ئەرەنیشتاو مەخمووری کە وەراوەروو سوپاو حێراقی مرڎێنیوە و ڕا مەدا مەخمووری قۊرخ کەرا، باس چانەیە کەرا ئا پیلانۍ سەروو داواو ئەرڎۊغانی بریۊ ڕاوە، چێش بۊ با بۊ ئێموە قۊرخکەرڎەی چوارڎەوروو کەمپەکەی قبووڵ مەکەرمۍ.
لە ٢٠وو ئایاری بە دماوە سوپاو عێراقی بە سەیارەی زرەپۊش و بە زەبروو هێزی بە شکلۍ جیا جیا گەرەکشا کەمپوو پەنابەراو گەشمەرڎە ڕۊستەم جوودی قۊرخ و تەلبەند کەرۊ، نوقتۍ سەروازیۍ چاگە بنیۊرە.
پا بۊنەوە ماوەو ٩ ڕوا خەڵکوو مەخمووری وەراوەروو ئا حەوڵاوە ئینۍ حەرەسیات و مدراماننە، ئا هاموەڵاتیی کە ڕاشا جە سەیارە زرەپۊشەکا گێرتێنە واتشا ئانەیە قبووڵ مەکەرمۍ چونکوم گەرەکشانە خەڵکوو کەمپەکەی گێرا.
ئەدا ئەمینە شڕنەخییە: ئی دەوڵەتو چێشش گەرەکا چەنەما، ئێمە پەنابەرێنمۍ. وەروو ستەموو ئەرڎۊغانی ورئامنێنمی کەوتیمۍ وەروو ستەموو کازمیی. هەی بەرتیلوەرا و درۊزنا. چێشما پەنە کەرڎێندۍ چێشتا هەن سەرماوە، نیەنمۍ سەروو ڕاو کەسیتاوە، ئێمە دامنەو ئی کەشینە مژیومۍ ".
بە گەمارۊ ئێمەشا ئارڎێنمۍ قەراخوو مەرگێوە، ئێمە نەمرێنمێ! چێششا جەدەس ئاما کەرڎشا، کەس مەتاوۊ هێزوو ئێمە سیاو کەرۊ، تا ئاخر مدرامان کەرمۍ، قەسەم بە ونەو ڕۊڵەکاما وەرمۍ تا هەنمۍ مدرامان کەرمۍ، با کوشاما! چانەی زیادتەر چێشا!
ئەدا ئەمینە پیرانییە: چند کەمپێما دیۍ چێروو ئی ستەم و زۊرڎارینە، ئاخۊم چێش. ئا بەنام جوامێڕی ئی سەیارە زرەپۊشێشا ئارڎێنۍ وەرڎەموو ئی خەڵکە مەدەنییە، وەختۍ داعش ئاما چکۊ بێنۍ، چی نامێو ئێمەشا نەپارێزنۍ. خێرا تازە بەتازە مەیا ماچا پارێزنمێتا. ئانەیە قبووڵ مەکەرمۍ، ئینە وەروو وێشا نییا، ئانە فشار و هەڕەشۍ ئەرڎۊغانینۍ. ئێمە گەر بە گۊشوو ئەرڎۊغانیما کەرڎۍ ئیسە ماوا و مەکانوو وێمانە بێنمۍ، ئێمە چەنی ئەوما قبووڵ نەکەەرڎ ئینەیچ مەکەرمۍ، تەلبەند و قۊرخ ستەما، جە دەورووبەرەکەیما پەرسدۍ کێشەما پەی کەسی بییەن، ئێمە خەڵکی پارێزنمۍ خەڵکی مەورەشمۍ. چێش جەدەسما بۍ ئامادێنمۍ پەی ئاشتی و تەبایی، حەرگیز ئینەیە قبووڵ مەکەرمۍ.
تا ئیسە کەسی نەپارێزنێنمۍ ئیسەولایچ وێما وێما پارێزنمۍ، ئەگەر پەی پارێزگاری ئامێنۍ با بلا کەشەکە چەتەکۍ ئینۍ چاگە، ئێمە وێما ڕێکۍ وزمۍ کەسما گەرەک نییا.
مامۊسا هەوار گاباری: حوکمەتوو عێراقی گەرەکشا دەورما گێرۊ، بە فەرمانەو ئەرڎۊغانی جووڵیاوە، حەرگیز ئانەیە قبووڵ مەکەرمۍ ئانە گێرتەین خەیاڵسانە گێراما و دماو ٣٠ ساڵا وزاما دلۍ کەمپوو گیریایەکا، ئانە مایۍ قبووڵۍ نییەنە.
داوا جە تەماموو گەلوو کورڎسانی کەروو، پەشتیوانێما با و جە گرڎ شؤنێوەنە وربێزاوە سەروو پایا. وەرڎەموو باڵوێزیانەکاو عێراقی و جبەرۊ چالاکی وێنێشاندای ساز کەرا هێزوو وێشا تێکەڵوو هێزوو ئێمە کەرا، بە دەسوستەی دلۍ دەسوو یۊترینی ئینەی ویەرنمۍ.
س.ز
