هامسەرۆکایەتی دەسەو ڕاوەبەری کەجەکەی بۊنەو ئەنجامدای ئۆپراسیۆنی شۆڕشگێڵنی گەشمەرڎۍ دۆغا ڤیانێوە مبارەک بایش جە گەریلاکا کەرد و ئاگاڎیچش بە پێشمەرگەکا دا کە ۋێشا جە سەنگەرەکاو سوپاو تورکی دوور دارا.
هامسەرۆکایەتی دەسەو ڕاوەبەری کەجەکەی مبارەک بایش چا فەرماندە و جەنگەوانا هەپەگەی و یەژاستاری کەرد کە بەشدارییشا جە ئۆپراسیۆنی شۆڕشگێڵنیی گەشمەرڎۍ دۆغا ڤیانێنە جە مێڎانوو مدرامانوو کەش و جودینە جە هەرێموو ۋەرنیشتوو زاپی و هەرێمەکاو پارێزنای مەدیاینە کەردەبۍ.
جە ئەرەیاۋناکەو کەجەکەینە ئامان، "گەریلاکاو هەپەگەی و یەژاستاری ئۆپراسیۆنێوەشا چێروو نامۍ ئۆپراسیۆنی شۆڕشگێڵنی گەشمەرڎۍ دۆغا ڤیانێنە جە دژوو سوپاو ئەرەگیروو تورکی جە هەرێمەکاو پارێزناو مەدیاینە جە ١٧و شوباتوو ٢٠٢٤ ینە جە کەش و جودی سەر بە هەرێموو گەشمەرڎە دەلیلوو ۋەرنیشتوو زاپی ئەنجامدا. فەرمانڎەیی قەرارگەو ناوەندیی پارێزنای گەلی (نەپەگە) ئامانج و ئەنجامەکۍ ئا ئۆپراسیۆنەیشە جە ئەرەیاۋنێوەنە پۍ رای گرڎیی ئاشکرا کەردەبۍ. گەریلاکاو ئازاڎیی کوردسانی جارێوەتەر بە ئەنجامدای ئۆپراسیۆنی شۆڕشگێڵنانەو گەشمەرڎۍ ڤیان دۆغای گورزێوە کەمەر ماڕەشا جە سوپاو تورکی ئەرەگیری شانا و دەوڵەتوو کۆلۆنیالیستی قڕکەروو تورکیایشا رووبەڕوو شکستێوە گەورەی کەردۆ. بە مەڵامەتوو ئی ئۆپراسیۆنە سەرکۊتەیۆ جە سۊنگەو دلیماوە مبارەک بایی جە گرڎوو ئا فەرمانڎە و جەنگەوانە کەرمۍ کە چا ئۊپڕاسیۊنەنە دەورشا گێڵنان و هیواو سەرکۊتەیشا پۍ موازمۍ. حەرپاسە مبارەک بایی جە فەرمانڎەیی قەرارگەو ناوەنڎی پارێزناو گەلی (نەپەگە)ی کەرمۍ.
ئێمە جارێوەتەر یاڎ و گرڎوو گەشمەرڎا ئاخێزی و دیموکراسی جە کەسایەتی هامڕایما شەڕڤان ڤارتۆینە کە قارەمانانە جەنگش کەرد و چی ئۆپراسیۆنەنە گەشمەرڎە بی، بەرز ڕاگێرمۍ و پەو پەڕوو رێز و پنەزانایۆ و ۋەروو دەم و یاڎوو ئاڎینە سەرەو رێزی منامنمێرە و وەعدوو پابەندبیەی، وەفاڎاری و سەرکۊتەی واوەی کەرمێوە. گەریلاکاو ئازاڎیی کوردسانی جە ڕاو ئۆپراسیۆنی شۆڕشگێڵنی گەشمەرڎۍ دۆغا ڤیانێوە شێوازوو نزیکبیەیۆ جە راسی گەشمەرڎا و پەیوەسبیەی بە یاڎ و ویرەوەری گەشمەرڎاشا نیشانەدا. ئی هەنگامۍ و هەڵوێسەو گەریلای رەنگدایۆ هەڵوێسوو پەکەکەیا ۋەران ۋەر بە راسی گەشمەرڎا. هەر پا جۆرەی گەریلا نزیک بیۆ، ئێمەیچ مشۊم جە گرڎ یاگێنە پا جۆرە جە راسی گەشمەرڎا نزیکۍ بیمێوە و بە پەرەپنەدای بە کۊشیای، گەشمەرڎا بە زینڎەیی ڕاگێرمۍ.
