ڕۊنامەوان-نویسەری ئیتالی جیۊڤانی کاپوتۊ ئاماژەش پانەیە کەرد، کە دەوڵەتوو تورکی گۊشەگیریی تند سەپنۊ و واتش، ئیتالیایچ وەراوەر بە گۊشەگیری وەرپەرسا.  

جە نویسەراو کتێبی 'کوردی' کە بە ئیتالیایی وەڵۍ بیێنێوە، جیۊڤانی کاپوتۊ قسێش پەی ئاژانسوو هەواڵوو فورات (ANF)ی کەرڎۍ. کاپوتۊ یادش ئارڎۊ، کە ڕابەروو گەلوو کوردی عەبدوڵڵا ئۊجالان ساڵەو ١٩٩٨ لوان ڕۊما، دماو ئانەیە ئیتالیاینە لوا جبەر گیریا  و ئانەیچ پەی ئادیشا فرە خۊفناک و قورس بۍ، کاپوتۊ واتش، "تووشوو شۊکی بیا و تاسییانۍ. ئاد لاو ئێمەوە  فرە گرنگ بۍ، وەلۍ حکومەتەکەما جە بەرزتەرین ئاستنە ئەمرەش کەرڎە کە وەڵاتەکەنە بلۊ. ئینەیچە چێوێوە ناکۊک و دژبەیۊن. کە دماتەریچ گیریا و دۊخوو ئاستەیۊش زینداننە فرە خۊفناک بۍ. جە ساڵەو ١٩٩٩ بەدماوە ئیمراڵینە گۊشەگیرا و زیاتەر جە ٣٠ مانگان زانیاری بارەشۊ وەرڎەس نییا و مافەکاو ئینسانی بەگەورەیی پاشێلۍ کریا".

ئێستا پێویسیما بە ڕاپۊرتەو سی پی تیی هەن

جیۊڤانی کاپوتۊ ناڕەزایەتییش وەراوەروو هەڵوێستوو ڕاگێریی جە ئەشکەنجەو (سی پی تی) بارەو پراتیکوو گۊشەگیریی دژواروو دەوڵەتوو تورکیوە نیشانە دا و واتش، کەمشۊم ڕاپۊرتەو سی پی تی بارەو ئیمراڵییوە وەڵا کریۊوە. نویسەر کاپوتۊ واتش، "جە ئەرەمەرزیایەکاو ئەورووپاینە، پەی نموونەی ویرۍ جە ئەنجوومەنوو ئەورووپای، سی پی تی-ینە کەرووە. ملا واگە، ڕاپۊرتێوە ئامادۍ کەرا، وەلۍ وەختێوە دەوڵەت گەرەکش بۊ متاوا وەڵاش کەراوە. ئایا مشۊم ئێمە دماو ٥٠ ساڵا بتاومۍ ئا بەڵگەنامەیە بوانمێوە؟  ئا وەختە پووچەڵ بۊوە. ئیساتۍ پێویستیما پا ڕاپۊرتۍ هەن. تا بزانمۍ کە ئیمراڵیینە چێش ڕووە مدۊ، پێویستیما پانەیە هەن، کە ئا ڕاپۊرتۍ ئیساتۍ وەڵا کریۊوە".

کاپوتۊ واتش، کە نەتەوەیۊگێرتەکۍ، یۊبییەی ئەورووپای و دەوڵەتە ئەندامەکۍ بە پاو بەرژەوەندییە ئابوورییەکاشا مامەڵە چەنی پەرسەو گۊشەگیری کەرا و واتش، کە دەوڵەتوو تورکی پەنابەرا، وزە و گازیچ پێسە ئامراز و کارتێوە بەکار مارۊ. جیۊڤانی کاپوتۊ واتش: "وەروو ئانەیە هەڵوێست نیشانە مەدا و ئا دۊخە کارەساتبارا و مایۍ دڵتەنگی و پەژارەین".

ئیتالیایچ وەرپەرسا

کاپوتۊ ئانەش وست ڕووە، کە ئیتالیایچ پێسە دەوڵەتی وەرپەرسا جە گۊشەگیریینە و واتش، "حکومەتەکەما ئا وەختیجە دەورش گێڵنا. ئەگەر قەرارما نەدۍ نەدۍ، کە چۍ لوۍ و داواو مافوو پەنابەریی سیاسییش کەرڎۍ، ڕاسیینە جە دادگاێوە ڕۊماینە ئانەش بەدەس ئارد، وەلۍ فرە دێر بۍ، پەوکای پێسە دەوڵەتی وەرپەرسێنمۍ. پێسە گەلی پەشتیوانێشنمۍ و ڕاسیینە من جە ئەوەڵۊ پەشتیوانشنا".

گرنگا کە ئەندێشەکێش وەڵۍ کریاوە

جیۊڤانی کاپوتۊ واتش، کە سەرباروو گۊشەگیریی هەسوو پێشێلکارییەکاو مافەکا، سیستموو ویرۊکەرڎەی ڕابەروو گەلوو کوردی عەبدوڵڵا ئۊجالانی فرە خاسا و واتش، کە ئانەیە نویستەیەکاشرە موینوو. جیۊڤانی کاپوتۊ ئانەش وست ڕووە، کە ئندەو سەرنجکێشتەی پەی سەروو گۊشەگیری، گرنگا، کە هەوڵۍ پەی وەڵاکەرڎەیۊ ئەندێشەکاش وزیا هەرمانە.چا بارۊ واتش، "بە ڕاو من وەسۍ نییا کە بوچییۊ 'ئیساتۍ گۊشەگیر کریان و گۊشەگیری بەرڎەواما'. گرنگا کە ئێندەو ئانەیچە ئێمە ئەندێشە و زانستەکەیش وەڵا کەرمێوە، چون سەرباروو بڕیایرەی و گۊشەگیری هەڵای ویرۍ کەرۊوە، منویسۊ و پەی گەلەکەیش وینای بەرهەم مارۊ، کە ئانەیچە گرنگا. چی دۊخە دژوار و خۊفناکەنە گەلەکەیش جیا نمازۊ. بە بڕواو من ئینە فرە گرنگا".