو زانیارییەکا فەرمانگەو کارەباو شاروو قامیشلۆی، وێستگېوە کارەبای بەتەمامی جە خزمەتی بەرشیەن و وێستگېوە تەریچ بەشێۋېوە بەشی زەرەرش پنەیاوان، پۊکەی کارەبا جە وێستگەکا دوو وێستگانە، کۆگاکا دانەوێڵەی، ئاساوو جزیرەی، نەوەشخانەو دڵی و چەما و ٦ نەوەشخانۍ تەرۍ و دووۍ فڕنۍ و دەیان هەزار یانا بڕیا.

جە عامودا وێستگەی سەرەکی مەنتیقەکەی بۆردومان کریا، جە ئاکامەنە کارەبا جە گرڎوو دامودەزگا خزمەتگوزارییەکا و کۊڵانەکا شارەکەی و دەگاکانە بڕیا.

دەگاکۍ شەعلە و زیوانای سەر بە شەهبای و دەوروبەروو تەل ڕەفعەتی بە چەکی قورس بۆمباران کریۍ.

جە عەفرین ٨ دەگۍ بۆمبۋاران کریۍ

سوپاو ئەرەگیری تورکی ٨ دەگۍ مەنتیقەو شەرای و شێراوایش بە سەختی بۆمبۋاران کەرڎۍ. دەگاکۍ بریتییېنۍ جە: دەگاو مازنی، کلوتی سوغانکەی و بێنە و میاسەی سەر بە مەنتیقەو شێراوای عەفرینی، حەرپاسە دەگاکۍ مەرەعنازی و شوارغەی و کشتعاری جە مەنتیقەو شەرای.