کەجەکە پەیامەکەشنە پەی کۆبییەیۆ گەورەکەو کۆڵنی تیشکەش وستە سەروو کەمپەینوو ئازادیی پەی ڕابەروو گەلوو کوردی عەبدوڵا ئۆجالانی و واتش: "ئێمە چەنی هامڕاکاما هەنگامە منیەیمێ. باوڕما پاسنەن سەرۍ گنمۍ، گۆشەگیریی ماڕمێ".
هامسەرۆکایەتیی کۆنسەو ڕاوەبەریی کەجەکەی پەی کۆبییەیۆ گەورەکەو شاروو کۆڵنوو ئەڵمانیای پەی ئازادیی ڕابەروو گەلوو کوردی عەبدوڵا ئۆجالانی و چارەسەری سیاسیی پەرسەو کوردی پەیامێوەش کیانا.
پەیامەکەو کەجەکەی کۆبییەیوەکەنە ونیاوە ئینە بێ:
ئەوەڵ پەی چالاکاو ڕاپیمای درێژوو ئەنتەرناسیۆنالوو گەنجا، ڕاپیمەرا ڕاپیمایی درێژوو فەڕەنسای، گردوو ڕەنجدەرا و خەباتکاراو ڕاپیمای و کۆبییەیۆکەی، دۆس و هامڕا ئامادەبییا، بە نامۍ کۆما جڤاکێن کوردستان (کەجەکە)یۆ جە قووڵایی دڵیوە و کەشەکاو کوردستانیوە سڵام پەی گردیتا کیانمۍ و هومێدوو سەرکەوتەیتا پەی موازمێ. ٢٥ەمین ساڵیادوو پیلانگێڵنیی میاننەتەوەیی ١٥ شوباتینە، ئی ڕاپیمای و جەمۆبییە شکۆدارە جوابێوە گەورەن پەی گردوو پیلانگێڵنا.
وەڵۍ ٢٥ ساڵا، ١٥شوباتوو ١٩٩٩ ستەم و نادادپەروەریێوە گەورە کریا. دوژمناو گەلوو کوردی بە هامپەیمانیێوە جیهانی کوۍ بیێوە و بە فێڵ و تەڵەکە سەرۆک ئاپۆشا سوریانە بەرئارد و تا کینیا کەوتۍ شۆنیش و گێرتشا و داشا دەسوو دەوڵەتوو تورکیایۆ. نە ویژدان و نە ئینساف و نە مافوو ئینسانی و نە یاسا و نە دادپەروەری و نە ئەخلاق کەوت ویرشا، قەرارشا دا ڕابەرێوە کوردی بێدەنگ کەرا و ژیوایش وەنە حەرام کەرا، کە پەی ویژدانی و یاسۍ و داد و داپەروەری و ئاشتی و یەکسانی و ئازادی و گردوو بەها ئینسانییەکا خەبات و کۆشیای کەرۆ.
هامپەیمانەکاو دەوڵەتوو تورکی جیهاننە، ئەمریکاوە تا فرەو وەڵاتاو یۆبییەی ئەورووپای، یۆنان، تا ڕوسیا و ئیسرائیل، میسر و کینیا، خەتەو ناهەقی و نادادپەروەریینە ڕیزشا بەست و پەی بەرژەوەندییەکاو وێشا تەماموو نۆرمە مرۆیی و ئەخلاقییەکاشا پاشێل کەردێ، بە فێڵ و تەڵەکە سەرۆک عەبدوڵا ئۆجالانشا کینیانە گێرت و بە گەمێوە بێوێنە و تاریک دریا دەسوو دەوڵەتوو تورکیایۆ.
دۆسا و هامڕایە ئازیزا!
ئامانج جە پیلانگێڵییەکەی تەسفیەکەردەی تەڤگەروو ئازادیی گەلوو کوردستانی بێ. ئادێ پەکەکەشا بە تەڤگەرێوە کلاسیکێ نیارە و واچێنێ دماو دیلکەردەی سەرۆک ئاپۆی، تەڤگەرەکە پەراوێز وزیۆ و بەش بۆ و وەڵا بۆوە و مەمەنۆ. قۆناغوو دماو ئا پیلانگێڵنییە بەڕۆشنی نیشانەش دا کە ئا ناوەندە نادادپەروەرانێ نەیاوێ ئامانجوو وێشا، وەشڵەیێ و ئاواتەکێشا نامێ دی. ماوەو ئی ٢٥ ساڵەینە، بەتەمامی ئانە چەمەڕوانش کەرێنێ، پێچەوانەکەش بی. سەرۆک ئاپۆ زینداننە مدرامانش کەرد و زیندانوو ئیمراڵییش کەرد بە مەیدانوو کۆشیای. لاێوە تەریچۆ تەڤگەروو ئازادی و گردوو گەلوو کوردستانی، چی ٢٥ ساڵەنە، مدرامانێوە بێوێنەشا پەرە پە دا و پلانگێڵنییشا پووچەڵ کەردۆ.
