بە بەشداری چنین ژەنا جە کوردەسان و تورکیانە بە جلوبەرگو کلتووریی وێشاوە، پلاتفۆڕمو یۆبییە و ژەنا کوردی، جە ئامەدەنە بە درووشموو "بە یۆبییە و ژەنا کوردی بەرەو یەکڕیزی نەتەوەیی" یەرەمین کۆنفرانسو پلاتفۆڕمو ژەنا کوردی دەسشپنەکەرد و پەی ماوە و دووێ ڕوا بەردەوام بۆنە.

کۆنفرانسەکە جە تەلارە و ژوورو بازرگانی ئامەدینە ئەنجام دریۆ، درووشمو "ژەنی، ژیوای، ئازادی" بە شێوەزارەکا سۆرانی، کورمانجی و زازاکی هورواسیان.

پێشەکی کۆنفرانسەکەی، سەر و نامێ پلاتفۆڕمو یۆبییە و ژەنا کوردی جە لایەن و دەڤریم دەمیرێوە پێشكەش کریان و دلێشەنە بە سەرنج وستەی سەر و دەرنجامەکا ڕێککەوتنامە و لۆزانی ئاماژەش پانەی دا جا سەردەمۆ بە گرڏ شێوێ سایسەتو پارچەکەردە و تاونایۆ سەر و گەلی و جوگرافیاو کوردەسانی سەپیان.

دەڤریم دەمیرە جە بەردەوامینە سەرنجش وست سەر و ئەوەکۆشای بەردەوامی گەلوو کوردی جە دژو ئا هرووژم و فشارا و ئاشکراش کەرد ئامانجو بەستە و کۆنفرانسەکەی پەی وەرفراوانکەردەی ئەوەکۆشای و بەهێزکەردە و ڕێکوزتەین.

هەرپاسە جە قسەکاشەنە دەڤریم دەمیرە جەختش سەر و پەنەوازی ڕۆڵگێڵنا و ژەنا کەردۆ پەی بنیادنیا و 'بانگەوازو ئاشتی و گلێرگە و دیموکراتیک'ـو ڕابەر ئاپۆی و بانگەوازش جە ژەنا کوردی کەرد گرڏ جۆرە ڕۆڵ و ئەرکێوە وێشا وسا هەرمانە  پەی ئانەی.

دەڤریم دەمیرە جە دما دماینە واتش، فەلسەفەو "ژەنی، ژیوای، ئازادی" جە گرڏ لێوە جەهانیۆ جەلایەن و ژەنا وە پەسەن کریان و ئەوەکۆشای ژەنا پەی ئی شۆڕشەیە بەردەواما و چنی ئانەی باسش جە گرنگی بنیادنیا و ناسنامەو ژەنێ ئازادێ کوردیش کەرد.

دما و قسەکا، کۆنفرانسەکە بە نیشاندای سینەڤیزیۆنێوە دەربارەو ئەوەکۆشای ژەنا بەردەوام بی.

دماتەر پەیامو کۆنگرە ستاری جە کۆنفرانسەکەنە ۋنیاوە

بەشێوە جە پەیامەکەی پی جۊرەنە:

" ئێمە پېسە ڕێکوزیاو کۆنگرە ستاری، جە ۋەرنیشتوو کوردەسانیوە کە قەڵاو مڎرامانی و مېڎانو شۆڕشو ژەنان، پا ڕۆحە شۆڕشگێڵنیۆ گەرمتەرین پیرۆزبایی ۋێما ئاڕاسەو کۆنگرەکەیتا مەکەرمې.

هیواڎارێنمۍ جە کۆنگرەکەنە قەراری گرنگ بڎریۆ کە بۆ بە ئامرازێوە پەی بینای کۆنفرانسی نەتەوەیی و کۆنفرانسو ژەنا و ئەرەمەرزنای یۆبیەو نەتەوەیی کوردی، بینای کۆنگرێوە کە جە چوارچێوەو ڕیکوستەینە بۆ، نوێنەرایەتی ساتێوە گرنگی مەکەرۆ جە پڕۆسەو ئەوەکۊشای کوردینە

کۆنفرانسەکەتا جە کاتێوە فرە هەستیارەنە ملۊڕاوە، چونکی گەلو کوردیما ئینا قۆناغێوە تاریخینە، هێزە هەژموونگەراکۍ جارێوەتەر نەخشەو ناوچەکەی کێشاوە، کە ئینەیچ ۋەرپرسیاریێوە تاریخی وزۆ سەرو شانا گرڎو ئێمەی ژەنا، پڕۆسەو ئیساتۍ پەنەوازش بە ڕابەرایەتیێوە حەقەتینەی هەن بە ئازایی، ڕێکوستەبیەی، ستراتیجی و هامدەنگی، کە ئینە متاوۆ ڕا وەش بکەرۆ پەی بنیاڎنیای چارەنوویسێوە هامبەشی.

