جە دۋەمین رۊو ٢١مین کۆنیشتو کەنەکە-یەنە، ئارۊ شەممە، وتۍ و پەیامۍ پارت و لایەنە کوردستانییەکان درێژەشا بۍ و پلاتفۆرمی هۆرام-ی جە پەیامێوەنە دەستنیشان کەرد: یۆگێرتەی ئامیانو سەرکەوتەیە و بە یۆگێرتەی ۋەرەنگارۍ هێرشەکان ببێمێۋە.
جە دۋەمین رۊو ٢١مین کۆنیشتو کەنەکە-یەنە، ئارۊ شەممە، دیسان وتۍ و پەیامۍ پارت و لایەنە کوردستانییەکان درێژەشا بۍ. جە ئا چوارچۋەنە پلاتفۆرمی هۆرام-ی پەیامو وێش پێشکەش کەرد. ژاڵانە هەورامانە هامسەرۆکەو پلاتفۆرمو هۆرام-ی پەیامەکەش واناۋە کە جە میانشەنە؛ یۆگێرتەی بە ئامیانو سەرکەوتەی بەنامۍ کریان.
هۆرام دەستنیشانش کەردەن: کوردستان و گەلو کوردی ڕووبەڕووۍ هێرشی هەمەلایەنەی بیێنێۋە و یەک حزب و لایەن بە تەنیا تواناو رووبەرووبییەی هێرشەکاش نیا و مشیۆم گرد پێوەرە یۆگێرتانە ڕرووبەرووێش بباوە.
تەمامی پەیامەکەو دەستەو ڕاۋەبەریی پلاتفۆرمو هۆرام-ی:
وەشەویسا و بەشداربییەکاو ٢١مین کۆنیشتو کۆنگرەو نەتەوەیی کوردستانی (کەنەکە). سەرەڕاو خێرئامایتا، وەشحاڵێنمێ کە پێسەو پلاتفۆرمو هۆرام-ی پەی هامویری سەرو پەرسە نەتەوەییەکا ئینامێ چێگە . هەر پاسە کە زاندێ ئاژەو ئارۆ کوردستانی جە گرد وەختێ زیاتەر پەنەوازیش بە یۆگێرتەی هەن. جە گرد لایە گەلەکەما و نیشتمانەکەما بە گرد جۆرێ هێرش ئینا سەرشۆ . ئی هێرشێ بە حزب و چن لایانا نە وەرش پەنە گیریۆ ، نە جە وەرانوەریچشاوە تاوا مدرا . جە وەرانوەرو تاونایۆ زوانیما ، سۆچنای ژیوگەیما و کۆم کۆشتەو خەڵکەکەیما هام ویری و یۆگێرتەی ئامیان و سەرگنایمانە .
کورد بە گردی مشۆم ئانەی یاوۆنە کە جە ئاژەو ئاڕۆینە ، یا ئانەن مەمەنمێ یا سەرگنمێ . مەبۆ هیچ کەس و لایانێ وێش بێ لایان بزانۆ . بێ لایانی و بێ سۆزی سەرەڕاو ئانەی کە شەرمێ گەورەن . هێزدایا بە داگیرکارا کۆردستانی . هەر پاسە کە زاندێ جە هەر چوار بەشەکەو وەتەنی ، خەڵکەکەما جە وەرانوەروو فاشیزموو تورکیەی ، داعش و جمهووری ئیسڵامی ئیرانی و خائێنا بە کۆشیای ڕوانە ، مدرامان کەرۆ . پەێ ئانەی ونەو گیان سەردە ڕاو ئازادی و ئاخێزوو گەلەکەیما بە شکۆداری ژەنا هەر پاسە نەمجیۆ ، یاگێ وێشەنە کە جە سەروو قازانجوو حزبی ، خانەوادەیی و جیاوازی ویر و رەنگەکا کۆگاو نەتەوەیی کوردستانی جە چوارچۆ بەیاننامەی و قسە کەردەی بێ بەر وهەنگامێ کردەوەئییە بنیۆ .
پڵاتفۆرموو هۆرام-ی جە ماوەو چن ساڵی ویەردە تا ئاڕۆ پەێ کوردستانی ئازاد و گەڵمیری ، بە پەشت بەستەی بە ویروو وێڕاوەبەری دیموکراتیکی جە دلێ و بەروو وەتەنینە کۆشیان . ئارۆیچ بە گرد جۆرێ پەێ سەروستەو ئاخێزوو( ژەنی ، ژیوای ئازادی ) بەێ رێکوستەی خەڵکەکەیما ،پارێزناو فەرهەنگو زوانوو هۆرامیەکا ، پارێزنای ژیوگەی هەرمانە کەرۆ . دماجار داواچما ئانێنە کە گرد لایە پسۆ هەنگامێ بنەڕەتییە پەێ سەرگنای یەکجاری ، ژەنا باوڕ کەرا، شکۆداری بە ژەنا بسپارا . چانەی دڵنیەبیمێ کە هەر ئاخێزێ یاگە پاو ژەناش چەنە دیار نەبۆ سەرنمەگنۆ .ئێمە پسۆ کوردی تا ئارۆ تەنیا جە یۆ نەگێرتەینە ، یەک دەنگێ بێیەنمێ . بەیدێ با بە بەرز ویناو ونەو گیان سەردەسا ئاخێزوو ( ژەنی ، ژیوای ئازادی ) بە بەژداری ژەنا وەلێ سەذ ساڵەو ڵۆزانینە یۆی گێرمێ . سەذ سالێن کورد بە ویرو پیاساڵاری نەتوانش نەخشەو لۆزانی هۆرشانۆوە ، بەیدێ با بە باوەریدای بە ژەنا لۆزانی کەرمێ بە ویەردە .
