کەجەکە ناڕەزایش ۋەرا ۋەر بە قەرارەکا کۆمیتەو وەزیرا ئەنجومەنو ئۆروپای سەبارەت بە گۆشەگیری سەرو رابەرو گەلوو کوردی عەبدووڵا ئۆجالانی نیشانەدا، کە جە قەرارەکەنە کات بە تورکیای دریان، ئەرەیاۋنانیچش، قەرارەکە رەوایەتی بە پاشیلکارییەکا دۆڵەتو تورکی مڎۆ.
هامسەرۆکایەتی دەسەو ڕاوەبەری کەجەکەی رەخنەش جە قەرارو کۆمیتەو وەزیرا ئەنجومەنو ئۆروپای گێرت جە پەرسو گۆشەگیری سەرو رابەرو گەلوو کوردی عەبدووڵا ئۆجالانی کاتش بە تورکیای دان پەی ئانەی هەنگام بنیۆ. کەجەکە ئانەش وستڕووە کە قەرارەکەو کۆمیتەو وەزیرا ئەنجومەنو ئۆروپای رەوایەتی بە تاوانۍ و پاشێلکارییە زەقەکا مافو مرۆڤی مڎۆ جە لایەنو دۆڵەتو تورکیوە و پی جۆرە بەردەوام بۍ، "جە ۋەرا ۋەرو پاشێلکەرڎەی مافەکانە کە بە شێوۍ ئاشکرا چێرپا وزیا و هەرپاسە گۆشەگیری رەها کە بە هیچ جۆرێ رەوایەتی هۊرنمەگێرۆ و مایۍ قبوڵکەرڎەی نییەنە، ئشیۍ کۆمیتەو وەزیرا ئەنجومەنو ئۆروپای دەموودەس هەنگامەش هۊرگێرتۍ بیۍ. ئشیۍ چا چوارچێوەنە هەڵوێسشا ئەرمانابیۍ. "
ئەرەیاۋناکەو هامسەرۆکایەتی دەسەو ڕاوەبەری کەجەکەی سەبارەت پا مژاریە پی جۆرەنە:
جە ٢٠و ئەیلولو ٢٠٢٤یوە هەڵوێسو کۆمیتەو وەزیرا ئەنجومەنو ئۆروپای جە ۋەرا ۋەرو یاساو مافو هیواینە ئینا رۆژەڤو رای گرڎینە. بە پاو دەزگاکا ئەرەیاۋنای، کۆمیتەو وەزیرا ئەنجومەنو ئۆروپای ، ۋەرو ئانەی دۊڵەتو تورکی مافو هیوایش جابەجێنەکەرڎەن، پېسە پاشێلکاری مافەکا هورش سەنگنان و داواش جە تورکیای کەردێنە هەنگامە بنیۆ. پەی ئانەیچ ماوەو ساڵێوە کاتش بە تورکیای دان، بەڵام دۆڵەتو تورکی بە شێوێوە ئاشکرا ڕا جە رابەرو گەلوو کوردی مگێرۆ کە ئیسفاڎە چا یاسۍ هۊرنەگێرۆ و ئەرەیاونۆش کە درێژە پا هەڵوێسەو ۋێچش مڎۆ. پەی ئانەی رابەر ئاپۆ ئیسفاڎە نەکەرۆ داواکاری زیڼانیا تەریچ ڕەڎۍ مکریاوە و ڕا چانەی مگێرا کە ئیسفاڎە چا یاسۍ بکریۆ. سەرەڕاو ئانەی هەڵوێسو دەسەڵاتدارا ئاکەپە-مەهەپەی فاشیستی، نەژاڎپەرسی پی جۊرەنە، قەرار نەڎای پەنەواز جە لایەنو کۆمیتەو وەزیرا ئەنجومەنو ئۆروپایۆ و کات بەخشای بە تورکیای پارادۆکسێوە جدییا و مامەڵێوەن مایۍ قبوڵکەردەی نییا. مامەڵەو دۆڵەتو تورکی و دەسەڵاتداری ئاکەپە-مەهەپەی ڕۆشنا و ئینا ۋەرو چەماوە.
