ئارۆ ٣ شەممە، جە وڵاتو (چین)ی ڕکوزیاو پەروەردە، زانست و فەرهەنگو سەر بە نەتەوەیۆگێرتەکان کە بە یونسکۆ ئەژناسیان ٤٤ چوارەمین کۆنیشتش ئەنجامدا و بڕیارەن جە میانشەنە سەرو دۆسیەو تۆمارکەردەی هەورامانی چوون میراتیوی جیهانی مرۆڤایەتیی قسێ و باسێ بکریانێ و بڕیا سەرش بدریۆن.
هەورامییەکی چەمەڕێنێ و ئومێدەوارێنێ، یونسکۆ دۆسیەکەی پەسەند بکەرۆنە و هەورامانی پێسەو میراتیوی جیهانی مرۆڤایەتیی تۆمار بکەرۆنە.

یۆنسکۆ جە کۆبییەو ئارۆیشەنە ئاسەوارەکێ ڕاو ئاسنو ئێرانی (راە آهن ایران)، ناوەند بارزگانی جیهانی (سونگ چوان)و چینی، پەرستگاو (کەکاتیا)و هندستانی، جادەو (باسیۆ دیل برادۆ)ی و باخچەو (بوین ریتیرۆ)و ئیسپانیا-یش چوون میراتێ جیهانیێ قبوڵێ کەردێ. کۆنیشتەکە تا سەبای درێژەش هەن و بڕیارەن چەنڎین ئاسەوارێ تەرێ وڵاتانو جیهانی پەی تۆمارکەردەیشان گفوتۆگۆشان سەر بکریۆنە.

٢ ساڵێ زیاتەرەن کە دۆسیەو هەرێمو هەورامانی جە دیمو وەرهۆرزو کوردستان (ئێران)ی دریان بە ڕکوزیاو پەروەردە، زانست و فەرهەنگو سەر بە نەتەوەیۆگێرتەکان کە ئەژناسیان بە یونسکۆ تا هەورامان چوون میراتی جیهانی تۆمار بکریۆنە و جە ئی چوارچوەنەیۆنسکۆ سەردای هەورامانیش کەردەن.
 

دۆسیەو هەورامانی کە پەی یونسکۆی کیانیان، ونەکۆڵیای و پەیجوری فراوان جە بوراەکێ (ئەندازیاری بیناسازی و باغداری، گەل شناسی، ژیوگەپارێزی، ئاوی، خاک، فەرهەنگ، زوان و تاریخ) جە وێش مەگێرۆنە و جە میانشەنە ئاماژە بە جیاوازیێ و تایبەتمەندییە زەنگینەکێ هەورامانی و گەلەکەیش دریان و داوا جە یونسکۆ-ی کریان پەی پارێزنایشان، هەرێمو هەورامانی کە مەگنۆنە شارستانەکێ مەریوان، سەوڵاوا، پاوە و سنە-ی سەر بە ئوستانەکێ سنە-ی و کرماشان-ی پێسەو میراتی جیهانی مرۆڤایەتی تۆمار بکەرۆنە.

ئەگەر یونسکۆ هەورامانی چوون میراتی فەرهەنگی جیهان تۆمار بکەرۆنە، ئاوەختە نەتەوە یۆگێرتەکێ و دەوڵەتو ئێرانی ناچارێنێ بودجەی تایبەت بە پارێزنای هەورامانی جە گردوو بوارەکانە دیاری بکەرانێ و ڕا نەڎانە ئا میراتە دەوڵەمەندە جیهانییە دەستکاری و وێران بکریۆنە. ئانێچە هەنگامێوە گرنگەنە تا جە ڕاشەوە زوان، وێژە، فەرهەنگ، تاریخ و جیاوازیێ و تایبەتمەندیێ هەورامانی و هەورامییەکان جە فەوتیای ڕزگارێ بکریانێ و هامکات گەشەشەان پنە بدریۆنە.