جە ئەورووپا پەی ئازادی زیندانییە سیاسیێ و مەدەنیەکێ هەولێری و بادینانی و هاموەخت پەی بەرەنگاربیەی ئا شەپۆلێ جە دەستگیر و زیندانیکەردەی کە پەدەکە ئەنجامش مڎۆن، بە بەشداری چەنڎین سازیێ کوردیێ کەمپەینی فراوان ڕێکوزیا.
وەڵتە جە ڕێککەوتو ٢٠٢٠/١٠/٢٧ی، کۆمسیۆنەکێ باشووری سەر کۆنگرەو گلێرگەو دیمۆکراتی کوردی جە ئەورووپا کە بە (کەجەدەکە - ئە) ئەشناسیان، سەبارەت وەرتەستک کەردەی ئازادی و سەرکوت و دەستگیر و زیندانیکەردەی و هاموەخت پەی ئازادی ڕۆچنامەنویسێ، چالاکوانێ، زیندانیێ سیاسیێ و خەڵکی ناڕازی پانیشتو کوردستانی بەگردیی و هەولێر و دهۆکی بە تایبەتی بە کەمپەین دەستەکارێ بیێنێ و جە وڵاتە جیێ جیێکێ ئەورووپای و جیهانی کار و خەبات و کۆشایشان دابێ دەستپنەکەردەی و جە ئی چوارچوەنە سەردای چەنڎین کۆنسوڵخانێ و سازیێ و ناوەندێ و دامودەستگایێ ئەورووپایێ و میاندەوڵەتیێشان کەردەبێ تا جە ئاستی میاندەوڵەتییەنە، فشار بوزیۆنە سەرو (پەدەکە)ی تا دەست جە گێرتەی و زیندانیکەردەی وەربدۆنە و سەرجەم دەستگیرکریێ و زیندانیە سیاسیێ و مەدەنیەکان ئازادێ بکەرۆنە.
بەڵام پەدەکە نەک زیندانیەکێش ئازادێ نەکەردێ، بەڵکو بەفراوانی دەستش دان سەرکوتی و ڕەشبیگری و هیزی پەنج شەممە، جە دهۆک و بادینان چەندین کەسێ و چالاکوانێ مەدەنیێش دەستگیرێ کەردێنێ.
هەر پەوکەی جە ئیسەنە، بەشداری کۆنگرەو گلێرگەو دیمۆکراتی کوردی جە ئەورووپا (کەجەدەکە - ئە)ی، کۆمسیۆنەکێ باشووری سەر بە (کەجەدەکە - ئە)ی، فدراسیۆنو عەلەویەکێ کوردستانی، فدراسیۆنو گلێرگەکێ ئێزدیەکێ کوردستانی، ئەنجومەنو شەنگالی جە بەرو وڵاتی، کۆمەڵگاو ئیسلامی کوردستان (جیک)، کەمپەینێوی فراوانشان دژ بە پەدەکەی دەستپنەکەردەن.
ڕێکوزێ کەمپەینەکەی ئاشکراشان کەردەن: بەکیاسەتە (شاند)ی هامبەش سەردای کۆنسوڵخانێ، سازیێ، ناوەندێ، دامودەستگایێ ئەورووپایێ و میاندەوڵەتیێ بکەرانێ و سەبارەت بارودۆخو بادینانی و هەولێری و دەستگیر و زیندانیکەردەی خەڵکی ناڕازی یاداشتێ و گوزارشتێشان بڎانێ پنە، تا ئاێچێ پەدەکەی ناچار بکەرانێ سەرجەم دەستگیرکریێ و زیندانیکریێکێ هەولێری و بادینانی ئازادێ بکەرۆنە و دەست جە سەرکوتی و وەرتەسک کەردەی ئازادی باوەرۆنە.
کۆنگرەو گلێرگەو دیمۆکراتی کوردی جە ئەورووپا (کەجەدەکە - ئە)ی، کۆمسیۆنەکێ باشووری سەر بە (کەجەدەکە - ئە)ی، فدراسیۆنو عەلەویەکێ کوردستانی، فدراسیۆنو گلێرگەکێ ئێزدیەکێ کوردستانی، ئەنجومەنو شەنگالی جە بەرو وڵاتی، کۆمەڵگاو ئیسلامی کوردستان (جیک)، جە بانگەوازیێوی هامبەشەنە وازیارێ و داواکارێنێ، تا سەرجەم کوردێ ئەرەنیشتێ بەرو وڵاتی و دۆستێ و ئازادیوازێ و ئەنته‌رناسیۆنایستەکێ بشانە بەپیری بناگەوازیەکەیەوە و هامبەشانە و پێوەرە فشار بوزانە سەرو ناوەندە ئەورووپیێ و جیهانیەکان تا ئاڎێچێ فشار بوزانێ سەرو دەسەڵاتداری (پەدەکە)ی و داواش ونە بکەران، تا بەزوویی کۆتایی گەندەڵی و چەوەسانی گەلی، سەرکوت و وەرتەسک کەردەی ئازادی، دەستگیر و زیندانیکەردەی، تۆقانی و هەڕەشێ و کوشتوبڕی باوەرۆنە و سەرجەم دەستگیرکرێ و زیندانیکریێکێ دهۆکی و هەولێری ئازادێ بکەرۆنە.