دەسەڵاتداری ئاکەپە- مەهەپەی سیاسەتو قڕکەردەی کوردا جابەجێ مکەرۆ و هیچ بنەمێوە یاسا، ئەخلاق و مافی ۋەروچەما نمەگێرۊ. مامەڵەیچش جە ۋەرا ۋەرو رابەر ئاپۆینە ئینا چا چوارچێوەنە. هەم ناستشا رابەر ئاپۆ ئیسفاڎە جە "مافو هیوا"ی هۆرگێرۆ و هەمیچ ئیمراڵینە سیستمێوە رەهاو ئەشکەنجەی و قڕکەردەیشا ڕاوەبەر کەرڎ. رابەر ئاپۆ ٢٦ ساڵېن ئیمراڵینە چێرو سیستەمو ئەشکەنجەی و قڕکەردەینە راگیریان. ماوەو ٤ ساڵان گرڎو عیلاقەکاش چنی دنیاو بەری پڕچیان. سەرەڕاو ئینەی کە ئانە حەقەتینەکەن، کات بەخشای بە دۊڵەتو تورکی فاشیستی ئاکەپە-مەهەپەی جە ئەساسەنە رەوایەتیداین و قبوڵکەردەی ئا پاشێلکارییەینە. چەمەڕایی جە کۆمیتەو وەزیرا ئەنجومەنو ئۆروپای ئانە بۍ، بە بێ ئانەی هیچ کاتێ بە تورکیای بڎۆ، داواش کەردێبیۍ هەنگام بنیۆ. بە ئەنجامنەڎای ئانەی و بە بەخشای کاتی ئەنجام و هەڵوێسێوە ناڕۆشنش ئارڎەن ئاراوە.
ئا قەرارە رەوایەتی مڎۆ بە تاوانەکا پاشێلکەرڎەی مافەکا
دۆڵەتو تورکی کە تا ئارۆ بە هامکاری هێزەکاو جبەری جمانۆ، بە تایبەتی ئەمریکا و دۆڵەتا ئۊروپای قڕکەردەی کورداش ئەنجام دان. پیلانگڵنیی مېیاننەتەوەیی جە کەسایەتی رابەر ئاپۆینە جە ۋەرا ۋەرو گەلوو کوردینە ئەنجامدریان، جە سەرەتاوە سەرو دەسو ئا هێزاوە ئەنجامدریا. ئیساتێچ، دەسەڵاتدارو فاشیستی ئاکەپە-مەهەپەی بە هامکاری ئەمریکا، ئیسرائیل، ناتۆی و دۆڵەتا ئۆروپای سیاسەتو قڕکەردەی کوردا درێژە پنە مڎۆ. رێکوزیا و ئەرەمەرزیێکۍ ئۊروپایچ تا رۆو ئارۆی بە پاو ۋەرپرسیاری و ئەرکو ۋێشا نمەجماوە. هەم پەی جابەجێکەرڎەی هەردووە خاڵەو پەیماننامەو مافەکا مرۆڤو ئۊروپای و هەمیچ پەی جابەجێکەرڎەی یاسای گەردوونی هەڵوێسی پەنەواز نیشانە نمەڎا. جە پەرسو کوردانە و رابەر ئاپۆینە، حەرچڼە بەشێوێوە ئاشکرا دۆڵەتو تورکی مافەکێش پاشێلێکەردێنۍ و تاوانەی قورسەش کەرڎێنە، بێدەنگۍ بیێنۍ، یاخوڎ بە لاوازی جمێنێوە. چێوەڵیچ قەرارو دادگاو مافەکا مرۆڤو ئۆروپای جە بارەو ئەنەی کە رابەر ئاپۆ بە شێوۍ دادپەروەرانە دادگایی نەکریان و مشۆم سەرجە نۆ دادگایی بکریۆوە، جە لایەنو دۆڵەتو تورکیوە جابەجێ نەکریا. بەڵام جە ۋەرا ۋەرو ئانەینە هیچ چێوۍ نەکریا. هەرپاسە سی پی تی پەی ناستەو تاوانۍ ئاشکرای و پاشێلکەرڎەو یاسۍ کە هەر ۋێش تێبینیش کەرڎەبۍ، هیچ هەنگامێوەش نەنیا، گرڎ جارێ بە دایپنەو کاتی بە تورکیای چنی ۋێش کۊت هەڵوێسۍ دژبە یۆی و رەوایەتیش بە پاشێلکارییەکا دا. ئیساتێچ کۆمیتەو وەزیرانو ئەنجومەنو ئۊروپای مامەڵێوە هامشێوەش بە بنەماگېرتەن و کاتش بە تورکیای بەخشان. بەڵام جە ۋەرا ۋەرو پاشێلکەرڎەی مافەکانە کە بە زەقی ئەنجام مڎریا و گۆشەگیری رەهاینە کە بە شێوێوە کە ماوەو رەوایەتی و قبوڵ کەردەی نییا، ئشیۍ کۆمیتەو وەزیرا ئەنجومەنو ئۊروپای دەمودەس هەنگامەش نیێبیۍ. ئشیۍ هەڵوێسو ئاڎیشا پا ئاراسەرە بیۍ. چی ڕووۆ هەڵوێسو کۆمیتەو وەزیرا ئەنجومەنو ئۆروپای لاوازا و پاشێلکەردەی مافەکان جە لایەنو دۆڵەتو تورکیۆ وە رەوایەتیش پنە دریان.