گەلوو کوردی چی کۊشیاینە سەرگنۆ
گەریلا جە ڕاو ئی ئۆپراسیۆنە شۆڕشگێڵنیۆ جارێوەتەر سەلمناش کە هێز و تواناو وەرگیریش جە کوردسانەنە ۋەران ۋەر بە ئەرەگیرا هەن. دەوڵەتوو فاشیستی ئاکەپە-مەهەپەی جە ۋەران ۋەروو ئۆپراسیۆنەکا گەریلاینە تووشوو چەقبەستەی بیێنۍ و پلانەو ئەسڕیەیۆ و قڕکەردەی دوژمنی ئینا لێواروو شکسینە. چنی ئینەیچ دەوڵەتوو ئاکەپە-مەهەپەی شکسوو ۋێش پەردەپۆش کەرۊ و مەتاوۆ دڎانش بنیۆ پۊرە. دەوڵەتوو ئاکەپە-مەهەپەی دروۍ کەرۆ کە مەزانۆ جە ۋەران ۋەروو ئانەینە کە ڕووەش دان چێش واچۊ و چنی مامەڵە کەرۆ. ئا بانگەشەی کە دەوڵەتوو ئاکەپە-مەهەپەی چنی سوپا ئەرەگیرەکێش، میت، تاوانبارا و داردەسەکاش کەرێنێش، پانەی کە گەریلاکا شکس مڎا و گەلوو کوردی قڕ کەرا، بە تەمامی بێ بنەمانە. گەریلاکۍ ئازاڎییی کوردسانی و دۆزوو رەواو گەلوو کوردی جە بن نمەیاو مەبەزیا. گەلوو کوردسانی چی کۊشیاینە سەرۍ گنا و ستەمکاراو کۆلۆنیالیستی و قرکەری و خائینە داردەسەکاشا ناچار بە جواب دایۆ کریا و ۋنەپەرسایشا چنی کریۆ. ئی وادەیچە فرەش نەمەنەن و نزیکا.
رۆشنۋیراو تورکیای مشۊم راسی ئاکەپە-مەهەپەی پۍ گلێرگەی شیکەراوە
رۆشنۋیرا، رۆنامەنویسا ساحیب ویژدانی و ۋەرپرسیاروو تورکیای مشۊم راسی ئاکەپە-مەهەپەی پۍ گلێرگەی شیکەراوە و راسیەکاشا پۍ ڕۊشنکەراوە. سیاسەتوو دەوڵەتوو ئاکەپە-مەهەپەی جگە جە وروێڵنای تورکیای و بەرەو کارەسات بەردەیش زیاتەر حیچ ئەنجامێوەش نیا. سیاسەتوو دەوڵەتوو ئاکەپە-مەهەپەی سەروو بنەماو دوژمنایەتی چنی کوردەکا، فرەتەرین زەرەرش بە تورکیای و گەلا یاونان. مشۊم ئانەشا پۍ ڕۊشن کریۆوە کە ئی سیاسەتۍ تورکیاشا یاونان کۊگە، وڵاتەکەشا بە تەمامی رادەسوو تاڵانکاری، کاولکاری و بازرگانە چەم چنۊکەکا کەردەن کە هێزوو هەرمانۍ، ژیۋگەی و سەرچەمەکا وڵاتی تاڵان کەرا. گرڎ ڕووۍ کە دەوڵەتوو ئاکەپە-مەهەپەی درێژە بە حکومڕانی ۋێش مڎۆ، جگە جە پەلکێشکەردەی تورکیای پۍ دلۍ کارەساتی زیاتەری حیج ئامانجێوەش نییا. خەڵکوو تورکیای و هێزە سۆسیالیستە دیموکراتیکەکاشا مشۊم جە گرڎ بوارێوەنە یۊگێرتەیی زیاتەرشا بۆ چنی گەلوو کوردی و کۊشیای پۍ دلێنەبەردەو ئی حکومەتە فاشیستیە بەقوەتتەر کەرا.
مەبۆ کەس پەشتیوانی جە سیاسەتوو دوژمنکارانەی ۋەران ۋەر بە کوردی کەرۆ
ئێمە وەڵتەر بە پێشمەرگەکاما واتەبۍ، کە جە بنکەکاو سوپاو تورکی دوورۍ گناوە. جارێوەتەر ئی ئاگاڎییە واوەی کەرمێوە. گرڎوو هێزەکا بە تایبەتی پێشمەرگە مشۊم جە سوپاو ئەرەگیری تورکی و بنکەکاشا دوورۍ گناوە. حیچ کەسۍ مەبۆ پەشتیوانی و هەماهەنگی سیاسەتە دوژمنکارەکاو دەوڵەتوو تورکی و حکومەتوو ئاکەپە-مەهەپەی فاشیستی بۆ ۋەران ۋەر بە بە گەلوو کوردی، یاخوڎ مەبۆ پاڵپەشتی چا سیاسەتا کەرا".
