جەنگەوانا یەپەژەی کە جە بەرەکا جەنگینە مڎرامان مکەرا ٨و ئاداریشا بە تایبەت جە جەنگەوانا یەپەژەی و گرڎو ژەنا پیرۆز کەرڎ و واتشا: "مشۊم ئی ڕووە پەی گرڎ ژەنێوە بۆ بە ڕۆو ئازاڎیی".
دۊڵەتو تورکی ئەرەگیری و چەتەکاش جە کانوونو یووەمو ٢٠٢٤یوە تا ئیساتۍ هرووژم مکەرا سەرو بەنداوو تشرینی و سردەو قەرەقۆزاقی. جەنگەوانا یەپەژە، یەپەگەی و قەسەدە بە ڕۆحێوە فیدای و شارەزایی سەروازیۆ مڎرامان مکەرا و هرووژمە ئەرەگیریەکا پوچۍ مکەراوە. جەنگەوانا ئازادی جە بەراکا مڎرامانینە بە جۆش و خرۆشێوە گۊرۆ پێشوازی جە ٨ و ئاداری ڕۆو جەهانی ژەنە کرێکارا مکەرا.
جەنگەوانا یەپەژەی ڕۆژبین عەرەبە و ڕوناهی چیا یەرۍ مانگێن ئینۍ بەرەو مڎرامانوو قەرەقۆزاقینە، سەرو ٨و ئاداری پەیلواکاو ۋێشا پەی ئاژانسوو هەواڵوو فوراتی (ANF) بەربڕی.
جەنگەوانەو یەپەژەی ڕۆژبین عەرەبە ٨و ئاداریش جە گرڎو ژەنا پیرۆز کەرڎ و واتش: "مڎرامان جە ٨و کانوونو دووەمیوە تا ئیساتۍ جە لایەنو گەلوو هەرێمەکەی و جەنگەواناوە ڕاوەبەر مکریۆ، هرووژمەکۍ دژمنی و ئەرەگیری پوچ مکەراوە".
ڕۆژبین عەرەبە ئاماژەش پانەیچ دا حەرچڼە جە لایەنو چەتەکا و دۊڵەتو تورکیوە، هەرێمەکە ڕووانە بە سەختی بۆمبواران مکریۆ بەڵام مڎرامانی تاریخی گەلی سەرەمڕە بەردەواما.
ڕۆژبین عەرەبە سەبارەت بە ٨و ئاداری واتش: "٨و ئاداری جە تەمامو ژەنە کرێکارا جەهانی پیرۆز مکەرو. پەنەوازا ئی ڕووە پەی گرڎ ژەنێوە بۆ بە ڕۆو ئازاڎیی".
جەنگەوانەو یەپەژەی ڕوناهی چیا ئاماژەش پانەی دا سەرەڕاو هرووژمی سەختو چەتەکا، گرڎ ساتۍ ئینۍ مڎرامانەنە و واتش: "ئی جەنگەی ملۊڕاوە جەنگو گەلی شۆڕشگێڵنیا. ئینەیچ جە مڎرامانوو بەنداوو تشرینینە بە سەرمەشقی گەلەکەیما ڕابەری مکریۆ. سەرەڕاو ئانەی جە ئەنجامو تۆپبورانی ڕاسەوخۆینە پەی سەرو گەلی تا ئیساتۍ بە دەیان گەشمەرڎۍ و زامڎارێش چنەکۊتێنۍ، بەڵام گەلەکەما بە شێوێوە بە هێزتەر ئەوەکۊشانە".
ڕوناهی چیا ٨و ئاداریش جە ژەنا و هەمڕایا ئەوەکۊشایش پیرۆز کەرڎ و واتش: "ڕۆو جەهانی ژەنە کرێکارا بە تایبەت جە تەمامو ژەنا و هەڤاڵاما جە بەرەکا جەنگینە مڎرامان مکەرا، پیرۆز مکەر و هیواو سەرکۊتەیشا پەی موازوو".
