کۊمیتەو پەرەوەرڎەو کەژەکەی بە بۊنەو ٢١و شوباتیوە ڕۊو جیهانیی زوانوو ئەڎێ، ئەرەیاوناێوە نویسیاش بە ناموونیشانوو' زوانوو ئەڎۍ شناسنامەو گەلان' وەڵا کەرڎۊ. ئەرەیاوناکەینە ئامان: "ڕێکوزیاو پەرەوەرڎە، زانست و چاندوو نەتەوە یۊگێرتەکا (یونسکۊ) کە ڕۊو ٢١ شوباتیش پێسە ڕۊو زوانوو ئەڎۍ دیاریی کەرڎەن، جگە ئانەی ٢٥ ساڵۍ سەروو ئی قەراریرە ویەرڎەن، بەڵام بڕۍ زوانۍ تارێخ-گلێرگەی دێرین، لاو بڕۍ جە وەڵاتە ئەنداماو نەتەوە یۊگێرتەکاوە قەدەغۍ کریا".

حەر ئەرەیاونایەکەینە ئامان، دەوڵەتوو تورکی ماوەو سەدێوەن دلۍ سنووروو تورکیاینە سیاسەتوو قڕکەرڎەی و ستەم دژوو گەلوو کوردی، سوریا و ئەرمەنی کەرۊ. ئەرەیاونایەکەنە ئامان: " وەراوەروو سیاسەتوو ستەمکەرڎەی وەنەو گەلا و قڕکەرڎەی زوانی لاو دەوڵەتێوە پێسە تورکیای، بۍ هەڵوێستوو یونسکۊی و نەتەوە یۊگێرتەکا شەرمەزاریین و پاشێلکەرڎەی قەرارەکاشانە.

ئاشکران نەتەوە دەوڵەتوو تورکیا، سوریای و ئێرانی، بییەیی گەلوو کوردی بەشێوێوە ڕسمی قبووڵ مەکەرمێ. گەلوو کوردی زیاتەر جە ٤٠ ملوێنان، چندین ساڵێن کۊشیای نەتەوەی سەروو بنەماو ماف و ئازاڎیی وێش بەرۊ ڕاوە. ڕەنگا هێزوو دەوڵەتا ددان بە بیەی گەلوو ئێمەرە نەنیا، بەڵام نەتەوەکاو پێسە عەرەب، تورک، فارس، ئەڵمان، ئینگلیز، فەڕەنسی، کەتەلۊنی و هۊڵەندی نەک تەنیا بییەی گەلوو کوردی مشناسنا، بەڵکوم پەشتگیریێوە گەورەو دۊزوو ئازاڎیی گەلوو ئێمەنێ. ئینە چە جە کەسایەتیی ژەنۍ و گەنجی ئەنتەرناسیۊنالیستی مەیدانەکاو هەرێموو پارێزنای میدیای شانە بەشانەو گەریلاکاو ئازاڎیی کورڎسانی دژوو دەوڵەتوو تورکی گژیا، ڕاپیمای ناوەندوو ١٧ شوباتوو کۊڵنینە بەشداریێوە هەیبەتداروو ژەنێ، گەنجا و چندین کەسایەتیۍ سیاسی-ڕۊشنویرۍ و پێکئامەو گەلە دیموکراتیکا سەرمەشقۍ بێنێ، ئەوەڵوو دداننیایپۊرەی بە ئیرادەو گەلوو کوردی جە کەسێتیی ڕابەر ئاپۊینە ئاشکرا کەرد. سەروو ئی بنەمێوە گەلەکەما زیاتەر جە گرد وەختۍ باوڕش بە هەرمانە و خەباتوو وێش هەن سەروو بنەماو نەتەوەی دیموکراتیکی. بە مانایۍ تەرە؛ مەبۊ گەلەکەما پەشتی بە هیچ دەسەڵاتێوە دەوڵەت-نەتەوەی بەسۊ سەبارەت بە پەرسەو پەروەرڎەی بە زوانوو ئەڎێ، هومێدی سەرەکیما هامپەشتی و هامدەنگیی جڤاکیی گەلان، ئینەیچ هەنگام بە هەنگام وەش بۊ.

پێسە ڕەهەندێوە بنەڕەتیی نەتەوەی دیموکراتیکی، پەرەوەرڎەو چاندی و زوانی جە هەر بارودۊخێوەنە، بە فرسەتی جڤاکی خەباتێوە بەحورمەتا. پا مانۍ چە جە هەرچوارپارچەو کورڎسانینە، چە جە کەمپوو گەشمەرڎە ڕوستەمی یا بەروو وەڵاتینە، ئا هەرمانۍ کە مامۊسۍ زوانی و خەباتکارۍ بە فیداکاری و وێبەخشانە کەراش، شایانۍ پەنەزانای کۊمەڵایەتینێ. ئینەیچ ئانەیە بەروزۊ، وەڵۍ گرد چێوێوەنە، پێکئامای کوردی پێویسییش پانەینە وێش پێسە گەلێوە بشناسنۊ و خاوەندارێتی جە بییەی وێش کەرۊ. سەبارەت بە قسەکەرڎەی و فێربییەی و گەشەکەرڎەی بە زوانوو ئەڎۍ سروشتیتەرین و مانادارتەرین چالاکیین. زوان هێماو بییەی و بنەچە و شناسنامەو ئینسانین. ئەگەر ئینسان زوانەکەیش جەدەس بدۊ، ئەسڵوو وێچش جەدەس مدۊ. تا ئینسان ڕەسەنایەتییش بۊ، پێویسا شانازیی بە زوانەکەیشۊ کەرۊ. سەروو ئی بنەمێوە، بە بۊنەو ڕۊو جیهانیی زوانوو ئەڎێوە، جە حەرچوار پارچەو کورڎسانی و بەروو وەڵاتیوە، ژەنێ، گەنجێ، زارۊڵۍ و گرد کەسۍ کە هەستوو نیشتمانپەروەرییش هەن، پەی پارێزنای و گرنگیدای بە زوانوو ئەڎێ، هانیشا مدەیمۍ چالاکی نۊعاونۊع کەرا. به هەمان شێوه داوا وەنەو حەرکوردێوە کەرمێ، کە داراو کەرامەتین دەوروو دامودەزگاکا و مامۊسایا و خەباتکارا زوانوو ئەڎۍ کۊ بۊوە و گرد هەنگامێوە ژیواینە بهکوردی ویرۍ کەرۊوە و قسۍ کەرۊ".