حەرچەندە پیلانگێڵنەکێ نەیاوێ ئامانجەکەیشا، وەلێ دەسشا جە هجووم و فێڵەکاشا وەر نەدا. ئیساتێچ دەوڵەتوو تورکی بە گرد نۆعێوە دوژمنایەتیی گەلوو کوردستانی کەرۆ و درێژە بە هجوومەکاش مدۆ. دەوڵەتوو تورکی نەک حەر جە سەرنیشتوو کوردستانینە بەڵکوم پانیشت و وەرنیشت و وەرکەوتوو کوردستانیچنە دوژمنایەتیی کوردا کەرۆ. بواروو میاننەتەوەیینە هەوڵێ مدۆ ددانێ نەنیۆ بە کوردیرە و هجووم کەرۆ سەروو گروو دەسکەوتەکاو کوردی. پیلانگێڵنییەکە بە نۆعێ تەر بەردەواما و پێویسا گردوو کوردستانییا و دۆسامان ئی ڕاسییە بوینا و بەپاو ئا ڕاسییە ڕاوشۆن گێرانە وەر و کۆشیای گەورەتەر کەرا.
دۆسا و هامڕا شکۆمەنداما!
ئانە ٣٥ مانگێن هیچ زانیاریێوە دەربارەو سەرۆک ئاپۆی و ٣ هامڕایاما ئیمراڵیینە نییا. ماوەو ئی ٣٥ مانگەینە نە بنەیانە، نە پارێزنەر، نە کەسێوە متمانەپەنەکریا، سەرۆک ئاپۆ هامڕێکێش نەدیێنێ و دەنگش نەژنیێنێ، ماوەو ئی ٣٥ مانگەینە حیچ نامە و پەیوەندیێوە تەلەفۆنیشاما پەنە نەیاوان. پی بۆنەوە، ١٠ ی تشرینوو یوەموو ٢٠٢٣یوە، دۆساو سەرۆک ئاپۆی و دۆساو گەلوو کوردی کەمپەینێوە گەورەشا سەروو ئاستی میاننەتەوەیینە بە نامێ "ئازادیی پەی بەڕێز عەبدوڵا ئۆجالانی، چارەسەر پەی پەرسەو کوردی" دەسش پەنە کەرد و بە شێوێوە وەرفراوان بەراش ڕاوە. ئێمە پێسە کەجەکەی جارێوە تەر سڵام چا دۆسا کەرمێ و سوپاسوو وێماشا پەی بەروزمێ. بە گردوو هێزیماوە یاگێما کەمپەینەکەنە گێرمێ و شانە بە شانوو ئی دۆسا هەنگامە منیەیمێ. باوڕما پاسنەن سەرگنمێ و گۆشەگیریی ماڕمێ و ڕابەر ئاپۆی و هامڕاکاش ئازاد کەرمێ.
ئی کۆبییەیۆ ئەڵمانیایە ناوەندوو ئەورووپاینە. چی بۆنەنە، داوا جە گردوو هێزە جیهانییەکا کەرمێ، بەتایبەت ئەڵمانیا و یۆبییەی ئەورووپا، گۆش جە دەنگوو گەلوو کوردی، دەنگوو دۆساو سەرۆک ئاپۆی گێرا، هامکاریی دەوڵەتوو تورکی نەکەرا و دژوو ئی نادادییە مرداوە. هەرپاسە دەوروو سەرۆک ئاپۆی ئاشتی و ئارامیینە بوینا و مەسەلێ کوردینە لایەنگیرێ چارەسەری با.
دۆسا و هامڕایاو سەرۆک ئاپۆی!
ڕاپیمای و کۆبیەیۆکەیتا وەختێوە فرە گرنگنە کەردێ. ئی چالاکییەتا تەڤگەروو ئازادی سەرۆک ئاپۆی قەوەتتەر کەرۆ.. پێویسا گرد دۆس و هامڕێوە بزانۆ، کە کۆشیای ئازادی هەناسێوە درێژش گەرەکا. داوا جە گردیتا و گردوو گەلوو کوردستانی و دۆسەکاما کەرمێ زیاتەر یاگێ وێشا دلێ کەمپەینوو ئازادیی سەرۆک ئاپۆینە گێرا و چالاکییەکاتا قەوەتتەر کەردێ. ئازادیی سەرۆک ئاپۆی ئازادیی گەلوو کوردستانین، ئازادیی گردیمانە.
بژیوۆ سەرۆک ئاپۆ!
بژیوۆ کوردستان!
بژیوۆ هامڕایی و دۆسایەتیی گەلا!
بژیوۆ ئازادیی!"
