کۆنسەو ڕاوەبەری کۆنگرەو نەتەوەیی کوردەسانی (کەنەکە) بە پەیامێوە پیرۆزبایی، جەژنەو چوارشەممە سووریش پیرۆزە کەردە و واتش: "جەژنەو چوارشەممە سووری، جەژنەو کوردەسانینە، جەژنەو گلېرگەی ئێزدینە و هۊرگیرو ماناڎاریێوە ئاینی و تاریخیەنە."

جە بەردەوامی پەیامەکەینە کەنەکە هیواش واست، جەژنەو چوارشەممە سووری بۆ بە بناغەو ئاشتیێوە هەمیشەیی پەی گرڎو گەلا و گلېرگەکا و ئامان: "چی ساتەنە کە پێشوازی جە جەژنەو چوارشەممە سووری مکەرمۍ. جە شەنگال، عەفرین و سەرێکانینە هرووژم و مەترسییەکا سەرو باوەڕدارا ئێزدی دێژەشا هەن. هەڵای ئاژەو شەنگالی ڕۊشن نەبیەنۆ. گرفتەکێشا قوڵتەرۍ باوە. هرووژمەکۍ دۊڵەتو تورکی سەرو شەنگالی بەردەوامێنۍ. بە گرڎ جۊرۍ پەشتیوانی جە گەلو شەنگالی و هێزەکا پارېزنای ئێزدیخانی مکەرمۍ. ئی هرووژمۍ درێژکراوۍ هرووژمەکا داعشینۍ و دێژەداین بە فەرمانەو ٧٤."

جە بەشێوەتەرو پەیامەکەینە جەخت چانەی کریانۆ شەنگال بەشێوەن جە خاکو کوردەسانی و بە مەلامەتو تایبەتمەندییەکاشۆ بیەن بە مەرامو هرووژمەکا و ئامان: "پی دماییەیچە حکومەتو بەغڎای و چڼین هێزۍ تەرۍ، دلۍ شەنگالینە پرۆڤۆکاسیۆن مکەرا. دیارا ئامەنجەکە هۊرشێونایۆ ئیدارەو شەنگالین و پەی ئانەی گەلو شەنگالی بێ ئیدارە و بێ پارېزنای بکریۆ. پەنەوزا ئیرادەو گەلو شەنگالی بە بنەما گیریۆ. پەی پارېزنای گلېرگەو ئێزدی پەنەوازا گرڎو هێز و گەلەکەما هۆشیارۍ با و خاوەنداری جە گەلو ئێزدیما بکەرا. مشۊم شەنگال و خەڵکەکەش و گرفتەکۍ شەنگالی، بە شێوێوە تایبەت هۊرسەنگیا و چارەسەرۍ بکریا."

جە بەشێوتەرو پایەمەکەینە بانگەواز پەی یەکڕیزی گەلو کوردی کریان و ئامان: "پێوەرە و پەی ئایندەو ژیۋایۍ شکۆدارانەی، بە پاو بەها، مانا و پێرۆزییە قەڎیمیەکا جماوە."

جە دما دمایی پەیامەکەینە کەنەکە جەختش کەردەنۆ چانەی، پیرۆزکەردەی جەژنۍ وابەسەو سەرکۊتەین و ئامان: "ماناو جەژنەو چوارشەممە سووریچ، ۋەرپرسیاری و باوەڕما چنە داوا مکەرۆ. پی هیوا و داوێوە، پېسە کەنەکەی جارێوەتەر جەژنەو چوارشەممە سووری جە گلېرگەی ئێزدی، گەلو کوردی و تەمامو گەلا ناوچەکەی پیرۆزە مکەرمۍ."