خەڵکوو شەنگالی بۊنەو فەرمانەو ساڵەو ٢٠١٤یۊ، کە بە خیانەتوو پارتی (پەدەکە)ی کریا، ناچارۍ بیۍ یانەکاشا جیا بازا و کۊچ کەرا، دەیان هەزارۍ چا کۊچبەرا کەمپەکاو پانیشتینە ئەرەنیشتۍ بیۍ و پەی ماوەو ٩ ساڵا جا کەمپەنە پێسە سجنییا ئەرەگیریۍ.   

ماوەو حەفتەی ویەرڎەینە و بە پاو ئامارەکا زیادتەر جە ٥٠٠یانا و بنەیاناو شەنگالی گێڵێنێوە سەروو یانەولانەو وێشا شەنگالنە. یووە چا دەگایا کە بەفرەیی خەڵکەکەش گێڵاوە، گلێرگەو تل قەسب-ین جە پۊانیشتوو وەرکەوتوو شەنگالینە، کە گرڎوو ئەرەنیشتەکاش یەزیدیۍ بێنۍ.

یەری بنەیانۍ گلێرگەو تل قەسەبی، کە جە کەمپوو کەبەرتۊ-ینە بێنۍ، دماو گێڵیۊسا پەی یاگۍ وێشا واتشا بنەو دیوارێوە وێشانە بژیوا جە یانەو خەڵکی تەی وەشتەرا.           

گێڵێوەکۍ پەی ئاژانسوو هەواڵوو فورات (ANF)ی قسێشا کەرڎە.  

خێرۊ ئەلیاس گارس واتش، ساڵەو ۲۰۱۴ بە فەرمانۍ ورئامێنۍ پەی کەمپوو کەبەرتۊی دهۊکنە  و واتش: "ئێمە فرە لاماوە گرنگ بۍ گێڵمێوە ماواو وێما. ئیسە ئا یانە چەنەشنا هینوو هامساکەیما هینوو وێم نییا، وەلێم حەر پەی ئێمە گێڵایۊ مسڵەحەتا."

دماتەر ئەڎێوە بە نامۍ خەزاڵ عەلی-یۍ باسوو گێڵایۊش کەرد و واتش، "زوۊن ئینە یانەو ئێمەن و بە گێڵایۊ پەی دلێش فرە دڵوەشێنمۍ، کەمپەکەیچنە پێسە ئانەی ئەمرەما سەرۊ بۊ خەیمەکێما گڕەش گێرتە و گرڎوو کەلووپەلەکەیما سۊت. ئا ڕووە عەینوو ڕۊو ئەمرەکۍ پەیما سەخت بۍ، وەلۍ دیسان سپاس پەی خوڎای کە زینڎۍ و سلامەتێنمۍ، وەروو دیوارینە بژیومۍ پەی ئێمە وەشتەرا چوون ماواو وێمانە".

ئەدا خەزاڵ عەلی-یە داواش جە دەزگا پێوەنڎیڎارەکا بۍ واتش : "ئانۍ کە گێڵاوەو یارڎەیشا دەیدۍ، تا ئەوۍ تەرێچی بتاوا گێڵاوە، چوون فرێشا یانەکێشا وڕێنۍ و دەرڎەو ژیوای مەوەرا، یانەکەو ئێمە داعشی سۊچنا، وەلیم ئێمە سەرجەنۊ وەشش کەرمێوە."

هاموەڵاتیوە تەر بە نامۍ ئەلیاس گارس-ی قسێش سەروو ئاسایش و ئارامیی شەنگالی کەرڎە و واتش: "ئیسەنە حیچ تەسۍ سەروو زەمینیوە نییەنە و گرڎوو خەڵکوو شەنگالی بەئارامی متاوا بژیوا، ئێمە داوا چا یانا کەرمۍ کە هەڵای کەمپەکانە مەنێنێوە بەزوویی گێڵاوە تا گرڎما پێوەرە شەنگالی ئاوەڎان کەرمێوە".

س.ز