شەوکەت چاکر، سەرۆکو گرڏی گلێرگەی ئیسلامی کوردەسانی (جیک) بانگەوازش جە گەلی کەرد بەشداریی جە گلێرۆبییەکە و شارو کۆڵن-و ئەڵمانیاینە بکەرا، کە بۊنەو ١٠٠ـەمین ساڵیاڏ و ئەرەپڕاکەو شێخ سەعیدو پیرانی و هەمڕێیاشۆ ئەنجام مڎریۆ.
شەوکەت چاکر، سەرۆکو گرڏی جیکی بانگەوازش پەی کوردەسانیا ئەوروپای کەرد کە بەشداریی گلێرۆبییەکەی بلەرا. چاکر واتش، "سەد ساڵێ سەر و قەنارەدای شێخ سەعیدی و هەمڕێکاش ویەرۆنە. میراتو ئەرەپڕاکەیشا ڕانیشاندەرو گەلوو کوردی بۆنە."
چاکر ئاماژەش پانەی کەرد، شێخ سەعید وەڵێ قەنارەدایش واتش، "من مزانونە کە شمە من جە قەنارەمرەیدێ، بەڵام شمەیچ بزاندێ کە نەوەکێما حەقەتا چنە مکەراوە" و باسش چانەی کەرد کە ئی قسێ بییێنە دروشموا سەدساڵەو گەلوو کوردی.
چاکر واتش، "گەلوو کوردی سەد هەزار ساڵێن باج مرۆنە، قوربانیش دان، بەڵام سەرەش نەنامنارە" و ئاماژەش پانەیش کەرد، پەنەوازا خاوەندارێتیی ئی تاریخەی بکەرمێ.
چاکر باسش چانەی کەرد، پێسە و جیکی ئارێ جە ئەوروپانە مزگیێوەشا بەنامێ شێخ سەعیدی کەردەن، تا ئیسە بڕێ چالاکییێ یاڏکەردەوەیشا ئەنجام دێنێ، بەڵام بەرنامەو ئێساڵی 'تاریخییا'ـ. چاکر واتش، "ئێمە ئێساڵ تەنیا یادێوە ساز مەکەرمێ، بەڵکوم هەستو مڏرامانی جە وێمانە بەرزمکەرمێوە."
چاکر جە درێژەو قسەکاشەنە ئانەش یاڏ وستیمێ هامشێوە و شێخ سەعیدی، ڕابەر ئاپۆ جە ٢٩ـو حوزەیرانی سزاو جەقەنارەدایش سەرەرە سەپیا و واتش، "ئینە ڕێکەوتەی نییا، پەیامێوە سیاسییا". چاکر واتیشش "دۆڵەت گەرەکشا سزاو حەر کەسێ دۆنە کە بەنامێ گەلوو کوردی داواو ماف و سەرکردایەتی مکەرۆ، پەنەواز مکەرۆ گەلوو کوردی پەی سەرکردەکاش و تاریخو وێش جە وەراوەر و ئینەینە مرڏۆنە".
چاکر داواش جە گەلوو کوردی جە چوار پارچەو وڵاتی و بە تایبەتی کوردا ئەڵمانیای و ئەوروپای کەرد، بەشداری گلێرۆبییەکە و کۆڵنی بکەرا.
