بەئامانج گېرتەی کۊڵبەرا جە لاوهېزەکا ئېرانیۊ بەردەواما و جە مەنتیقەی سنوری هەنگەژاڵەو بانەی بەمەڵامەتوو تەقەی ڕاسەوخۊو هېزەکائېرانی کۊڵبەرېوە گەنج کوشیا . هاموەخت بە مەڵامەتوو ئەوەتەقای مینېوە جە مەنتیقە سنوریەکا پیرانشاریچ کۊڵبەرېوە بەسەختی زامڎاربی
ماڵپەڕوو کۊڵبەر نیوزی ۋەڵاش کەرڎۊ، ڕۊو ٢٩ و ئەیلولی بەمەڵامەتوو ڕاسەوخۊو هېزەکا ئېرانی جە مەنتیقەی سنوری هەنگەژاڵەو بانەی کۊڵبەرېوە گەنج بەنامۍ "محەمەڎ خالیدی" عمر ٢٨ ساڵانی خەڵک و دەگاو 'چیچۊران' و ئا شارەیە کوشیان.
ئاماژە پانەیچ کریان، چنی محەمەڎ خالیدی، ٢ هاموڵاتیۍ هەرېموو کورڎسانیچ جە تەرەفوو ئا هېزاوە کریېنۍ ئامانج و زامڎارۍ کریېنۍ.
جە لېوەتەرۊ هەمان ڕۊ بە مەڵامەتوو ئەوەتەقای مینېوە جە مەنتیقە سنوریەکا پیرانشاریچ کۊڵبەرېوە بەنامۍ "ئەرسەلان سەفیاری" خەڵک و دەگاو 'گزگەسک'ی پیرانشاری بەسەختی زامڎاربیەن و دماتەر پۍ نەوەشخانەکا چۊمانی جە هەرېموو کورڎسانی فاڕیانۊ.
هەژاری، قەیرانەو دارایی و نەبیەی هەرمانۍ جە پارېزگاکا ۋەرکەوتوو کورڎسانی پاسەشکەرڎەن، هاموڵاتیۍ کورڎی سەرەڕاو مەترسیەکا و قورسی هەرمانەو کۊڵبەری، پۍ پەیڎاکەرڎەو لوقمۍ نانی حەراڵی حیچ دەرەتانۍ تەرشا نەبۊ و بەناچاری گیان سەروو دەسی پۍ کۊڵبەری ڕووە جە مەنتیقە سنوریەکا کەرا.
سەرەڕاو ئانەیچ ڕووانە جە تەرەفوو هېزەکا سەر بە دۆڵەتوو ئېرانی جە مەنتیقە سنوریەکانە ڕاسەوخۊ کریا ئامانج و پا مەڵامەتۊ جە ماوەو چن مانگی ۋیەردەینە ژمارېوە فرە جە کۊڵبەرا گیانشا جە دەسدان و یان بەسەختی زامڎارۍ بیېنۍ. بېجگە چانەیچ، ئەوەتەقای مینی، کۊتەیرە واری جە کەش و بەرزاییەکانە، هەرەسەو ۋەروۍ و هتد... ئا مەڵامەتېنۍ کە با بە مەڵامەتوو قوربانی بیەی کۊڵبەرا.