ژەنا کوردی، کە گۊرەتەرین جەنگو بیەیشا جە دژو فاشیزمی و ئەرەگیری کەرڎ و دژو داعشی مردێوە، گەرەکشانە ئارۆ نەک تەنیا جە ئاستێوە قوربانیداینە مەناوە، بەڵکم جە ئاستو ئیرادەی، سەرمەشقایەتی و دیاریکەردەی ئایندەیچەنە دەورشا بۆ، هومېڎێوە فرەما پی کۆنفرانسەیە هەن، چونکی هەنگامېوە کردەییە بۆ کە زەمینە پەی کۆنفرانسی جە گرڎو پارچەکا کوردەسانینە وەش بکەرۆ، ئینەیچ بۊ بە مەڵامەتو پارېزنای دەسکەوتەکا ئیساتۍ و ئایندەی و وەشکەردەی هامپەیمانی و هامدەنگی جە ۋەرا ۋەرو گرڎو هەڕەشەکانە.

ئازادیی گەلێوە، کە ژەنیش چنە بەدەرە بۆ، مومکین نییا، بەڕاسی کۊششو ژەنا کرێڵو ئازادی و دیموکراسی و یەکڕیزییا، ئێمەی ژنان مشۊم بە قسۍ و هەوڵ و کار و کردار و دڵسۆزی و ئازایەتیما بیمۍ بە بنیاتنەرۍ یۊبیەی نەتەوەیی."

کۆنفرانسەکە بە ۋەنایۆ پەیامەکا بەردەوامیش بۍ؛ پەیامو ئایشە کۆککانۍ

هەر جە کۆنفراسەکەنە نامەو ئایشە کۆککانۍ واتەواچەی وەڵینەو تەژەئای، کە جە زینانو ژەنا زنجانینە زینانیەنە، ۋنیاوە.

ئایشە کۆککان جە سەرەتاو نامەکەینە سڵامش ۋنەو بەشدارا کۆنفرانسەکەی کەرد و بەڕێز و پنەزانایۆ یاڎو گەشمەرڎا ژەناش کەرڎۆ و ماچۆ: ئیساتۍ کات کاتو یۊبیەی ژەنا کوردین. هامکات ژەنی سەرمەشقایەتی بنیاڎنیای یۊبیەی نەتەوەیی کوردی دیموکراتیکی مەکەرا. ئی جارە ڕا نمەڎەیمۍ ئا دەرفەتەی کە بە هەزار و یەک زەحمەتی بەدەسما ئارڎەن جە دەسمانە بشۆ."

هۊرچەرخنای شۆڕشو 'ژەنی، ژیۋای، ئازادی'

جە بەردەوامینە ماچۆ: "ئارۆ پەنەوازما بە فەلسەفەو 'ژەنی، ژیۋای، ئازادی'یا تاوەکو تاریخو شۆڕشو ژەنی نیۆلیتیکی بە داستانو زنجیرە کەشەکا زاگرۆس-تۆرۆسی، پاڵو هامپەیمانی میزۆپۆتامیای و ئانادۆلییاو وڵاتو پەنج بەحرینە جارێوەتەر بکەرمۍ بە شۆڕشو سەردەمی. بنیاڎنەرا و هامپەیمانا ئی داستانا ژەنی بێنۍ.

باوەڕیمابە ۋێما بۊ کە ئێمە بەفرەو شێوا ڕووبەڕوو ڕەگەزپەرسی، ئایینپەرسی، نەژاڎپەرسی...هتد، ئینە پاسشە کەرد کلتوورو تاتەسالاری گرڎو سەرنج و بەرهەمەکاما دزۆنە و کەرۊشا بە چەکو هرووژم کەردەی سەرما."

ئایشە کۆککانە پی جۊرە دمایش بە نامەکەیش ئارڎەن: "ژەنی بۆ، کورد بۆ، کوردەسانی بۆ، ئاسووری، سریانی، مەحەلمی، ئەرمەنی، ڕۆمانی، دروزی، قەرەج، لاز، چەرکەس، عەلەوی، سوننی شۆڕگێڵن بۆ، دیموکراتیک بۆ، سۆسیالیست، ئیکۆلۆژی بۆ. ئی گەلەکۆمەو تاتەسالاریە ٢٠-٣٠ ئاڼنە هرووژمەکېش زیاڎۍ کەردێنۍ. گرڎ جیاوازییەوەشا جە ئێمەنە کەردەن بە بەهانۍ هرووزمی جۆراو جۆری.

پۊکەی یاوێنمۍ بە قۆناغۊو نەتەوەی دیمورکراتیکی تا ئانەی بە گرڎ شێوێوە هامشان چنی گلېرگەکەیما بە یەکسانی و دیموکراتیکیوە ۋێما بە رێکوستەی بکەرمۍ.

پی فام و ویرکەردەیۆ سڵام جە بەشدارا مکەرو. سڵام جە یاڎ و یاڎەوەری گرڎو ژەنا میزۆپۆتامیا، ئانادۆڵی، جە وڵاتو پەنج بەحری و گرڎو جەهانی مەکەرو کە جە ڕاو ئازادی ژەنانە گیانو ۋێشا بەخشان و بەڕیزو حورمەتۆ سەرەم ئاستشانە منامنورە."