دکتۆرەکێ، ئەندامو شاندو ئیمراڵیی دەم پارتی و یاگەگیرو سەرۆک پەڕلەمانو تورکیای سری سورەیا ئۆندەر جە خەسەخانەو فلۆرەنس نایتینگەیڵ-ینە دماین زانیاریشا جە بارەو ئاژەو تەندرووسی سری سورەیا ئۆندەریوە وەڵاکەرڎۆ.

جە ئەرەیاۋناکەینە ئامان: "نەوەشەکەما ئینا بەشو چەمڎاری چڕینە و دماو شش ڕووا هەڵای مەترسییەکۍ سەرو ژیۋایش بەردەوامێنۍ. مەترسییەکۍ فرێنۍ و چارەسەرکەردەی بەردەواما."

'لاو ڕاسو دڵیش جوڵەش پەی گېڵانۆ'

هەر جە ئەرەیاۋناکەینە ئاماژە بە بەردەوامی چارەسەرکەردەی کریان و ئامان: "ڕۊو شەممەی جارێوەتەر عەمەڵو سینەو ئېژا ئۆندەریما کەردۆ. پەیما ڕۊشن بیۆ بەشو دلېینەو عەمەڵەکەی پاکا و حیچ هەوکەردەیێش نییا، حیچ یاگێوە عەمەڵەکەی ۋنیش چنە کۊ نەبیەنۆ. ئانەی مایۍ دڵوەشیا لاو ڕاسو دڵو نەوەشەکەیما جوڵەش پەی گېڵانۆ، کە وەڵتەرۍ بە تەمامی جە هەرمانە کۊتەبۍ. بە یاردەی ئامێرو جوڵەو دڵی، چارەسەرییەکېما بەردەوامێنۍ."

دکتۆرەکۍ ئاماژەشا پانەی کەرڎەن بە مەڵامەتو ئاژەو خراپی دەمارەکا دڵو نەوەشەکەیشاوە هەڵای مەترسیی جددی سەرو ژیۋای نەوەشەکەیشا بەردەواما و مەترسییەکێچ فرێنۍ.