ئشیۍ جیای کات بەخشای هەڵوێسێوەش گێرتەبیۍ ۋەر کە ناچارش کەردەبیۍ هەنگامە بنیۆ
دۆڵەتو تورکی قڕکەر-کۆلۆنیالیستی و دەسەڵاتداری فاشیستو ئاکەپە-مەهەپەی بە ئەرەگیرکەرڎەی کورڎەسانی و هرووژمەکاش جە دژو گەلوو کورڎەسانی و گەریلاکا ئازاڎیی، گەرەکشا پیلانگێڵنیی مېیاننەتەوەیی جە ڕاو گۆشەگیری رەهایۆ جە ئیمراڵینە درێژە پنە بڎۆ و سەرو ئا بنەمایۍ قڕکەرڎەو کوردا بە ئەنجام بیاونۆ. پا پاڵپەشتیەی جە جبەرۆ هورش گێرۆ، پېسە ئانەی تا ئیساتۍ کەردەنش، هەوڵ مڎۆ ئینەی بکەرۆ. جە ۋەرا ۋەرو ئا تاوانە گۆرە تاریخیانە کە دۆڵەتو تورکی و دەسەڵاتداری ئاکەپە-مەهەپەی جە چوارچێوەو سیاسەتو قڕکەرڎەو کوردانە ئەنجامشا دێنۍ، مشۆم گرڎ بە ۋەرپرسیاریۆ جماوە. ئەرەمەرزیێکۍ ئۊروپای بە تایبەتی ئەنجومەنو ئۆروپای و گرڎو رێکوزیا خاوەن ۋەرپەرسەکا مشۆم ۋەرپەرسانە جماوە. بەمەڵامەتو زەوتکەردەی چرو مافەکا و تاوانەکا دژ بە مرۆڤایەتی، مشۆم هەڵوێسێوە کە نەک کات بە تورکیای بەخشۆ، بەڵکم بە پێچەوانۆ هەڵوێسێوە کە ناچارش بکەرۆ بە هەنگامنیای، بگیریۆنە ۋەر.
مشۆم ئەرەکۊشای قەوەتتەر بکریۆ
ئێمە چێگەنە داوا جە گرڎو ئەرەمەرزیا و کەسایەتیەکا ۋەرگریکاری جە مافەکا مرۆڤی بەتایبەتی یاساشناسا مکەرمۍ: مامەڵەکەردەی ۋەرا ۋەر بە رابەر ئاپۆی، تەنیا بە پێناسەکەردەی تاوانۍ دژو مرۆڤایەتی متاویۆ ڕۊشنبکریۆوە. مامەڵە و نزیکایەتی دۆڵەتو تورکی دەسەڵاتداری ئاکەپە-مەهەپەی جە ۋەرا ۋەرو گەلوو کوردی و رابەر ئاپۆینە جە ئەساسەنە هرووژما جە دژو بەهاکا مرۆڤایەتی. ئێمە داوا مکەرمۍ کە دژو ئا کردەوە نایاسایی و نادادپەروەریە تاریخیەینە هەڵوێسی قەوەت نیشانە بڎا و سەرو ئا بنەمایۍ هەوڵەکاتا وزدۍ گەڕ.
چڼین قەرارۍ کە تا ئارۆ جەلایەنو رێکوزیا مېیاننەتەوەییەکاوە دریێنۍ، بەرش وزا کە دۆڵەتو تورکی ماف، یاسا، دادپەروەری، ویژدان و ئەخلاقش پاشێلکەرڎەن. قەرارو پاشێلکاری کە جە لایەنو کۆمیتەو وەزیرا ئەنجومەنو ئۆروپایۆ دریان، ئی کاراکتەرەو دۆڵەتو تورکی و راسی و رەوایەتی ئەرەکۊشای دژو ئانەیش جارێوە تەر سەلەمنا. چی چوارچێوەنە پەی گرڎو ئانیشا بەشداری جە هەڵمەتەو ئازادیی و پەشتیوانیش ۋنە مکەرا، بەتایبەتیچ گەلوو کورڎەسانی، پەی ئازاڎی جەسەیی رابەر ئاپۆی درێژەدای و بەردەوامیدای و قەوەتەرکەردەی ئی ئەرەکۊشایە فرە گرنگا. سەرو ئا بنەمایۍ مشۆم گرڎو گەلا، بەتایبەتی گەلوو کورڎەسانی، ژەنا، جوانا، هێزە شۆڕشگێڵن-دیموکراتیک-ئازادیوازەکا جە دژو ئا هرووژم، ئەرەگیری، گۆشەگیری و قڕکەردەیە پەرە بە ئەرەکۊشای جەهانیی ئازاڎی بڎا".
