پارتو ژیۋای ئازادی کوردەسانی (پەژاک) بە نامو نیشانو " بانگەوازی رابەر ئاپۆی پەی فاڕیای بنەڕەتین جە رەوتو ئەوەکۊشای ئازادیوازانەو گەلوو کوردی" پەشتیوانی ۋێش پەی بانگەوازییەکەو ڕابەر ئاپۆی ئەرەیاۋنا.
دەقو ئەرەیاۋناکەو پارتو ژیۋای ئازادی کوردەسانی پی جۊرەنە:
پەی رای گرڎی گرڎو کوردەسانی و جەهانی
رۆو پەنجشەممەی ٢٧/١/٢٠٢٥ پەیامە تاریخیەکەو رابەر ئاپۆی وەڵا بیۆ. بانگەوازەکەو رابەر ئاپۆی بە شێوێوە تایبەت ئاماژەش بە چارەسەری ئاشتییانەو پرسو کوردی، ئەرەمەرزنای گلېرگەی دیموکراتیکی و هەرپاسە فاڕیای بنەڕەتی جە رەوتو ئەوەکۊشای ئازادیوازانەو گەلوو کوردی کەردەن. جە ۋەرکۊتوو مېیامینینە فاڕیایەکۍ بە شێوێوە ۋەرفراوان و خێرا ملاڕاوە. ناوچەکە ئیتر هەرەکەتو پەنگواردەیۆو چەقبەستەی ئا کێشەو قەیراناشە نەمەنەن کە دەرەنجامو سیاسەتی پاوانوازانەو دۊڵەت – نەتەوەکان. زێهنییەتو نەتەوەپەرەسی هەم پېسە سەرچەمەو وەشبیەی کێشەگەلۍ دژواری و مەحاڵی پەی ناوچەکەی و هەمیچ پېسە لەمپەرۍ مکوڕا جە ئاستەنگکەردەی پەی چارەسەریی ئی گرفتا. چی بەینەنە بەتایبەتی پرسو کوردی، کە بە مەڵامەتو تەماشەکەردەی ئەمنی و ڕاچارەو سەرکوتکەردەی بە هێزی سەروازی کە دەرەنجامو زێهنییەتو دۊڵەت – نەتەوەیا، پېسە زامێوە قووڵی و لکە کۊرێش پنە ئامان کە نیشانێوە تەماما جە داماگی رژیمە دەسەڵاتدارەکا ۋەرکۊتوو مېیامینی جە چارەسەرکەردەی گرفتەکانە. بانگەوازەکەو رابەر ئاپۆی دەسوەڵێوستەین پەی دەربازبیەی چی چەقبەستەییە هەرپاسە دەرفەتێوە تاریخی پەی دۊڵەتو تورکیەی و دۊڵەتا تەرو ناوچەکەی بە مەبەسو چارەسەریی و هەنگامنیای بەرەو دیموکراسیش خولقنان. بێ گومان بەئاکام یاوای ئی دەسوەڵێوستەیەو رابەر ئاپۆی پەی ئاشتی، لکەدریاو ئازادیی بەڎەنی ئێژایشا و تەمامو زینانیا سیاسین، دمایی ئارڎەی بە جەنگی جە لایەنو دۊڵەتو تورکیەی و هەرپاسە رەخسنای کەشی سیاسی دیموکراتیک و لایەنە یاساییەکان.
رابەر ئاپۆ جە پەیامی تاریخی ۋێشەنە سەرنجش وستەن سەرو ئی مژارەیە کە، جمېیەرو ئازادیوازی جە کوردەسانەنە سەرەڕاو فیداکاریێوە گۊرەی، جە ئەنجامو تەنگ وچەڵەمەو زێهنییەتی و ئا پېکئامایەی کە بەروزو روانگەکا جەهانی دووە جەمسەری بۍ، نەتاواش بە تەمامی جوابو چارەسەرکەردەی ئی پرسە بنەچینەییە بڎۆوە. نیم سەدە ئەوەکۊشای بێ هامتاو پارتو کرێکاراو کوردەسانی نەتەوەو کوردیش جە تەرسەو پاکتاوی رەگەزی پارېزنا و ئا سیاسەتێشە دلێنەبەردۍ کە سەرو بنەماو حاشاکەردەی جە بیەو گەلەکەیما لوێنۍ ڕاوە. نەتەوەو کوردی قۆناغەو “ژیۋایۆ” و پەرسو بیەی پېسە نەتەوەی بە سەرکۊتەیی وېیەرناو یاوا بە قۆناغو ۋێبیەی، ۋێڕاوەبەری و سەرمەشقایەتیکەردەی دیموکراسی. بێ گومان سەروستەی ئی قۆناغێچە پەنەوازیش بە روانگەو ڕاوجای تازەی پەی درێژەو ئەوەکۊشای هەن.
رابەر ئاپۆ جەر گرڎو ساڵەکا دەیەو ٩٠ی زایینی و دماتەریچ جە ٢٦ ساڵا زینانو ئیمراڵینە، ئەوەکۊشایۍ ۋەرفراوانش پەی فاڕیای زیهنییەتی و فاڕیای جە پاڕادایمو کۊشش و تەڤگەری ئازادینە جە کوردەسانەنە ڕاوەبەر کەرڎەن. پاڕادایمی تازەو ئەوەکۊشای سەرو بنەماو گلېرگەی دیموکراتیک، ئێکۆلۆژیکی و ئازادی ژەنۍ پێشکەش کەرد کە مۊچیاری ئەوەکۊشای ئێمەن. دما پەیام و بانگەوازی رابەر ئاپۆی جەمۍ مژارۍ سەرەکیۍ، بە قیمەتۍ و ژیوایێش جە ۋێش گرتێنۍ، ئێمەیچ پېسە پارتێوە کە فەلسەفەو پاڕادایمو گلېرگەی دیموکراتیکی رابەر ئاپۆیما پەی یاوای بە مەرامەکاما کەردەن بە بنەما پەی ئەوەکۊشای ۋێما، بە گرڎ جۊرۍ پەشتیوانیی ۋێما پەی بانگەوازو دەسوەڵێوستەکەو ئێژایشا پەی دەسەبەربیەی ئاشتی بەردەوامی جە تورکیەنە ئەرەیاۋنمۍ و چارەسەری دیموکراتیک و ئاشتیوازانەو پرسو کوردی جە ڕاو وتووێژی پېسە چارەسەری بنەڕەتی هۊرمسەنگنمۍ و چنی ئینەی ئەوەکۊشای ۋەرفراوان پەی وەشکەردەی گلېرگەی دیموکراتیکی و کەسایەتی ئازادی بە ڕاو یاوای بە ئازادی موینمۍ.
مەجلیسو پارتو ژیۋای ئازادی کوردەسانی – پژاک
یەکشەممە ١٢و سیاوکامەو ٢٧٢٤
٢ۍ مارسو ٢٠٢٥
